અપડેટ / ઈઝરાયલમાં ફસાયેલી અભિનેત્રી નુસરત ભરુચાનો થઈ ગયો સંપર્ક: જાણો અત્યારે ક્યાં છે અભિનેત્રી? ક્યારે આવશે ભારત

• ઈઝરાયેલમાં ફસાયેલ નુસરત ભરૂચાને લઈ મોટા સમાચાર
• ઈઝરાયેલથી ભારત પરત ફરવા એરપોર્ટ વિસ્તારમાં પહોંચી નુસરત ભરૂચા
• ટૂંક સમયમાં ભારતની ફ્લાઈટ લઈને પોતાના દેશ પરત ફરશે

Nusrat Bharucha In Israel : ઈઝરાયેલ અને પેલેસ્ટાઈન વચ્ચે શનિવારથી યુદ્ધ ચાલી રહ્યું છે. આ તરફ બોલિવૂડ એક્ટ્રેસ નુસરત ભરૂચા બંને દેશો વચ્ચે ચાલી રહેલા યુદ્ધ વચ્ચે ઈઝરાયેલમાં ફસાઈ ગઈ છે. મહત્વનું છે કે, આ સમાચાર સામે આવ્યા બાદ અભિનેત્રીના ચાહકો ખૂબ જ ચિંતિત હતા અને નુસરત સુરક્ષિત રીતે પોતાના દેશ પરત આવે તે માટે પ્રાર્થના કરી રહ્યા હતા. પરંતુ હવે અભિનેત્રી વિશે એક રાહતના સમાચાર સામે આવ્યા છે. 

ઈઝરાયેલમાં ફસાયેલી નુસરત ભરૂચા સાથે સંપર્ક કરવામાં આવ્યો છે. અભિનેત્રી એકદમ સુરક્ષિત છે. તે ઈઝરાયેલથી ભારત પરત ફરવા એરપોર્ટ વિસ્તારમાં પહોંચી છે. તે ટૂંક સમયમાં ભારતની ફ્લાઈટ લઈને પોતાના દેશ પરત ફરશે. નુસરતના પરિવાર, ચાહકો અને સમગ્ર દેશ માટે આ રાહતના સમાચાર છે. નુસરત સુરક્ષિત રીતે પોતાના દેશ પરત ફરે તેની બધા લોકો રાહ જોઈ રહ્યા છે. 

નુસરત ઈઝરાયેલમાં કેવી રીતે ફસાઈ?
નુસરત ભરૂચા હાઈફા ઈન્ટરનેશનલ ફિલ્મ ફેસ્ટિવલનો ભાગ બનવા ઈઝરાયેલ ગઈ હતી. પરંતુ આ દરમિયાન ત્યાં યુદ્ધ થયું અને નુસરત ત્યાં જ ફસાઈ ગઈ. અભિનેત્રીની ટીમે આ અંગે માહિતી આપી હતી.માહિતી આપતાં તેની ટીમે કહ્યું હતું કે, અભિનેત્રી ભોંયરામાં છે અને સુરક્ષિત છે. પરંતુ ચિંતા ત્યારે વધી ગઈ જ્યારે નુસરત સાથેની આ વાતચીત બાદ તેની ટીમનો સંપર્ક તૂટી ગયો. તેમની ટીમે કહ્યું હતું કે અમે સંપર્ક કરી શકતા નથી. અમે નુસરતને સુરક્ષિત રીતે ભારત પરત લાવવાનો પ્રયાસ કરી રહ્યા છીએ અને આશા રાખીએ છીએ કે તે સ્વસ્થ અને સુરક્ષિત પરત ફરે. હવે લેટેસ્ટ માહિતી અનુસાર, નુસરત સુરક્ષિત રીતે એરપોર્ટ પર પહોંચી ગઈ છે. ટૂંક સમયમાં તે ભારતની ફ્લાઈટમાં બેસશે. 

આ ફિલ્મોમાં જોવા મળી હતી નુસરત
નુસરત ભરૂચાની વાત કરીએ તો તે બોલિવૂડનું મોટું નામ છે. નુસરતે ઘણી ફિલ્મોમાં પોતાના દમદાર અભિનયથી ચાહકોનું દિલ જીતી લીધું છે. અભિનેત્રીએ પોતાના કરિયરમાં પ્યાર કા પંચનામા, ડ્રીમ ગર્લ, જનહિત મેં જારી, રામ સેતુ જેવી ફિલ્મો કરી છે. નુસરત છેલ્લે ફિલ્મ અકેલીમાં જોવા મળી હતી.