ગુજરાત / ચૂંટણી પહેલા તોડજોડ: AAP અને કોંગ્રેસના કેટલાક નેતાઓ CR પાટીલના હસ્તે ભાજપમાં જોડાશે

• વિધાનસભાની ચૂંટણી પહેલા રાજકીય ભૂકંપ
• AAP અને કોંગ્રેસના કેટલાક નેતાઓ ભાજપમાં જોડાશે
• મધ્ય ગુજરાતના કોંગ્રેસના નેતાઓ જોડાશે ભાજપમાં

ગુજરાતમાં આગામી વિધાનસભાની ચૂંટણીને લઈને રાજકીય ધમધમાટ શરૂ થઈ ગયો છે.  ગુજરાતમાં હવે જે રીતે માહોલ પૈદા થઈ રહ્યો છે. જે રીતે દરેક રાજકીય પાર્ટીઓ સક્રિય બની છે. તેને જોતા એવા સંકેત મળી રહ્યા છે કે, ગુજરાતમાં ખુબ વહેલા ચૂંટણી આવી રહી છે. ડિસેમ્બરમાં જ ચૂંટણી આવશે તેવા સંકેત છે. આ વચ્ચે વિધાનસભાની ચૂંટણી પહેલા રાજકીય ભૂકંપ જોવા મળી રહ્યો છે.

AAP અને કોંગ્રેસના વધુ કેટલાક નેતાઓ ભાજપ જોડાશે

વિધાનસભાની ચૂંટણી પહેલા રાજકીય ભૂકંપ જોવા મળી રહ્યો છું. AAP અને કોંગ્રેસના વધુ કેટલાક નેતાઓ ભાજપ પ્રદેશ પ્રમુખ સી.આર.પાટીલના હસ્તે ભાજપમાં જોડાશે. મધ્ય ગુજરાતના કોંગ્રેસના નેતાઓ ભાજપમાં જોડાશે. અત્રે ઉલ્લેખનીય છે કે અગાઉ આમ આદમી પાર્ટીના કાર્યકર્તાઓને ભાજપમાં સમાવવાની વાતને AAP ગુજરાત પ્રદેશ સંગઠન મહામંત્રી મનોજ સોરઠીયાએ ફગાવી હતી. તેમણે કહ્યું હતું કે AAPના તરછોડાયેલા બે ચાર લોકો ભાજપમાં જોડાયા છે. 1500 જેટલા AAP કાર્યકરો જોડાયા આ વાત તદન ખોટી છે.

50થી વધુ બેઠકો જીતી શકે છે AAP: ગોપાલ ઈટાલિયા

બીજી તરફ દિલ્હી અને પંજાબમાં આમ આદમી પાર્ટીની સરકાર બનાવ્યા બાદ હવે AAP ગુજરાતમાં પગપેસારો કરી રહ્યું છે.  ગુજરાત વિધાનસભાની ચૂંટણીને લઇને આમ આદમી પાર્ટી એક્ટિવ મોડમાં જોવા મળી રહી છે. આમ આદમી પાર્ટીના નેતા અને દિલ્હીના મુખ્યમંત્રી અરવિંદ કેજરીવાલ અને પંજાબના મુખ્યમંત્રી ભગવંત માન બે દિવસ માટે ગુજરાતની મુલાકાતે આવ્યા હતા,  વહેલી ચૂંટણી થવાની શક્યતાઓ વચ્ચે રાજકીય માહોલ જામ્યો છે. તેમજ કેન્દ્રીય નેતાઓના ગુજરાત પ્રવાસ પણ વધ્યા છે. ત્યારે ગુજરાતમાં વિધાનસભાની ચૂંટણીને લઈને AAP દ્વારા મહત્વનો દાવો કરવામાં આવ્યો.

ચૂંટણીમાં 50થી વધુ બેઠકો જીતવાનો AAP દ્વારા દાવો કરવામાં આવ્યો છે. ચૂંટણીને લઈને આમ આદમી પાર્ટીએ  પ્રેસ કોન્ફરન્સ સંબોધી હતી. આ દરમિયાન AAPના ગુજરાત પ્રમુખ ગોપાલ ઈટાલિયા દ્વારા જીતનો દાવો કરવામાં આવ્યો હતો. તો સાથે જ અન્ય એક પાર્ટી કાર્યકરે સંબોધનમાં જણાવ્યુ કે અમે કોઇ પાર્ટીને હરાવવા નથી માગતા અમે તો બસ જનતાને જીતાડવા માંગીએ છીએ.  ગુજરાતમાં સ્કૂલ બને, હોસ્પિટલ બને અને બેરોજગારી દૂર થાય  અને લોકોને મિનિમમ વેતન પુરતુ મળી રહે.