સુરત / ટીમ્બા નજીક તાપી નદીમાં ન્હાવા પડેલા યુવકનું ડૂબી જતાં મોત, ભાંગી પડ્યો પરિવાર

• સુરતના ટીમ્બા ગામ પાસે યુવક ડૂબ્યો
• મિત્રો સાથે નદીમાં સ્નાન કરવા ગયો હતો યુવક
• મૃતકનું નામ આશિષ કાતરિયા હોવાનું આવ્યું સામે 

કામરેજના ટીમ્બા ગામ પાસે પસાર થતી નદીમાં ડૂબી જતા યુવકનું મોત નીપજ્યું છે. હાલ કામરેજ પોલીસે યુવકના મૃતદેહને પોસ્ટમોર્ટમ માટે હોસ્પિટલમાં ખસેડીને વધુ તપાસ હાથ ધરી છે.

ટીમ્બા ગામ પાસે યુવક ડૂબ્યો
મળતી માહિતી અનુસાર, કામરેજના ગળતેશ્વર મહાદેવ મંદિર પાસેથી પસાર થતી નદીમાં આશિષ કાતરિયા નામનો યુવક ગઈકાલે મિત્રો સાથે ન્હાવા માટે આવ્યો હતો. તે મિત્રો સાથે ન્હાવા માટે નદીમાં કૂદ્યો હતો. આ દરમિયાન તે અચાનક તાપી નદીના પાણીમાં ડૂબી ગયો હતો. જે બાદ આશિષની સાથે આવેલા મિત્રોએ તાત્કાલિક પોલીસ કંટ્રોલરૂમાં ફોન કરીને સમગ્ર મામલે પોલીસને જાણ કરી હતી. 

મૃતદેહને પોસ્ટમોર્ટમ અર્થે હોસ્પિટલમાં ખસેડાયો
પોલીસને જાણ કરતાની સાથે જ કામરેજ પોલીસની ટીમ તાત્કાલિક ઘટના સ્થળે દોડી આવી હતી. પોલીસ દ્વારા તરવૈયાઓની મદદથી યુવકની શોધખોળ હાથ ધરી હતી.  જે બાદ આજે યુવકનો મૃતદેહ મળી આવ્યો છે. કામરેજ પોલીસ દ્વારા યુવકના મૃતદેહને પોસ્ટમોર્ટમ અર્થે હોસ્પિટલમાં ખસેડવામાં આવ્યો છે.