કાળજું કંપાવે તેવી ઘટના / અમદાવાદમાં 6 વર્ષના બાળકનું લિફ્ટમાં મૃત્યુ: અચાનક બંધ થયો દરવાજો અને છૂંદાઈ ગયું માથું, લટકતો રહ્યો મૃતદેહ

• શાહીબાગ વિસ્તારમાં વસંત વિહાર ફ્લેટમાં બની ચોંકાવનારી ઘટના
• 6 વર્ષીય બાળક લીફ્ટમાં ફસાઈ જતા મોત નિપજ્યું
• ફાયર બ્રિગ્રેડ દ્વારા બાળકનાં મૃતદેહને બહાર કાઢી પીએમ અર્થે મોકલ્યો

અમદાવાદ શહેરમાં માતા-પિતા માટે ચેતવણીરૂપ કિસ્સો બનવા પામ્યો છે. જેમાં 6 વર્ષીય બાળકે પોતાનો જીવ ગુમાવ્યો છે. અમદાવાદ શહેરનાં શાહીબાગ વિસ્તારમાં આવેલ વસંત વિહાર ફ્લેટ -2 માં 6 વર્ષીય બાળક રમતા રમતા લીફ્ટ સુધી પહોંચી ગયો હતો. જે બાદ અચાનક જ લીફ્ટનો દરવાજો બંધ થઈ જતા અને લીફ્ટ ચાલુ થઈ જતા બાળકનું માથું લીફ્ટમાં ફસાઈ જતા બાળકનું ઘટનાં સ્થળે જ મોત નિપજ્યું હતું. ત્યારે આ બાબતે રહીશો દ્વારા તાત્કાલીક ધોરણે ફાયર બ્રિગ્રેડ તેમજ ઈમરજન્સી 108 ને જાણ કરતા ફાયર બ્રિગ્રેડની ટીમ તેમજ 108 દ્વારા તાત્કાલીક ઘટનાં સ્થળે પહોંચી બાળકનાં મૃતદેહને બહાર કાઢી પીએમ અર્થે સિવિલ હોસ્પિટલ ખાતે લઈ જવામાં આવ્યો હતો.

બાળક રમતા રમતા લીફ્ટ પાસે પહોંચી ગયો હતો
મળતી માહિતી મુજબ સાંજનાં સુમારે શાહીબાગ ડફનાળા વિસ્તારમાં આવેલ વસંત વિહાર ફ્લેટ-2 માં 6 વર્ષીય બાળક આર્ય કોઠારી સી બ્લોક પાસે રમતા રમતા લીફ્ટ પાસે પહોંચી ગયો હતો અને લીફ્ટનો દરવાજો ખોલી લીફ્ટમાં ગયા બાદ અચાનક જ લીફ્ટ ચાલુ થઈ ગઈ હતી. જે બાદ બાળક ગ્રાઉન્ડ ફ્લોર અને ફર્સ્ટ ફ્લોર  વચ્ચે ફસાઈ જવા પામ્યો હતો.