કાર્યવાહી / મહારાષ્ટ્રમાં સુરક્ષાદળોને મોટી સફળતા: 38 લાખના ઇનામી 3 નક્સલી ઠાર, કમાન્ડરનું પણ કોકડું વાળી દીધું

• મહારાષ્ટ્ર પોલીસે એન્કાઉન્ટરમાં ત્રણ અગ્રણી નક્સલવાદીઓને ઠાર
• ગઢચિરોલી જિલ્લાના કેદમારા જંગલમાં થઈ હતી અથડામણ
• અથડામણમાં દલમ કમાન્ડર સહિત ત્રણ માઓવાદીઓ ઠાર 
• માર્યા ગયેલા નક્સલવાદીઓ પર 38 લાખ રૂપિયાનું હતું ઈનામ 

મહારાષ્ટ્ર પોલીસે એન્કાઉન્ટરમાં ત્રણ અગ્રણી નક્સલવાદીઓને ઠાર કર્યા હોવાના સમાચાર સામે આવ્યા છે. વાત જાણે એમ છે કે, રવિવારે ગઢચિરોલી જિલ્લાના કેદમારા જંગલમાં પોલીસ સાથેની અથડામણમાં દલમ કમાન્ડર સહિત ત્રણ માઓવાદીઓ ઠાર કરી પોલીસે મોટી સફળતા હાંસલ કરી છે. નોંધનીય છે કે, માર્યા ગયેલા નક્સલવાદીઓ પર 38 લાખ રૂપિયાનું ઈનામ હતું.

ગઢચિરોલીના પોલીસ અધિક્ષક (SP) નીલોત્પલે જણાવ્યું હતું કે, પોલીસને બાતમી મળી હતી કે, નક્સલીઓના પેરીમીલી અને અહેરી દલમના સભ્યો માને રાજારામ અને પેરીમીલી સશસ્ત્ર ચોકી વચ્ચેના જંગલ વિસ્તારમાં કેમ્પ કરી રહ્યા છે. માહિતી બાદ પોલીસના C-60 ફોર્સના બે યુનિટને પ્રહિતાથી જંગલ વિસ્તારમાં સર્ચ ઓપરેશન માટે મોકલવામાં આવ્યા હતા.

સર્ચ ઓપરેશન અને પછી ગોળીબાર 
આ તરફ પોલીસના C-60 ફોર્સ દ્વારા સર્ચ ઓપરેશન દરમિયાન માઓવાદીઓએ પોલીસ પર ગોળીબાર કર્યો હતો. જેના પગલે પોલીસે જવાબી કાર્યવાહી કરી હતી. આ દરમિયાન એન્કાઉન્ટર બાદ ઘટનાસ્થળેથી ત્રણ નક્સલીઓના મૃતદેહો, હથિયારો અને અન્ય સામગ્રી મળી આવી છે.

પેરિમિલી દલમના કમાન્ડર બિટલુ મડાવી પણ ઠાર 
પ્રાથમિક તપાસ મુજબ મૃતકોમાંથી એકની ઓળખ પેરિમિલી દલમના કમાન્ડર બિટલુ મડાવી તરીકે થઈ છે. જ્યારે અન્ય બે લોકોની ઓળખ પેરીમીલી દલમના વાસુ અને અહેરી દલમના શ્રીકાંત તરીકે થઈ છે. મડાવી વિદ્યાર્થી સાઈનાથ નરોટેની હત્યા તેમજ આગચંપીનાં બે બનાવોમાં મુખ્ય આરોપી હતો.

છત્તીસગઢમાં થયો હતો મોટો નક્સલી હુમલો 
નોંધનીય છે કે, ગત મહિનાના અંતિમ સપ્તાહમાં છત્તીસગઢના દંતેવાડામાં નક્સલીઓએ મોટો હુમલો કર્યો હતો. જેમાં 10 જવાનોએ બલિદાન આપ્યું હતું. ત્યારે નક્સલવાદીઓએ રસ્તા પર 50 કિલો આરડીએક્સ છુપાવી દીધું હતું. સુરક્ષાકર્મીઓનું વાહન ત્યાંથી પસાર થતાં જ જોરદાર વિસ્ફોટ થયો હતો.