- નારણપુરામાં સોનું ભરેલ બેગની ચીલ ઝડપનો મામલો
- ક્રાઈમ બ્રાન્ચે એક આરોપીની કરી ધરપકડ
- આરોપી વિરૂદ્ધ 7 થી વધુ ગુના નોંધાયા હોવાનું તપાસમાં સામે આવ્યું
નારણપુરામાં મીરાઅંબિકા સ્કૂલ પાસે મહિલાના સોનાની લગડી અને રોકડ ભરેલી બેગની ચીલ ઝડપ મામલે ક્રાઈમ બ્રાન્ચે એક આરોપીની ધરપકડ કરી છે. આરોપીને લુડો ગેમ રમવાની કુટેવ હતી. ચિલ ઝડપ બાદ લુડો ગેમમાં 50 હજાર હારી ગયો. આરોપી વિરુદ્ધ 7થી વધુ ગુના નોંધાયા હોવાનું તપાસમાં ખુલ્યું.
બેેકમાં દાગીના મુકવા જઈ રહેલ મહિલા પાસેથી દાગીનાં પડાવી લીધા
અમદાવાદ ક્રાઈમ બ્રાન્ચે આરોપી રાહીલ સલીમભાઈ મનસુરી ધરપકડ કરી છે. રાહીલની ક્રાઈમ બ્રાન્ચે ખમાસા ચાર રસ્તા પાસેથી ધરપકડ કરી છે. રાહીલે ગઈકાલે સવારે 10.73 લાખના સોનાના દાગીના અને રોકડની ચીલ ઝડપ કરી હતી. એટલે કે બેંકના લોકરમાં દાગીના મુકવા જઈ રહેલા મહિલા પાસેથી પડાવી લીધા હતા. જેની તપાસ કરતા પોલીસને મહત્વના સીસીટીવી ફૂટેજ મળી આવ્યા હતા. જેના આધારે આરોપીનો પીછો કરતા ખમાસા ચાર રસ્તા પાસેથી તેને ઝડપી લેવામાં આવ્યો અને 10.58 લાખ નો મુદ્દામાલ કબજે કર્યો.
આરોપી ઓનલાઈન ગેમમાં રૂપિયા હારી ગયો
ઝડપાયેલ આરોપી રાહીલ મનસુરીની પૂછપરછ કરતા હકીકત સામે આવી કે આરોપી છેલ્લા કેટલાક સમયથી ઓનલાઈન લુડો રમતો હતો. જે માટે ઘણી મોટી રકમ હારી ગયો છે અને તે માટે આ ચીલ ઝડપ કરી હતી. સાથે જ ચીલ ઝડપ કર્યા બાદ પણ 50000 રૂપિયા તેમાંથી હારી ગયો છે. સાથે જ આરોપીની તપાસ કરતા અગાઉ વાહનચોરી અને ચેન સ્નેચિંગ જેવા સાત ગુનાઓ તેની વિરુદ્ધ નોંધાયેલા છે. જેથી પોલીસે તેની વધુ તપાસ હાથ ધરી છે.
આરોપી ગુનાહિત ઈતિહાસ
આરોપીને પૂછપરછ માં હકીકત સામે આવી કે, ઓનલાઇન લુડો રમતા રમતા ઘણા રૂપિયા હારી ચૂક્યો છે. જોકે તેની આ ટેવ પૂરી કરવા અગાઉ પણ તે ગુના આચરી ચૂક્યો છે. અને જેલવાસ પણ ભોગવી ચુક્યો છે. ત્યારે આરોપીને પૂછપરછમાં અન્ય કોઈ ગુનાની કબુલાત કે હકીકત સામે આવે છે કે કેમ તે મામલે પોલીસે વધુ તપાસ હાથ ધરી છે.
