ખુલ્લેઆમ દાદાગીરી / ભોજનમાં કોકરોચ નીકળતા વાલીએ કરી ફરિયાદ, તો વડોદરાની શાળાએ બાળકોનું LC જ સીધું ઘરે મોકલાવ્યું

 

• અમેરિકન સ્કૂલ ઓફ બરોડાની સામે આવી દાદાગીરી
• ખાવામાંથી વંદો નિકળતા વાલીએ ટકોર કરી હતી
• ધોરણ-7ના એક વિદ્યાર્થી અને નર્સરીની બાળકીનું LC ઘરે મોકલાવ્યું

વડોદરા શહેરના આજવા-નિમેટા રોડ પર આવેલી અમેરિકન સ્કૂલ ઓફ બરોડાની દાદાગીરી સામે આવી છે. સ્કૂલે કોઈ પણ પ્રકારની નોટિસ વિના નર્સરીની બાળકી અને ધોરણ-7ના એક વિદ્યાર્થી એમ કુલ 2 વિદ્યાર્થીઓના એલસી આપી દીધા હોવાનું સામે આવ્યું છે. જે બાદ વડોદરા વાલી એસોસિએશન દ્વારા સ્કૂલની બહાર વિરોધ નોંધાવવામાં આવ્યો. આ ઉપરાંત વાલીઓએ આ અંગે જિલ્લા શિક્ષણાધિકારીની કચેરીએ પણ ફરિયાદ કરી છે.

વાલી એસોસિએશને કર્યા સૂત્રોચ્ચાર

આજે વડોદરા વાલી એસોસિએશને સ્કૂલની બહાર વિરોધ નોંધાવ્યો હતો. વાલી એસોસિએશને 'અમેરિકન સ્કૂલ ઓફ બરોડાની માન્યતા રદ્દ કરો'ના સૂત્રોચ્ચાર કર્યા હતા. વાલીઓનું કહેવું છે કે, આ મામલે  DEOને ફરિયાદ કરાઈ છે છતાં કોઈ કાર્યવાહી કરવામાં આવી નથી. 

સ્કૂલે કુરિયરમાં LC મોકલ્યા

આ અંગે એવું કહેવાઈ રહ્યું છે કે, વાલીઓએ શાળાના ખરાબ ભોજને અંગે કોમેન્ટ કરી હતી. વાલીઓએ ભોજનાંથી વંદો નિકળતા ટકોર કરી હતી. વાલીએ કોમેન્ટ કરતા કોઈ પણ પ્રકારની નોટિસ વગર નર્સરીની બાળકી અને ધોરણ-7ના એક વિદ્યાર્થીનું કુરિયર થકી LC ઘરે મોકલી દેવામાં આવ્યું છે. આ ઘટનાને લઈને વાલીઓ અને વિદ્યાર્થીઓ હચમચી ઉઠ્યા હતા.

DEOને ફરિયાદ છતા નથી થઈ કાર્યવાહી

વડોદરા વાલી એસોસિએશનના પ્રમુખ કિશોર પીલ્લાઈએ જણાવ્યું કે,  ધોરણ 7 અને નર્સરીમાં અભ્યાસ કરતાં 2 વિદ્યાર્થીઓને કુરિયર થકી એલસી મોકલી હોવાનો કિસ્સો પ્રકાશમાં આવ્યો છે. આ મામલે ડીઈઓને જાણ કરવામા આવી છે, છતાં કોઈ કાર્યવાહી કરવામાં આવી નથી. 

સળગતા સવાલો

ખાનગી શાળાઓને કોઈ જાતનો ડર નથી રહ્યો?
શાળાના ખરાબ ભોજન અંગે પણ કોમેન્ટ ન કરવી?
વાસ્તવિકતા બતાવી એટલે LC પકડાવી દેવાનું?
શું વાલીઓને સાચી વાત કહેવાનો અધિકાર પણ નથી?
વિદ્યાર્થીઓ ઉપર આવા વર્તાવની કેવી ઘેરી અસર પડશે?
વિદ્યાર્થીઓનું એડમિશન વગર કારણે કેન્સલ કરવાનો હક કોણે આપ્યો?
શાળા પોતાની જાતને સરકારથી પણ ઉપર સમજે છે?