- વંદે મેટ્રો ટ્રેન હાઇડ્રોજન બેઝ્ડ સ્વદેશી ટ્રેન હશે.
- વંદે મેટ્રો 125 થી 130 કિમીની ઝડપે દોડશે.
- તેની ડિઝાઇન મુંબઈ સબ-અર્બનની તર્જ પર તૈયાર કરવામાં આવી રહી છે.
દેશમાં વંદે ભારત એક્સપ્રેસ ટ્રેનની સફળતાને કારણે કેન્દ્ર સરકાર હવે વંદે મેટ્રો ટ્રેનને ટૂંક સમયમાં પાટા પર લાવવાની કવાયતમાં લાગેલી છે. લોકો વંદે ભારત ટ્રેનની ડિઝાઇન, સ્પીડ અને સેવાઓની પ્રશંસા કરી રહ્યા છે અને દરેક રાજ્યમાં તેને ચલાવવાની માંગ વધી રહી છે. કેન્દ્ર સરકારે વંદે ભારતની તર્જ પર વંદે મેટ્રો ટ્રેન શરૂ કરવાની જાહેરાત કરી દીધી છે. આજે રેલવે મંત્રી અશ્વિની વૈષ્ણવે વંદે મેટ્રો ટ્રેનને લઈને કેટલીક નવી માહિતી આપી છે.
ન્યૂઝ એજન્સી ANI સાથે વાત કરતા અશ્વિની વૈષ્ણવે કહ્યું કે વંદે મેટ્રોનું ફોર્મેટ વંદે ભારત એક્સપ્રેસથી અલગ હશે. તે 100 કિમીથી ઓછા અંતરના શહેરો વચ્ચે ચલાવવામાં આવશે. સેમી હાઇ સ્પીડ વંદે મેટ્રો ટ્રેન દિવસ દરમિયાન બંને શહેરો વચ્ચે ઘણી ટ્રિપ કરશે. વંદે મેટ્રો ડિસેમ્બરની આસપાસ તૈયાર થઈ જશે. રેલ્વે મંત્રીએ કહ્યું કે સરકારનો હેતુ આરામદાયક અને સસ્તી હાઈ સ્પીડ ટ્રેન ચલાવવાનો છે.
મેટ્રો શહેરોના આસપાસના શહેરોને જોડવામાં આવશે
નોંધનીય છે કે, ફેબ્રુઆરી 2023 માં રેલ્વે મંત્રી અશ્વિની વૈષ્ણવે કહ્યું હતું કે વડા પ્રધાન નરેન્દ્ર મોદીએ રેલવે મંત્રાલયને વંદે ભારત ટ્રેનની જેમ વંદે મેટ્રો લાવવા માટે કહ્યું છે. વધુમાં રેલવે મંત્રીએ કહ્યું હતું કે વંદે મેટ્રો ટ્રેન હાઇડ્રોજન આધારિત સ્વદેશી ટ્રેન હશે, જેને ભારતીય એન્જિનિયરો દ્વારા ડિઝાઇન કરવામાં આવી રહી છે. વંદે મેટ્રો 125 થી 130 કિમીની ઝડપે દોડશે. તેની ડિઝાઇન મુંબઈ સબ-અર્બનની તર્જ પર તૈયાર કરવામાં આવી રહી છે.
થશે ઘણો ફાયદો
વંદે મેટ્રો ટ્રેન દોડવાથી મેટ્રો શહેરોની આસપાસના શહેરોની કનેક્ટિવિટી વધશે. વંદે મેટ્રો ટ્રેન એવા લોકો માટે ખૂબ જ ફાયદાકારક સાબિત થશે. જેઓ આ શહેરોના છે, અને તેઓ હવે મેટ્રોમાં આવે છે, રહે છે તથા અઠવાડિયાના અંતે ઘરે જાય છે. નોકરીયાત લોકોની સાથે વિદ્યાર્થીઓને પણ ફાયદો થશે.
દેશમાં ચાલી રહી છે 14 વંદે ભારત એક્સપ્રેસ
હાલમાં દેશમાં 14 વંદે ભારત એક્સપ્રેસ ટ્રેનો દોડી રહી છે. મુસાફરોને તે ખૂબ જ પસંદ આવી રહી છે. વંદે ભારત ટ્રેનની મહત્તમ ઝડપ 180 કિમી છે. તેના ટ્રાયલ દરમિયાન 150 કિમી પ્રતિ કલાકની ઝડપે દોડવામાં આવી હતી. જોકે અત્યારે તે એટલી ઝડપે ચાલી રહી નથી. બુધવારે જયપુરથી દિલ્હી જતી વખતે વંદે ભારત 110 કિમી પ્રતિ કલાકની ઝડપે દોડાવવામાં આવી હતી.
