- યૂનિફોર્મ સિવિલ કોડને લઈને સરકારની તૈયારી
- આવનારા મોનસૂન સત્રમાં બિલની થઈ શકે છે રજૂઆત
- સંસદીય સ્થાયી સમિતિએ પણ આ મુદે બેઠક ગોઠવી
UCC- યૂનિફોર્મ સિવિલ કોડને લઈને કેન્દ્ર સરકાર સંસદમાં બિલ લાવવાની તૈયારીમાં છે. કહેવામાં આવી રહ્યું છે કે સરકાર સંસદનાં આવનારા મોનસૂન સત્ર કે જે 17 જૂલાઈથી પ્રારંભ થઈ રહ્યો છે ત્યારે UCCને લઈને બિલ લાવી શકે છે. લૉ કમિશને UCCને લઈને સામાન્ય નાગરિકની સલાહ માંગી છે. તો સંસદીય સ્થાયી સમિતિએ પણ યૂસીસીને લઈને 3 જૂલાઈનાં મીટિંગ ગોઠવી છે.
5 ઑગસ્ટની તારીખ અંગે બીજેપીનો સ્ટેન્ડ
PM મોદીએ યૂસીસીને લઈને ભોપાલમાં જે નિવેદન આપ્યું તેને જોઈને લાગી રહ્યું છે કે ટૂંક સમયમાં જ UCC અંગે કોઈ મોટી જાહેરાત કરવામાં આવી શકે છે. કેન્દ્ર સરકાર અને ભાજપનાં સૂત્રોનું માનીએ તો સરકાર આવનારા મોનસૂન સત્રમાં યૂસીસીને લઈને સંસદમાં બિલ લાવવાની તૈયારીમાં છે ત્યારે 5 ઓગસ્ટની તારીખ અને દેશનાં મોટા નિર્ણયોને લઈને ભાજપનાં સ્ટેન્ડ- બંનેને જોઈને એવો અંદાજો લગાવી શકાય કે મોનસૂન સત્ર દરમિયાન આ બિલની રજૂઆત પણ 5 ઓગસ્ટનાં રોજ જ થઈ શકે છે. અત્રે ઉલ્લેખનીય છે કે જમ્મૂ-કાશ્મીરમાં 370ની કલમ દૂર કરવાનાં બિલની રજૂઆત અને રામમંદિરનાં ભૂમિપૂજનની પ્રક્રિયા- આ બંને મોટા કાર્યો માટે સરકારે 5 ઑગસ્ટનો દિવસ જ પસંદ કર્યો હતો ત્યારે શું UCC માટે પણ 5 ઑગસ્ટની તારીખ ફિક્સ થઈ શકે છે?
5 ઑગસ્ટની તારીખ જ શા માટે?
UCC સંબંધિત બિલને લઈને 5 ઑગસ્ટ તારીખને જ શા માટે મહત્વ આપવામાં આવી શકે છે? થોડા વર્ષો પહેલાં દેશનાં મહત્વનાં મોટા નિર્ણયો આ જ તારીખે લેવામાં આવ્યાં છે. ભાજપ આટલા વર્ષોથી ચૂંટણીમાં જે મુખ્ય 3 મુદાઓને લઈને જનતાનો વિશ્વાસ જીતે છે તેમાં છે રામમંદિર, જમ્મૂ-કાશ્મીરમાં 370ની કલમ અને ત્રીજું છે UCC. ભાજપે આ ત્રણ વાયદાઓમાંથી મુખ્ય 2 વાયદાઓ પૂર્ણ કર્યાં અને આ બંને માટે 5 ઑગસ્ટની જ તારીખ પસંદ કરી હતી. તેથી શક્ય છે કે ભાજપ પોતાનો ત્રીજો વાયદો પૂર્ણ કરવા પણ 5 ઑગસ્ટની તારીખ પસંદ કરશે.
3જી જુલાઈએ સંસદીય સમિતિની બેઠક
મોદી સરકાર સંસદના ચોમાસુ સત્રમાં UCC લાવવાની તૈયારી કરી રહી છે. આ બિલ સંસદીય સમિતિને પણ મોકલી શકાય છે. 2024ની ચૂંટણી પહેલા તેને ભાજપનો માસ્ટરસ્ટ્રોક કહેવામાં આવી રહ્યો છે. જણાવી દઈએ કે યુનિફોર્મ સિવિલ કોડને લઈને 3 જુલાઈએ બપોરે 3 વાગ્યે સંસદીય સમિતિની બેઠક બોલાવવામાં આવી છે. આ બેઠકમાં સાંસદોનો અભિપ્રાય જાણવામાં આવશે. આ બેઠકમાં કાયદા પંચ ઉપરાંત કાયદાકીય નિષ્ણાતો પણ હાજર રહેશે.
યૂનિફોર્મ સિવિલ કોડ શું છે?
યૂનિફોર્મ સિવિલ કોડમાં તમામ ધર્મો માટે એક જ કાયદો હશે. દરેક ધર્મનો પોતાનો વ્યક્તિગત કાયદો છે, જેમાં લગ્ન, છૂટાછેડા અને મિલકતો માટેના પોતાના કાયદા છે. યૂસીસીના અમલીકરણ સાથે, તમામ ધર્મોમાં રહેતા લોકોના કેસ માત્ર નાગરિક નિયમો દ્વારા જ હાથ ધરવામાં આવશે.
