પ્રશંસનીય / 'મરજી વિરૃદ્ધ છોકરીઓને ન અડાય તેવું છોકરાઓને બાળપણથી શીખવાડો- HCની વાલીઓને ટકોર

• સમાજમાં વધી રહેલા યૌનાચારને લઈને કેરળ હાઈકોર્ટ ચિંતામાં
• વાલીઓને કરી ટકોર- બાળપણથી બાળકોને ભણાવો શિષ્ટાચારના પાઠ
• બાળકોને સ્કૂલોમાં અને ઘેર જ સંસ્કાર આપવા જોઈએ 

સમાજમાં વધી રહેલા યૌનાચારને લઈને કેરળ હાઈકોર્ટ ચિંતામાં છે અને હાઈકોર્ટની આ ચિંતા છોકરાઓને લઈને છે. આજકાલ કિશોરોમાં યૌન હિંસા વધી રહી છે અને તેથી હાઈકોર્ટે વાલીઓને એક મોટી શિખામણ આપી છે જે ધ્યાનમાં લેવા છે. 

મંજૂરી વગર છોકરીઓને ન સ્પર્શાય તેવું છોકરાઓને બાળપણથી શીખવાડો 
કેરળ હાઈકોર્ટે એક કેસની સુનાવણી કરતા મહત્વની ટીપ્પણી કરી છે. હાઈકોર્ટનું કહેવું છે કે છોકરાઓને શાળાઓમાં તથા પરિવારોમાંથી જ શીખવવું જોઈએ કે તેઓએ કોઈ છોકરી અથવા સ્ત્રીને તેની સંમતિ વિના સ્પર્શ કરવો જોઈએ નહીં. 

છોકરાઓને નિ:સ્વાર્થ અને નમ્ર વ્યક્તિ બનવાનું શીખવાડો 
સમાજમાં વધી રહેલા જાતીય સતામણીના કેસોને ધ્યાનમાં રાખીને કોર્ટે કહ્યું હતું કે, પ્રાથમિક વર્ગથી જ અભ્યાસક્રમમાં છોકરાઓને સારા વર્તન અને શિષ્ટાચારનાપાઠ સામેલ કરવા જોઈએ. તે જ સમયે, કોર્ટે એમ પણ કહ્યું હતું કે છોકરાઓએ "ના" નો અર્થ "ના" (No Means No)હોય તે પણ સમજવું અતિઆવશ્યક છે. વધુમાં કોર્ટે સમાજને વિનંતી કરી હતી કે તેઓ સ્વાર્થી અને હકદાર બનવાને બદલે નિ:સ્વાર્થ અને નમ્ર વ્યક્તિ બનવાનું શીખવે.

છોકરી કે મહિલાઓ સાથે આદર દર્શાવવો જુના જમાનાની વાત નથી 
જસ્ટિસ દેવન રામચંદ્રને કહ્યું કે પુરુષાર્થની પ્રાચીન અવધારણા બદલાઈ ગઈ છે પરંતુ જરૂરથી તેને વધુ બદલવાની જરૂર છે. સાથીદારો અને અન્ય સામાજિક પ્રભાવો દ્વારા ઉછેર કરાયેલા છોકરાઓ ઘણીવાર ખૂબ જ નાની ઉંમરેથી જ અમુક લૈંગિકવાદી રૂઢીપ્રયોગો સાથે મોટા થાય છે. કોઈ છોકરી/સ્ત્રી પ્રત્યે આદર રાખવો અને આદર દર્શાવવો એ કંઈ જૂના જમાનાની વાત નથી. ઊલટું, દરેક સમય માટે આ એક સારી વાત છે.