ગુજરાત પ્રવાસ / અમિત શાહની આજે મહત્વની બેઠક: પોતાના મત વિસ્તારના ધારાસભ્યો સાથે વિવિધ મુદ્દાઓ પર કરશે ચર્ચા, જાણો કેમ

• ગૃહમંત્રી અમિત શાહ આજે ગુજરાતની મુલાકાતે
• પોતાના સંસદીય ક્ષેત્રના ધારાસભ્યો સાથે કરશે બેઠક
• ગૃહમંત્રીની બેઠકમાં CM ભૂપેન્દ્ર પટેલ પણ હાજર રહેશે

કેન્દ્રીય ગૃહમંત્રી અમિત શાહ વધુ એક વખત ગુજરાતની મુલાકાતે આવી રહ્યાં છે. ગૃહમંત્રી અમિત શાહ આજે ગુજરાત આવશે. જ્યાં તેઓ પોતાના મત વિસ્તારના ધારાસભ્યો સાથે બેઠક કરશે. અમિત શાહની આ બેઠકમાં મુખ્યમંત્રી ભૂપેન્દ્ર પટેલ પણ હાજર રહેશે.

બેઠકમાં વિકાસના કાર્યો તેમજ લોકોના પ્રશ્નોની ચર્ચા કરાશે
ગૃહમંત્રી અમિત શાહ અને ભૂપેન્દ્ર પટેલ અમદાવાદના ઘાટલોડિયા, સાબરમતી અને નારણપુરાના ધારાસભ્યો સાથે બેઠક કરશે. તદુપરાંત આ બેઠકમાં સાણંદ, વેજલપુર, કલોલ અને ગાંધીનગર ઉત્તરના ધારાસભ્યો પણ હાજર રહેશે. આ બેઠકમાં વિકાસના કાર્યો તેમજ લોકોના પ્રશ્નોની ચર્ચા કરાશે. શહેરના સાબરમતી સ્પોર્ટ્સ કોમ્પલેક્ષ તેમજ નવા રેલ્વે સ્ટેશન અંગે પણ બેઠકમાં ચર્ચા કરાશે.

ગઇકાલે જ પ્રમુખસ્વામી મહારાજ શતાબ્દી મહોત્સવમાં હાજરી આપી હતી
ઉલ્લેખનીય છે કે, હજુ તો ગઇકાલે જ અમિત શાહે અમદાવાદના ઓગણજ ખાતે પ્રમુખસ્વામી મહારાજ શતાબ્દી મહોત્સવની મુલાકાત લીધી હતી. અમિત શાહે મહોત્સવની મુલાકાત લઈ સંતોના આશીર્વાદ લીધા હતા. અત્રે નોંધનીય છે કે, તાજેતરમાં જ ગુજરાત વિધાનસભાની ચૂંટણીના પરિણામો જાહેર થઇ ગયા છે. જેમાં ભાજપે એક રેકોર્ડ બનાવ્યો છે. ગુજરાતમાં ભાજપે 156 સીટો પર વિજય હાંસલ કરી માધવસિંહ સોલંકીનો રેકોર્ડ તોડી નાખ્યો છે.