- ૨૧ જૂન આંતરરાષ્ટ્રીય યોગ દિવસ : 'એક પૃથ્વી, એક સ્વાસ્થ્ય માટે યોગ'
- રાજયભરમાંથી અંદાજિત સવા કરોડથી વધુ લોકો ભાગ લેશે
- રાજ્યમાં ૬૦ હજારથી વધુ સ્થળો પર યોગ દિવસ ઉજવાશે
૨૧ જૂન આંતરરાષ્ટ્રીય યોગ દિવસની 'એક પૃથ્વી, એક સ્વાસ્થ્ય માટે યોગ' થીમ પર ઉજવણી થવા જઇ રહી છે. ત્યારે રાજયભરમાં થનારી આ આંતરરાષ્ટ્રીય યોગ દિવસની ઉજવણીમાં અંદાજિત સવા કરોડથી વધુ લોકો ભાગ લેવાના છે. ગુજરાત રાજ્ય યોગ બોર્ડ દ્વારા ૧૦૦ કલાકની ટ્રેનિંગ આપીને રાજ્યના ૩૩ જિલ્લાઓમાંથી ૧ લાખથી વધુ યોગ ટ્રેનર્સ તૈયાર કરવામાં આવ્યા છે. એટલું જ નહીં, રાજ્યમાં ૬૦ હજારથી વધુ સ્થળો પર આંતરરાષ્ટ્રીય યોગ દિવસની ઉજવણી કરવામાં આવશે.
વર્ષ ૨૦૧૯માં ગુજરાત રાજ્ય યોગ બોર્ડની સ્થાપના
આ મામલે ગુજરાત રાજ્ય યોગ બોર્ડ ચેરમેન શીશપાલજી રાજપૂતે કહ્યું કે, યોગ એ ભારતીય સંસ્કૃતિનો અમૂલ્ય વારસો છે, આપણા શાસ્ત્રો, વેદો, ઉપનિષદો અને પુરાણોમાં યોગનો વિસ્તૃત ઉલ્લેખ જોવા મળે છે. યોગ એક એવી પ્રક્રિયા છે જેમાં માણસ પોતાના મન, શરીર અને આત્માને એકસાથે લાવવાનો પ્રયાસ કરે છે. વડાપ્રધાન નરેન્દ્રભાઇ મોદીની પ્રેરણાથી રાજ્ય સરકાર દ્વારા યોગનો વધુમાં વધુ પ્રચાર-પ્રસાર અને લોકોમાં જાગૃતિ આવે તે માટે વર્ષ ૨૦૧૯માં ગુજરાત રાજ્ય યોગ બોર્ડની સ્થાપના કરવામાં આવી છે. હાલમાં ૫૦૦૦ જેટલા યોગ ટેનર્સ ગુજરાતમાં યોગ કેન્દ્રો ચલાવી રહ્યા છે, જેને રાજ્ય સરકાર માનદ વેતન આપે છે. આમ ૫૦૦૦ જેટલા યોગ ટેનર્સને રાજ્ય સરકાર દ્વારા રોજગારી પણ આપવામાં આવી છે.
૬૦ હજારથી વધુ સ્થળો પર આંતરરાષ્ટ્રીય યોગ દિવસની ઉજવણી
૨૧મી જૂન આંતરાષ્ટ્રીય યોગ દિવસની ઉજવણીની વાત કરતા તેમણે કહ્યું કે, રાજ્યભરમાં ૬૦ હજારથી વધુ સ્થળો પર આંતરરાષ્ટ્રીય યોગ દિવસની ઉજવણી કરવામાં આવશે. આ આંતરરાષ્ટ્રીય યોગ દિવસની ઉજવણીમાં રાજયભરમાંથી અંદાજિત સવા કરોડથી વધુ લોકો ભાગ લેવાના છે, જેમાં ગુજરાતના દરેક જિલ્લાઓ, તાલુકાઓ અને ગ્રામ્ય લેવલ પર ઉજવણી થવાની છે. અત્યાર સુધીમાં ગુજરાત રાજ્ય યોગ બોર્ડ દ્વારા ૧૦૦ કલાકની ટ્રેનિંગ આપીને રાજ્યના ૩૩ જિલ્લાઓમાંથી ૧ લાખથી વધુ યોગ ટ્રેનર્સ તૈયાર કર્યા છે. એટલું જ નહીં સુરત ખાતે ૧.૨૫ લાખથી વધુ નાગરિકો એક સાથે યોગ કરીને ગિનીઝ બુક ઓફ વર્લ્ડ રેકોર્ડ સ્થાપિત કરશે એમ તેમણે વધુમાં ઉમેર્યું હતું.
૧૦ લાખથી વધુ યોગ ટેનર્સને તૈયાર કરાશે
ગુજરાત રાજ્ય યોગ બોર્ડના આવનારા સમયના લક્ષ્યાંકની વાત કરતા શીશપાલજીએ કહ્યું કે, અમારો આવનારા સમયમાં લક્ષ્યાંક છે કે યોગને ઘર-ઘર સુધી પહોંચાડીને ૧૦ લાખથી વધુ યોગ ટેનર્સને તૈયાર કરવાનો છે. રાજ્યના મહાનગરોની દરેક સોસાયટી અને ગામડાઓમાં યોગ કેન્દ્ર ચાલું થાય એ અમારો મુખ્ય લક્ષ્યાંક છે. અમે આ વર્ષને 'યોગ વર્ષ' તરીકે ઉજવીશું.
રાજયકક્ષાનો યોગ કાર્યક્રમ સુરતમાં
શીશપાલજીએ યુવાનોને મેસેજ આપતા કહ્યું કે, યોગ આપણી સંસ્કૃતિ છે. આ દેશની જીડીપી વધારવી હોય તો દરેક યુવાનોને યોગ સાથે જોડવું ખૂબ જરૂરી છે. યોગ કરવાથી શારિરીક અને માનસિક મનોબળ વધે છે. યુવાનો વધુ કામ કરી શકે છે. આજકાલના યુવાનો તણાવથી પીડાય છે તેમજ યુવાનોમાં નાની ઉંમરે આવતા હાર્ટ અટેકના કિસ્સા જે વધી રહ્યા છે એનાથી બચવા માટે યુવાનોએ યોગ કરવું ખૂબ જરૂરી છે. યુવાનોને જીવનમાં સફળતા પ્રાપ્ત કરવા માટે યોગ સાથે જોડાવવું જરૂરી છે. યોગ દિવસની રાજયવ્યાપી ઉજવણી મુખ્યમંત્રી ભૂપેન્દ્ર પટેલ અને રમત ગમત યુવક સેવા અને સાંસ્કૃતિક પ્રવૃત્તિ વિભાગના મંત્રી હર્ષ સંઘવીના માર્ગદર્શન હેઠળ થઇ રહી છે.
