- આજે 11 એપ્રિલ એટલે કે નેશનલ પેટ્સ ડે
- વિશ્વમાં લગભગ 350 જેટલી છે ડૉગની પ્રજાતિ
- લેબરા ડૉગ હોય છે સૌથી હોશિયાર
એવું કહેવાય છે કે આ દુનિયામાં કૂતરાથી વધુ વફાદાર કોઈ નથી. ત્યારે આજે 11 એપ્રિલ એટલે કે National Pets Day છે. છેલ્લા ઘણા વર્ષથી પેટ પેરેન્ટ્સની સંખ્યામાં ઘણો વધારો થયો છે. ત્યારે હવે લોકો ડૉગની સાથે-સાથે બિલાડીને પણ પોતાના ઘરે રાખતા થઈ ગયા છે. ત્યારે આજે નેશનલ પેટ્સ ડે પર આપણે ડૉગની સંભાળ કેવી રીતે રાખવી, ડૉગને શું ખવડાવવું અને શું ન ખવડાવવું તેના વિશે એક્સપર્ટ પાસેથી વિગતવાર માહિતી જાણીશું.
પાલતુ ડૉગને સાચવવામાં કેવી કાળજી રાખવી જોઇએ?
અમદાવાદના વેટરનરી સર્જન ડો. કિશોર ટ્રાન્સડિયાએ vtvgujarati.com સાથેની વાતચીતમાં જણાવ્યું કે, ડૉગ જ્યારે નાનું હોય ત્યારે તેની સૌથી વધારે કાળજી રાખવી જોઈએ. ડૉગની 100 દિવસ (ત્રણ મહિના) સુધી ખાસ કાળજી રાખવી જોઈએ. જેમ કે વેક્સિનેશન પૂરા કરવા પડે, વજન પ્રમાણે ડીવર્મિંગ સમયસર કરાવવું પડે, ખાવા-પીવામાં ડોક્ટર જે લખી આપે તેને મેઈનટેઇન કરવું પડે. ત્રણ મહિના સુધી ડૉગની ખાસ કાળજી રાખવી જોઈએ. ઘણીવાર એવું જોવા મળે છે કે કેટલાક લોકો ડૉગને ગમે તેવી વસ્તુઓ જેમ કે ટામેટા, રોટલી, બિસ્કિટ એવી બધી વસ્તુઓ ખવડાવતા હોય છે. પરંતુ ત્રણ મહિના સુધી ડોક્ટર લખી આપે એ જ વસ્તુઓ ડૉગને ખવડાવવી જોઈએ. નહીં તો તેનું પેટ ખરાબ થઈ જાય છે. ડૉગને તીખુ, તળેલું અને ગળ્યું જરાય ન આપવું જોઈએ.
દર મહિને ડૉગને સ્પામાં લઈ જવું જોઈએ
ડો. કિશોર ટ્રાન્સડિયાએ જણાવ્યું કે, ડૉગને નવડાવવામાં પણ ખાસ ધ્યાન રાખવું જોઈએ, દર અઠવાડિયામાં તેને એક વખત નવડાવવું જોઈએ. તેના વાળમાં દરરોજ કાંસકો ફેરવવો જોઈએ. વાળની સારસંભાળ રાખવી જોઈએ. દર મહિને સ્પામાં લઈ જવું જોઈએ. સ્પામાં તેને સારી રીતે નવડાવવામાં આવે છે, તેના નખ કાપી આપવામાં આવે છે. કાન સાફ કરી આપવામાં આવે છે. જેમાં અંદાજે 1500 રૂપિયા જેટલો ખર્ચ થાય છે.
વિશ્વમાં સૌથી મોંઘી પ્રજાતિ છે 'ચાવ ચાવ'
તેમણે જણાવ્યું કે, ડૉગની કુલ 350થી વધારે પ્રજાતિ હોય છે. જેમાં સૌથી મોંઘી પ્રજાતિ 'ચાવ ચાવ' (chow chow dog) છે. જેની કિંમત 10 લાખ સુધી હોય છે. આ પ્રજાતિ સૌથી વધારે ચીનમાં જોવા મળે છે. પરંતુ હાલ આપણા દેશમાં પણ આ પ્રજાતિ જોવા મળે છે. આ ડૉગ દેખાવમાં સિંહ જેવા લાગે છે. સ્વભાવમાં પણ ગુસ્સાવાળા હોય છે. જે બાદ બુલ ડૉગનો નંબર આવે છે. જેની કિંમત 2 લાખથી 5 લાખ સુધીની હોય છે.
વિશ્વમાં કયા ડૉગ સૌથી ચતુર હોય છે?
વેટરનરી તબીબના જણાવ્યા મુજબ, વિશ્વમાં લગભગ 350 જેટલી ડૉગની પ્રજાતિ છે, જેમાં સૌથી હોશિયાર લેબરા ડૉગ હોય છે. પોલીસ વિભાગમાં આ ડૉગનો સૌથી વધુ ઉપયોગ કરે છે. તે ઘણા ચાલક હોય છે. તે થોડી ટ્રેનિંગમાં જ બધું શીખી જાય છે.
...તો ઇન્જેક્શન લેવા ફરજિયાતઃ ડો કિશોર
રાજ્ય (Gujarat) માં છેલ્લાં ઘણા દિવસથી શ્વાનના હુમલાની ઘટનાઓ સામે આવી રહી છે. આ વિશે તેઓએ જણાવ્યું કે, જો ડૉગને હડકવા વિરોધી રસી આપવામાં આવેલી હોય તો વ્યક્તિએ કોઈ રસી લેવીની જરૂર નથી. પરંતુ તો રસી આપવામાં આવી નથી કૂતરું કરડે તો 8થી 10 કલાકમાં ઇન્જેક્શન લઈ લેવું જોઈએ. તેમને 6 ઈન્જેક્શનનો કોર્સ કરવો પડે છે. જેને પોસ્ટ બાઇટ એન્ટી રેબીઝ (post bite anti rabies) કહેવામાં આવે છે. થોડા વર્ષો પહેલા સુધી હડકવાથી બચવા માટે રસીના 14 થી 16 ડોઝ આપવામાં આવતા હતા.
નાનાં બાળકોને કૂતરું કરડે, ત્યારે શું કરવું?
વેટરનરી તબીબ જણાવે છે કે, 'જો બાળકને કુતરુ કરડે છે, તો તેને ઘરે લઈ જાઓ. નળમાં પાણી ચાલુ કરો અને જ્યાં કૂતરુ કરડ્યું હોય તે જગ્યાને પાણીથી ધોઈ નાખો. તેનાથી લોહી બંધ થશે. કૂતરું કરડ્યા બાદ જે વાયરસ શરીરમાં પ્રવેશે છે તે પાણીને કારણે બહાર આવશે. થોડીવાર પછી એ જગ્યાને સાબુ અને પાણીથી ધોઈ લો. લોહીને બહાર આવવા દો. આવું 15-20 મિનિટ કરો. સ્વચ્છ કપડાથી સાફ કરો અને કોઈપણ પ્રકારનું ક્રીમ ન લગાવો. નજીકના ડૉક્ટર અથવા આરોગ્ય સંભાળ કેન્દ્રની સીધી મુલાકાત લો. ડૉક્ટર પાસેથી સારવાર લો.'
