કામગીરી ક્યારે ? / અમદાવાદમાં વરસાદ બાદ બોપલ ખાડામય ! બ્રિજ વિસ્તાર-સાઉથ બોપલમાં ખખડધજ રોડ રસ્તાથી પ્રજા ત્રાહિમામ

• અમદાવાદમાં બિસ્માર રસ્તાથી જનતા ત્રાહિમામ
• બોપલ બ્રિજ સહિત સમગ્ર વિસ્તારમાં 'ખાડારાજ'
• બોપલના તમામ માર્ગો પર ખાડાઓનું રાજ

એક તરફ અમદાવાદમાં વહીવટી તંત્ર દ્વારા વિકાસના કાર્યોનું પુરજોશથી કામ કરવામાં આવે, નવા બ્રિજો બને, હાઇરાઇઝ્ડ ઇમારતો બને, ટ્રાન્સપોર્ટેશનના નવા વિકલ્પો વિકસાવવામાં આવે પરંતુ પ્રજાના પૈસે પ્રાથમિક સુવિધા જે આપવાની હોય તેમાં તો પ્રજાએ હાલાકી વેઠવાનો જ વારો આવે છે. જી, હા ત્યારે આવુ જ જોવા મળી રહ્યુ છે બોપલમાં. બોપલમાં વરસાદી માહોલ બાદ બોપલ ખાડામાં કે ખાડામાં બોપલ તે નક્કી કરવુ મુશ્કેલ બન્યુ છે. કારણ કે એક રસ્તો એવો બાકી નથી જ્યાં ખાડા ન પડ્યા હોય.

બોપલ બ્રિજ પાસેના રસ્તા ધોવાયા 

ત્યારે વીટીવી ન્યૂઝની ટીમ પહોંચી હતી બોપલ બ્રિજ પાસેના વિસ્તારમાં.  અહીંના તમામ રસ્તાઓ પર ખાડા રાજ જોવા મળી રહ્યુ છે.  ઠેર ઠેર મોટા મોટા ખાડા પડતા અકસ્માતનો ભય સર્જાયો છે. રસ્તો ઓછો અને ગાબડા વધારે જોવા મળી રહ્યા છે. પરિણામે કોઇ પણ વાહન અહીંથી પસાર થતા મુશ્કેલી અનુભવી રહ્યા છે. વાહનચાલકોનું કહેવુ છે કે રસ્તા પર પાણી ભરાઇ જાય છે. આ રસ્તાની ખસ્તા હાલત કદાચ તંત્રને ખબર નહીં કેમ દેખાતી નથી. ફોર વ્હિલ કે ટુ વ્હિલર, તમામ વાહનચાલકોનુ કહેવુ છે કે આવવા જવામાં તકલીફ પડે છે. સ્માર્ટ સિટી જેવુ લાગતુ ન હોવાનું સ્થાનિકોએ જણાવ્યું હતું..

સાઉથ બોપલમાં એક વર્ષમાં બનેલો રસ્તો ધોવાયો

તા તરફ સાઉથ બોપલમાં પણ ખખડધજ રોડ રસ્તાથી લોકો પરેશાન થયા છે. એક જ વર્ષમાં બનેલો રોડ ધોવાયો..શહેરી વિસ્તારમાં બનેલા માર્ગોનું વરસાદને કારણે ધોવાણ થયું છે. શહેરના સાઉથ બોપલ વિસ્તારમાં મોટેભાગના માર્ગો પર ખાડાઓનું સામ્રાજ્ય જોવા મળી રહ્યું છે.સાઉથ બોપલમાં દર અડધા ફૂટે ખાડો જોવા મળી રહ્યો છે. એક તરફ પ્રિમોન્સૂન કામગીરી પાછળ લાખો રૂપિયા ખર્ચવામાં આવે છે તો બીજી તરફ સ્થિતિ કેવી છે તેનો આ બોલતો પુરાવો બોપલમાં જોવા મળી રહ્યો છે. સમયસર વેરો ભરવા છતાં પણ તંત્ર નાગરિકોને પ્રાથમિક જરૂરિયાતો પુરી પાડવામાં ઉણુ ઉતર્યુ છે. ત્યારે હવે જોવુ એ રહ્યુ છે રોડ રસ્તાના રિપેરીંગની કામગીરી ક્યારે કરવામાં આવશે. ક્યારે આવા ભ્રષ્ટકોન્ટ્રાક્ટરો સામે લાલ આંખ કરવામાં આવશે તે જોવુ રહ્યું.