દુર્ઘટના / લિફ્ટ ન આવી પણ દરવાજા ખૂલી ગયા અને પછી... યુવકના દર્દનાક મૃત્યુથી ચકચાર

• રાજસ્થાનના જયપુરમાં એક દર્દનાક અકસ્માતથી લોકો હચમચી ગયા
• એપાર્ટમેન્ટમાં બિલ્ડિંગના 11મા માળેથી લિફ્ટની શાફ્ટમાં પડી જતાં યુવકનું મોત 
• દરવાજો ખૂલ્યો, પણ લિફ્ટ એ ફ્લોર પર ન આવી અને યુવકને મોત મળ્યું

રાજસ્થાનના જયપુરમાં એક દર્દનાક અકસ્માતથી લોકો હચમચી ગયા હતા. અહીંના એક એપાર્ટમેન્ટમાં બિલ્ડિંગના 11મા માળેથી લિફ્ટની શાફ્ટમાં પડી જતાં 20 વર્ષીય યુવકનું મોત થયું હતું. પ્રાથમિક વિગતો મુજબ યુવક ઉત્તર પ્રદેશનો રહેવાસી હતો. આ તરફ સ્થાનિક પોલીસે પોસ્ટમોર્ટમ કરાવી લાશને સ્વજનોને સોંપી હતી.

જયપુરના માઈ હવેલી એપાર્ટમેન્ટના 11મા માળે આવેલા ફ્લેટમાં મૂળ યુપીના વારાણસીનો રહેવાસી કુશાગ્ર મિશ્રા તેના મિત્રો સાથે રહેતો હતો. આ તરફ રવિવારે રાત્રે તેણે લિફ્ટનું બટન દબાવ્યું. દરવાજો ખૂલ્યો, પણ લિફ્ટ એ ફ્લોર પર ન આવી. આ પછી કુશાગ્રે ધ્યાન ન આપ્યું અને લિફ્ટની અંદર પગ મૂક્યો. જેના કારણે તે લિફ્ટની શાફ્ટમાં પડી ગયો હતો. 

વિગતો મુજબ મૃતક મણિપાલ યુનિવર્સિટીમાંથી કોમ્પ્યુટર સાયન્સનો અભ્યાસ કરતો હતો. સમાજના લોકોએ આ દર્દનાક ઘટનાની માહિતી પોલીસને આપી હતી. રહેવાસીઓએ બિલ્ડર પર બેદરકારીનો આરોપ લગાવ્યો છે. યુવાનને તાત્કાલિક નજીકની હોસ્પિટલમાં ખસેડવામાં આવ્યો હતો. ત્યાંથી તેને સવાઈ માનસિંહ હોસ્પિટલમાં રીફર કરવામાં આવ્યો હતો. અહીં સારવાર દરમ્યાન તેમનું મોત થયું હતું.

શું કહ્યું પોલીસે ? 

સમગ્ર ઘટનાને લઈ યુભાંકરોટા પોલીસ સ્ટેશનના ઈન્ચાર્જ રવિન્દ્ર પ્રતાપે જણાવ્યું કે, લિફ્ટની શાફ્ટમાં પડી જવાને કારણે યુવકનું મોત થયું છે. તેનું પોસ્ટમોર્ટમ કરાવ્યા બાદ મૃતદેહ સંબંધીઓને સોંપવામાં આવ્યો છે. કુશાગ્ર મિશ્રાના મોતની માહિતી મળતા જ પરિવારમાં શોકનો માહોલ છવાયો હતો. પરિવારના સભ્યોની હાલત ખરાબ છે.