- પાકિસ્તાનમાં ચૂંટણી પરિણામો આવ્યા બાદ લોકો રસ્તા પર ઉતરી આવ્યા હતા.
- રાવલપિંડી ડિવિઝનના કમિશનરે પોતાના પદ પરથી રાજીનામું આપી દીધું.
- કહ્યું, અપક્ષ ઉમેદવારોને હરાવવા માટે નકલી સ્ટેમ્પનો ઉપયોગ કરવામાં આવ્યો.
પાકિસ્તાન કોઈને કોઈ કારણોસર વિશ્વમાં ચર્ચામાં રહે છે. એવામાં 8 ફેબ્રુઆરીએ ચૂંટણીના પરિણામો આવ્યા બાદ પાકિસ્તાનમાં લોકો રસ્તા પર ઉતરી આવ્યા છે. હેરાફેરીના આરોપો વચ્ચે રાવલપિંડી ડિવિઝનના કમિશનરે પોતાના પદ પરથી રાજીનામું આપીને મોટો ખુલાસો કર્યો છે. તેમણે કહ્યું કે ઈમરાન ખાન દ્વારા સમર્થિત અપક્ષ ઉમેદવારોને હરાવવા માટે તેમની દેખરેખ હેઠળ પરિણામો બદલવામાં આવ્યા હતા. કમિશનરે સ્વીકાર્યું છે કે રાવલપિંડીમાં પીએમએલ-એનને 13 બેઠકો જીતવામાં મદદ કરવા માટે ચૂંટણીઓમાં રમત રમી હતી.
સુપ્રીમ કોર્ટના ન્યાયાધીશો પર પણ હેરાફેરીનો આરોપ છે
પાકિસ્તાની મીડિયા અનુસાર, કમિશ્નર લિયાકત અલી ચથાએ રાવલપિંડી ક્રિકેટ સ્ટેડિયમની બહાર કહ્યું, હું મારી ભૂલની જવાબદારી લઉં છું. આ કામમાં મુખ્ય ચૂંટણી કમિશનર અને સુપ્રીમ કોર્ટના ટોચના જજ પણ સામેલ હતા. 70 થી 80 હજાર મતોથી આગળ રહેલા અપક્ષ ઉમેદવારોને હરાવવા માટે નકલી સ્ટેમ્પનો ઉપયોગ કરવામાં આવ્યો હતો. તેમણે કહ્યું કે, હેરાફેરીની જવાબદારી લેતા હું મારા પદ પરથી રાજીનામું આપી રહ્યો છું. તેમણે પંજાબના ગવર્નર હાજી ગુલામ અલી અને વચગાળાના મુખ્ય પ્રધાન મોહસિન નકવીને પત્ર લખીને રાજીનામું આપ્યું હતું.
ચૂંટણી દરમિયાન અને પરિણામ આવે ત્યાં સુધી પ્રક્રિયામાં થયેલી ગેરરીતિઓ વિશે પૂછવામાં આવતાં તેમણે કહ્યું કે, આ બહુ નાનો શબ્દ છે, એમ કહી શકીએ છીએ કે આમ કરીને દેશની પીઠમાં ચાકુ મારવામાં આવ્યું છે, આ કારણે મને ઊંઘ પણ ન આવી. મેં કરેલા અન્યાયની સજા મને મળવી જોઈએ. તેમજ જે લોકો આ કામમાં સામેલ હતા તેમને પણ સજા થવી જોઈએ. રાવલપિંડી સ્ટેડિયમમાં પ્રેસ કોન્ફરન્સ કરતા પહેલા ચત્તાએ કહ્યું કે તે એટલા દબાણમાં હતો કે તેણે આત્મહત્યા કરવાનો નિર્ણય લીધો. પરંતુ પછી તેણે જનતા સમક્ષ જવાનું નક્કી કર્યું.
તેમણે કહ્યું, હું નોકરિયાતોને વિનંતી કરીશ કે આ નેતાઓ માટે કોઈ ખોટું કામ ન કરે. ચથાના દાવા બાદ પાકિસ્તાનના ચૂંટણી પંચે કહ્યું કે આ તમામ આરોપો સંપૂર્ણપણે ખોટા છે. પંચે જણાવ્યું હતું કે, ચૂંટણી પરિણામોમાં કોઈ ફેરફાર કરવા માટે કોઈ અધિકારીને કહેવામાં આવ્યું નથી. કોઈપણ વિભાગના કમિશનરે રિટર્નિંગ ઓફિસર અથવા પ્રિસાઇડિંગ ઓફિસરને ચૂંટણી પરિણામો અથવા ચૂંટણી પ્રક્રિયા સાથે ચેડાં કરવા સૂચના આપી ન હતી. ચૂંટણી પંચ ટૂંક સમયમાં આ મામલે તપાસ હાથ ધરશે.
વધુ વાંચો: શું છે Bharat Mart પ્રોજેક્ટ? જેનો UAEમાં શિલાન્યાસ થતાં જ ચીન ટેન્શનમાં આવી ગયું!
પંજાબના કાર્યકારી મુખ્યમંત્રી મોહસિન નકવીએ પણ ચથાના દાવાઓની નિષ્પક્ષ તપાસના આદેશ આપ્યા છે. તેમણે કહ્યું કે આ માટે ઉચ્ચ સ્તરીય સમિતિની રચના કરવામાં આવશે. જણાવી દઈએ કે પાકિસ્તાનમાં યોજાયેલી સામાન્ય ચૂંટણીમાં ઈમરાન ખાનની પાર્ટી સૌથી મોટી પાર્ટી બનીને સામે આવી છે. જો કે ચૂંટણી પહેલા જ તેમની પાર્ટી પર પ્રતિબંધ લગાવી દેવામાં આવ્યો હતો. આવી સ્થિતિમાં તેમના સમર્થક ઉમેદવારોએ અપક્ષ તરીકે ચૂંટણી લડી હતી. ઈમરાન ખાન હાલ જેલમાં છે. એવા પણ અહેવાલો છે કે તેઓ ISI સાથે વાત કરી ચૂક્યા છે અને વડાપ્રધાન બનવાની રેસમાં સામેલ થઈ ગયા છે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
