ન્યાયિક / ગર્ભવતી સગીરાના હિતમાં હાઈકોર્ટનો ચુકાદો, 24 અઠવાડિયાના ગર્ભપાતની મંજૂરી, બાળકને લઈને કરી મોટી વાત

• કેરળ હાઈકોર્ટે 15 વર્ષીય સગીરાના ગર્ભપાતની મંજૂરી આપી
• કેરળની સગીરા છે 24 અઠવાડિયાની ગર્ભવતી
• જન્મ સમયે બાળક જીવિત હોય આપો સારામાં સારી મેડિકલ સારવાર 

કેરળ હાઈકોર્ટે ગર્ભવતી સગીરાના હિતામાં એક મોટો ચુકાદો જાહેર કરતા તેને ગર્ભપાતની મંજૂરી આપી દીધી છે. કેરળની સગીરા હાલમાં 24 અઠવાડિયાનો ગર્ભ ધરાવે છે, મેડિકલ ટર્મિનેશન ઓફ પ્રેગનન્સી એક્ટ અનુસાર 24 અઠવાડિયા પછીના ગર્ભપાતની મંજૂરી નથી તેમ છતાં પણ હાઈકોર્ટે સગીરાના હિતમાં આવો નિર્ણય લીધો છે. એક બાજુ દિલ્હી હાઈકોર્ટે અવિવાહિત ગર્ભવતી મહિલાને ગર્ભપાતની મંજૂરી આપવાનો ઈન્કાર કરી દીધો છે તો બીજી બાજુ કેરળ હાઈકોર્ટે 24 અઠવાડિયાની ગર્ભવતી સગીરાને ગર્ભપાતની મંજૂરી આપી દીધી છે. 

જન્મ સમયે જીવિત હોય તો બાળકને આપો સારામાં સારી મેડિકલ સારવાર-હાઈકોર્ટ 
સગીરાની 24 અઠવાડિયાની ગર્ભાવસ્થાને સમાપ્ત કરવાની મંજૂરી આપતા કેરળ હાઈકોર્ટે રાજ્ય સરકારને એક મેડિકલ ટીમની રચના કરવાનો આદેશ આપ્યો છે. જસ્ટિસ વી જી અરુણે 15 વર્ષીય સગીરાની અરજી પર વિચાર કરતાં કહ્યું હતું કે, "જો બાળક જન્મ સમયે જીવિત હોય તો" હોસ્પિટલ એ સુનિશ્ચિત કરશે કે બાળકને શ્રેષ્ઠ તબીબી સારવાર આપવામાં આવે.

સગીરા સંભાળ રાખવા ન માગતી હોય તો બાળકની જવાબદારી રાજ્યની 
જસ્ટિસે એવું કહ્યું કે જો સગીરા બાળકની જવાબદારી સ્વીકારવા તૈયાર ન હોય તો રાજ્ય અને તેની એજન્સીઓ સંપૂર્ણ જવાબદારી સંભાળશે અને બાળકને તબીબી સહાય અને સુવિધાઓ પ્રદાન કરશે. તેમણે કહ્યું કે સરકારી હોસ્પિટલમાં સગીરાનો ગર્ભપાત કરવો પડશે. 

સગીરાના હિતમાં ચુકાદો આપવો જરુરી- જસ્ટિસ 
જસ્ટિસે કહ્યું કે અઘરા સવાલ પર અનેક વાર મનોમંથન કર્યા બાદ મને કાયદાને વળગી રહેવાને બદલે સગીરાના હિતમાં ચુકાદો આપવાનું જરુરી લાગે છે. મેડિકલ ટર્મિનેશન ઓફ પ્રેગનેન્સી એક્ટ, 1971માં 24 અઠવાડિયાની બાહ્ય મર્યાદા પ્રદાન કરવામાં આવી છે, જે પછી ગર્ભપાત કરવાની મંજૂરી નથી.

દિલ્હી હાઈકોર્ટે અવિવાહીત ગર્ભવતી મહિલાને ગર્ભપાતને મંજૂરી ન આપી
ઉલ્લેખનીય છે કે ગઈકાલે દિલ્હી હાઈકોર્ટ અવિવાહીત ગર્ભવતી મહિલાને ગર્ભપાતની મંજૂરી આપવાનો ઈન્કાર કરી દીધો છે. અપરણિત ગર્ભવતી મહિલા હાલમાં 24 અઠવાડિયાનો ગર્ભ ધરાવે છે પરંતુ મેડિકલ ટર્મિનેશન ઓફ પ્રેગનન્સી એક્ટ અનુસાર 24 અઠવાડિયા પછીના ગર્ભપાતની મંજૂરી નથી.