OMG / દર બે કલાકે બધું જ ભૂલી જાય છે આ છોકરી! જાતે જ રીસેટ થઈ જાય છે મેમરી

ઈલિનોઈસની 16 વર્ષની રિલે હોર્નર દર બે કલાકે બધું ભૂલી જાય છે અને તેને દરેક દિવસ 11 જૂન 2019 હોય તેવું જ લાગે છે. રિલેની યાદશક્તિ 11 જૂનમાં જ અટકી ગઈ છે. મગજમાં થયેલી એક ગંભીર ઈજાને કારણે તેની મેમરી દર બે કલાકે ફરીથી સેટ થાય છે અને તેને લાગે છે કે આજે પણ 11 જૂનનો જ દિવસ છે. આ એ જ અનલકી તારીખ છે, જ્યારે તેને માથામાં ગંભીર ઈજા થઈ હતી. આ અકસ્માત બાદ પરિવાર સાથે રહેતી રિલે હોર્નરનું જીવન જાણે અટકી જ ગયું છે. 

રિપોર્ટ અનુસાર, 11 જૂને એક કાર્યક્રમ દરમિયાન નૃત્ય કરતી વખતે કોઈનાથી ભૂલથી રિલેના માથા પર લાત લાગી ગઈ હતી, જેના કારણે તેને મગજમાં ગંભીર ઈજા થઈ હતી. રિલેને હવે કંઈ પણ યાદ નથી રહેતું. તે આજે ક્યો દિવસ છે તે પણ ભૂલી જાય છે. થોડાં કલાકો પહેલા તેણે જે કર્યું હોય તે પણ રિલે ભૂલી જાય છે. 

પોતાની આ વિચિત્ર મજબૂરી અંગે રિલેએ કહ્યું કે, કેલેન્ડર મારા દરવાજા પર જ લટકી રહ્યું છે, જેના પર રોજના દિવસને માર્ક કરવામાં આવે છે, જેની મદદથી હું જાણી શકું કે આજે કયો દિવસ છે. સામાન્ય લોકો મારી સ્થિતિને સમજી શકતા નથી. 

રિલેની માનસિક પરિસ્થિતિ વર્ષ 1993માં આવેલી ફિલ્મ 'ગ્રાઉન્ડહોગ' જેવી જ બની ગઈ છે. આ ફિલ્મમાં બિલ મુર્રે અને એન્ડી મેકડૉવેલ અભિનેતા હતાં. આ ફિલ્મમાં મુર્રેનું પાત્ર દરરોજ કોઈ એક ચોક્કસ દિવસ જીવે છે તેવું દર્શાવાયું છે. 

રિલેની આ વિચિત્ર સ્થિતિ અંગે ડૉક્ટરો પણ આશ્ચર્યચકિત છે. રિલે અને તેના માતાપિતા આ રોગ પાછળનું અસલી કારણ જાણવા માગે છે, પરંતુ ડોકટરો તેમને કંઈ કહી શક્યા નથી. તેની માતા સારાહ હોર્નરે કહ્યું કે, ડોકટરો કહે છે કે બધું સારું છે, મેડિકલની દ્રષ્ટિએ કોઈ સમસ્યા નથી. 

એમઆરઆઈ અને સીટી સ્કેનમાં પણ ડૉક્ટરોને કોઈ સમસ્યા દેખાતી નથી. રિલેનું મગજ સંપૂર્ણ રીતે ઠીક છે અને યોગ્ય રીતે કામ પણ કરે છે. છતાં પણ રિલેને 11 જૂન પછીનું કંઇ પણ યાદ નથી રહેતું. રિલેને તેના રોજિંદા કાર્યો માટે પણ નોટબુકમાં બધું લખવું પડે છે. ઉપરાંત તે ફોનમાં બધા ફોટો પાડી લે છે, જેથી બીજા દિવસે ફોટો જોઈને તે બધું યાદ કરી શકે.