ક્રાઈમ / દિવસે ફુગ્ગા ફુલાવી રેકી, રાત્રે ચડ્ડી બનિયાન પહેરી 50 કરતાં વધારે ઘરફોડ ચોરી, સુરત ક્રાઇમ બ્રાન્ચે 2ને ઝડપ્યા

• સુરત પોલીસે ચડ્ડી બનીયાનધારી ગેંગના આરોપીઓની ધરપકડ કરી
• બાતમીની જગ્યા પર સુરત ક્રાઈમ બ્રાન્ચે વોચ ગોઠવી હતી
• ગ્રીલ કટર, પકડ, લોખંડનું પાનું, ગિલોલ સહિતનો મુદ્દામાલ જપ્ત કરાયો

સુરત ક્રાઈમ બ્રાન્ચને અલગ અલગ રાજ્યમાં 50 કરતાં વધારે ઘરફોડ ચોરીની ઘટનાને અંજામ આપનાર ચડ્ડી બનીયાનધારી ગેંગના બે ઈસમોને પકડવામાં મોટી સફળતા મળી છે. આ બંને પાસેથી ચોરીની ઘટનાને અંજામ આપવા માટે ઉપયોગમાં આવતા અલગ અલગ પ્રકારના સાધનો તેમજ એક મોટર સાયકલ અને રૂપિયા 1 હજાર રોકડા સહિત રૂ. 56,970 રૂપિયાનો મુદ્દામાલ જપ્ત કરવામાં આવ્યો છે. 

રાત્રિના સમયે ચોરીની ઘટનાને અંજામ આપે 
સુરત પોલીસની ઘરફોડસ્કોડની ટીમને બાતમી મળી હતી કે, મધ્યપ્રદેશની ચડ્ડી બનીયાનધારી ગેંગના માણસો છેલ્લા ઘણા દિવસથી સુરતના અલગ અલગ વિસ્તારમાં રાત્રિના સમયે ચોરીની ઘટનાને અંજામ આપે છે જે આરોપી સરથાણા કેનાલ નજીક આવનાર છે. ત્યારે બાતમીની જગ્યા પર સુરત ક્રાઈમ બ્રાન્ચ પોલીસ દ્વારા વોચ ગોઠવવામાં આવી હતી. વોચ દરમિયાન રાજ પવાર અને અવિના સોલંકી નામના બે ઈસમોની ધરપકડ કરવામાં આવી છે. આરોપી પાસેથી 1,000 રોકડા તેમજ ચોરી કરવા માટે ઉપયોગમાં લેવામાં આવતું ગ્રીલ કટર, પકડ, લોખંડનું પાનું અને લાકડાની ગિલોલ સહિતનો મુદ્દામાલ જપ્ત કરવામાં આવ્યો છે. 

રેકી કરી રાત્રિના સમયે ચોરીની ઘટનાને અંજામ આપતા
આરોપીઓએ કબુલાત કરી હતી કે તેઓ સુરત રેલવે સ્ટેશનની ટિકિટ વિન્ડો નજીક આવેલ ફૂટપાથ પર જ રહેતા હતા અને તેમના પર કોઈ શંકા ન કરે એટલે દિવસ દરમિયાન તેઓ ફુગ્ગા વેચવાનું કામ કરતા હતા અને આસપાસના વિસ્તારમાં રેકી કરી રાત્રિના સમયે ચોરીની ઘટનાને અંજામ આપતા હતા. આરોપીઓએ સુરત શહેરમાં અલગ અલગ જગ્યાએ તેમજ આણંદ, વડોદરા ખાતે પણ ચોરીની ઘટનાઓને અંજામ આપ્યો છે. વીઆઈપી બંગલાઓ તેમજ અલગ અલગ મકાનોને ટાર્ગેટ કરતા હતા અને રાત્રિના સમયે ચોરી કરવા જતા હતા. 

ઓળખ છૂપાવવા ચડ્ડી બનિયાન પહેરી લેતા
આરોપીઓ રાત્રે જ્યારે ચોરી કરવા જાય ત્યારે તેની ઓળખ છુપાવવા માટે પોતાના કપડાં કાઢીને ચડ્ડી બનિયાન પહેરી લેતા હતા અને પોતાના કપડા તેમજ ચોરી કરવા માટે ઉપયોગમાં લેવામાં આવતો સામાન લુંગીમાં છુપાવી દેતા હતા. ચોરી કરતા સમયે જો કોઈ વ્યક્તિ આરોપીઓને જોઈ જાય તો આરોપીઓ તેના પર પથ્થરમારો કરતા હતા. ઉપરાંત શ્વાન ભસે તો શ્વાન ઉપર પણ આરોપી પથ્થર મારી કરી ભગાડતા હતા. ચોરીની ઘટનાને અંજામ આપ્યા બાદ આરોપીઓ ચોરી કરેલા મોટરસાયકલ પર જ ભાગી જતા હતા.

અહીં ગુના નોંધાયેલા
સુરત શહેર ક્રાઈમ બ્રાન્ચ દ્વારા આરોપીની ધરપકડ કરી ગુજરાતના અલગ અલગ પોલીસ સ્ટેશનમાં નોંધાયેલા 20 જેટલા ગુનાઓનો ભેદ ઉકેલો છે. ઉપરાંત આરોપી સામે મહારાષ્ટ્રના ઓરંગાબાદ જિલ્લામાં 10, રાજસ્થાનના જયપુરમાં 5, મધ્યપ્રદેશના જાવરા, મનસોરા અને રતલામમાં 10, પંજાબના અમૃતસરમાં 5, કર્ણાટકના કારવારમાં 4, ઉત્તર પ્રદેશના વારાણસીમાં 5, નોઈડામાં 7, ગોવામાં 2, હરિયાણાના જલંધરમાં 5 અને દિલ્હીના બદરપુર ટાઉનમાં 2 ઘરફોડ ર્ચોરીના ગુના નોંધાયા છે.