સુરત / સુરતમાં સોશ્યલ મીડિયા ઈન્ફ્લુએન્સર નીકળ્યો સટ્ટાકિંગ: ઈન્ટરનેશનલ ગેમમાં ચાલતો 'ખેલ'

• સુરતમાં ઓનલાઈન સટ્ટા રમતા ઝડપાયા
• વેસુમાંથી ત્રણ બુકીને દબોચી લેવાયા
• ઓનલાઈન ગેમ પર સટ્ટો રમાડતા હતા

સુરત ક્રાઇમબ્રાન્ચે રાજ્યવ્ચાપી ઓનલાઇન ચાલતા સટ્ટાકાંડનો પર્દાફાશ કર્યો છે. ક્રિકેટ, કસીનો, ટેનિસ સહિત વિવિધ ઓનલાઇન ગેમ પર સટ્ટો રમાડતા તેમજ સટ્ટાના બહાને લોકો સાથે છેતરપિંડી કરતી ગેંગને પોલીસે ઝડપી પાડી છે. પોલીસે વેસુમાંથી કુલ 3 બુકીને પકડ્યા છે. જેમાં સુરતનો સોશિયલ મીડિયા ઈન્ફ્લુએન્સર આ સટ્ટાકાંડ ચલાવતો હોવાનો ઘટસ્ફોટ થયો છે. આ સાથે 5 શખસને વોન્ટેડ જાહેર કર્યા છે.

3 આરોપીઓ ઝડપાયા

સુરત ક્રાઇમ બ્રાંચની વિવિધ ટીમોએ વેસુ VIP રોડ પર ટાઇમ્સ કોર્નર બિલ્ડીંગની બાજુમાં આવેલા એબ્રોઝીયા બિઝનેસ હબના ગ્રાઉન્ડ ફ્લોર ઉપર આવેલા ‘પાનવાડી પાન સેન્ટર’ નામની દુકાનમાં રેડ કરી હતી. દુકાનમાં ગજાનંદ ઉર્ફે ગજુ ટેલર નામનો શખસ તેના મળતીયા માણસો મારફતે મોબાઇલ ફોનમાં ઓનલાઇન વેબસાઇટ ઉપર ઇન્ટરનેશનલ ગેમો જેવી કે, ક્રિકેટ, કસીનો, ટેનિસ, ફૂટબોલ, હોકી, કબડ્ડી લાઈવ ગેમ ઉપર સટ્ટો રમાડતા હોવાની સુરત ક્રાઈમ બ્રાન્ચને પોલીસને બાતમી મળી હતી

પોલીસે કાર્યવાહી હાથ ધરી

આરોપીઓ પાસેથી પાસેથી અલગ અલગ કંપનીના મોબાઈલ 4.30 લાખના ફોન નંગ-5 મળી આવ્યા હતા. જે મોબાઇલ ફોન ચેક કરતા Vmgs365.co નામની વેબસાઇટ મળી આવી હતી. આ વેબસાઇટ બાબતે આરોપીઓની ઝીણવટભરી રીતે પુછપરછ કરતા પકડાયેલા આરોપીઓ પૈકી મુખ્ય આરોપી ગજાનંદ ઉર્ફે ગજુ ટેલરે અજાણ્યા શખસ પાસેથી સીમકાર્ડ ખરીદી લોકો સાથે ઠગાઈ કરવાના ઇરાદે આ સીમકાર્ડ હાર જીતના જુગારની અલગ અલગ ઓનલાઇન ગેમો રમાડવા માટે ઉપયોગ કરતા હતા. જેને લઇ પોલીસે ત્રણેય આરોપીઓ વિરુદ્ધ IPC કલમ-420 તેમજ જુગાર ધારા કલમ- 4,5 મુજબનો ગુનો નોંધી કાયદેસરની કાર્યવાહી હાથ ધરી છે.

મુખ્ય સુત્રધાર સુરતનો ગજાનંદ ટેલર
સટ્ટો રમાડવા માટે બુકીઓએ સુવ્યવસ્થિત નેટવર્ક બનાવ્યું હતું. સટ્ટા માટે બુકીઓ ડમી સીમકાર્ડનો ઉપયોગ કરતા હતા. આ રાજ્ય વ્યાપી રેકેટનો મુખ્ય સુત્રધાર સુરતનો ગજાનંદ ટેલર હોવાનું બહાર આવ્યું છે. રાજકોટ, અમદાવાદ, અમરેલી, મહેસાણા અને પાટણના પાંચ બુકી પણ રેકેટમાં સામેલ હતા. જોકે જે તમામ ફરાર છે. આ રેકેટમાં અન્ય આરોપીઓ ચીનાંશુ ગોઠી તથા હીરલ દેસાઇને ઓનલાઇન ગેમની વેબસાઇટ સંભાળવા માટે પગાર અને કમિશન ઉપર રાખવામાં આવ્યા હતા. જેમા અલગ અલગ ગ્રાહકોને તેઓ યુઝર આઇ.ડી. અને પાસવર્ડ બનાવી આપીને Vmgs365.co નામની વેબસાઇટ ઉપર ક્રિકેટ, કસીનો, ટેનિસ, ફુટબોલ, હોકી, કબડ્ડી જેવી લાઇવ ચાલતી ઇન્ટરનેશનલ ગેમો સટ્ટો રમાડતો હોવાની કબુલાત કરી હતી.