ચોંકાવનારૂ / સુરતમાં માતા-પિતાની આંખ ઉઘાડતો કિસ્સો: ઘરેથી ભાગી બાળક બહાર રમવા ગયો, પાણીમાં પડી જતાં થયું મોત

• સુરતમાં માતા,પિતાની આંખ ઉઘાડનારો કિસ્સો
• બમરોલી ખાડીને કિનારે 4 બાળકો રમી રહ્યાં હતા
• રમતા રમતા પગ લપસી જતા પાણીમાં પડ્યો બાળક

સુરતમાં ચોંકાવનારો અને માતા,પિતાની આંખ ઉઘાડનારો કિસ્સો સામે આવ્યો છે. જેમાં એક માસૂમ બાળક રમતા રમતા પાણીના ખાડામાં ડૂબી જતાં તેને તાત્કાલીક સારવાર અર્થે ખસેડવામાં આવ્યો હતો. જ્યા તેનું મોત નીપજ્યું હોવાનું સામે આવ્યું છે. જેને લઈને અરેરાટી મચી જવા પામી છે. હાલ આ મામલે પોલીસ મૃતક બાળકના વાલીઓની શોધખોળ આદરી રહી છે.

પોલીસે સમગ્ર મામલે વધુ તપાસ શરૂ કરી

આ મામલે પ્રાથમિક વિગત અનુસાર બમરોલી ખાડી પાસે  4 વર્ષીય જીતા રામદેવ ચોરાઈ તથા હિમાંશુ (ઉ.વ.9), હંસ (ઉ.વ.5) અને ગોલુ (ઉ.વ.7) ઘરે માતાપિતાને જાણ વગર ભાગીને રમવા નીકળી ગયો હતો. આ દરમિયાન બમરોલી ખાડી સુધી પહોંચ્યા હતા.જ્યા અકસ્માતે જીતા ચોરાઈ નામનો બાળક બપોર વેળાએ બમરોલી ખાડીમાં ખાબક્યો હતો અને પાણીમાં ગરકાવ થઈ જતા આ અંગે અન્ય મિત્રોને બુમાબુમ કરી મુકી હતી.જેથી માર્ગ પરથી પસાર થઈ રહેલા સ્થાનિકો દોડી ગયા હતા. અને તાબડતોબ 108 બોલાવી હોસ્પિટલ ખાતે ખસેડયો હતો.

મૃતક બાળકના મિત્રોએ કહ્યું અમે ઘરેથી ભાગીને નીકળ્યા હતા

હોસ્પિટલમાં લઈ જતા સારવાર કારગત ન નિવડતા બાળકનું મોત નીપજ્યું હોવાનું ફરજ પરના તબીબે જાહેર કર્યું હતું. મૃતક બાળકના મિત્રોએ કહ્યું હતું કે અમે ઘરેથી ભાગીને નીકળ્યા હતા. તો પોલીસને જાણ થતા સ્થાનિક પોલીસ કાફલો પણ ઘટનાસ્થળે દોડી ગયો હતો. હાલ બાળકોના કોના માતા પિતા અંગે જાણ ન થતા પોલીસ બાળકોના નામ અને તેના માતા-પિતાના નામ તથા સરનામા પૂછી માતા પિતા સુધી પહોંચવા તજવીજ હાથ ધરી રહી છે..