BIG NEWS / કેન્દ્ર સરકારને સુપ્રીમ કોર્ટ દ્વારા મોટી રાહત, 'વન રેન્ક વન પેન્શન' મામલે સરકારના નિર્ણયને માન્ય રાખ્યો

• આ નીતિમાં કોઈ બંધારણીય ઉણપ નથી : SC
• ઇન્ડિયન એક્સ-સર્વિસમેન મૂવમેન્ટ દ્વારા અરજી દાખલ કરાઇ હતી
• અરજીમાં વન રેન્ક વન પેન્શન પોલિસી મનસ્વી હોવાનું જણાવાયું હતું

સુપ્રીમ કોર્ટે નિવૃત્ત સૈન્યકર્મીઓ માટે 'વન રેન્ક વન પેન્શન' ની વર્તમાન નીતિને યોગ્ય ગણાવી છે. સુપ્રીમ કોર્ટે કહ્યું કે, 'આ નીતિમાં કોઈ બંધારણીય ઉણપ નથી.' કોર્ટે એમ પણ કહ્યું કે, 'પોલિસીમાં પાંચ વર્ષમાં પેન્શનની સમીક્ષા કરવાની જોગવાઈ છે. આથી, સરકારે 1 જુલાઈ, 2019ની તારીખથી પેન્શનની સમીક્ષા કરવી જોઈએ.' કોર્ટે સરકારને ત્રણ મહિનામાં બાકી રકમની ચૂકવણી કરવા જણાવ્યું.

સુનાવણી દરમિયાન, સુપ્રીમ કોર્ટે કહ્યું કે, 'વન રેન્ક-વન પેન્શન' (OROP) નો સરકારનો નિર્ણય મનસ્વી નથી અને તે કોઈ બંધારણીય નબળાઈથી પીડાતો નથી. કોર્ટે કહ્યું કે 'વન રેન્ક-વન પેન્શન' એ સરકારનો નીતિ વિષયક નિર્ણય છે અને નીતિ વિષયક બાબતોના નિર્ણયમાં કોર્ટ દખલગીરી નથી કરતી.

Supreme Court upholds the government's decision on One Rank, One Pension (OROP) and says it does not find any constitutional infirmity on the OROP principle and the notification dated November 7, 2015. pic.twitter.com/9rc25Qp1td

— ANI (@ANI) March 16, 2022

જાણો પૂર્વ સૈનિકોએ શું માંગ કરી હતી?

વાસ્તવમાં પૂર્વ સૈનિકોની એક સંસ્થાએ સુપ્રીમ કોર્ટમાં કહ્યું હતું કે, 'આ નીતિથી વન રેન્ક વન પેન્શન' નો મૂળ ઉદ્દેશ્ય પૂરો નથી થઇ રહ્યો. તેની દર વર્ષે સમીક્ષા થવી જોઇએ પરંતુ તેમાં પાંચ વર્ષમાં સમીક્ષાની જોગવાઇ છે. અલગ-અલગ સમય પર નિવૃત્ત થયેલા લોકોને હજુ પણ અલગ પેન્શન મળી રહ્યું છે.'

ગયા મહિને કોર્ટે પોતાનો નિર્ણય સુરક્ષિત રાખ્યો હતો

ગયા મહિને અરજીની સુનાવણી કરતી બેન્ચે પોતાનો નિર્ણય સુરક્ષિત રાખ્યો હતો. વરિષ્ઠ વકીલ હુઝેફા અહમદી ઇન્ડિયન એક્સ-સર્વિસમેન મૂવમેન્ટ માટે હાજર રહ્યાં હતાં. બેન્ચે કહ્યું હતું કે, જે પણ નિર્ણય લેવામાં આવશે તે ડેટાના આધારે નહીં પરંતુ વૈચારિક આધાર પર હશે. ખંડપીઠે તેનું અવલોકન કરતાં કહ્યું હતું કે, યોજનામાં જે ગુલાબી તસવીર રજૂ કરાઇ હતી, વાસ્તવિકતા તેનાથી અલગ છે.