મહત્વનો ફેંસલો / સબ-રજિસ્ટ્રાર માલિકી હક્કોના ટ્રાન્સફર માટે દસ્તાવેજોની નોંધણીનો ઈનકાર ન કરી શકે- HC

• સંપત્તિ દસ્તાવેજોને લઈને કેરળ હાઈકોર્ટનો મહત્વપૂર્ણ ચુકાદો
• કહ્યું કે સબ-રજિસ્ટ્રાર માલિકી હક્કોના ટ્રાન્સફર માટે દસ્તાવેજોની નોંધણીનો ઈનકાર ન કરી શકે
• વ્યક્તિ પાસે અગાઉના દસ્તાવેજો ન હોય તો પણ સબ રજિસ્ટ્રારે નોંધણી કરવી પડે 

 કેરળ હાઈકોર્ટે એક મહત્ત્વનો ચુકાદો આપતા જણાવ્યું છે કે કોઈ વ્યક્તિ જે તે પ્રોપર્ટી સંબંધિત અગાઉના દસ્તાવેજો પૂરા પાડી ન શકે તો સબ-રજિસ્ટ્રાર માલિકીના હક્કોના હસ્તાંતરણ માટે દસ્તાવેજોની નોંધણી કરવાનો ઈનકાર ન કરી શકે. જસ્ટિસ ગોપીનાથ પી.ની અધ્યક્ષતામાં સિંગલ જજની બેન્ચે કહ્યું કે સબ-રજિસ્ટ્રાર પાસે નોંધણી અધિનિયમની કલમ 17 મુજબ એક્ઝિક્યુટર્સ (દસ્તાવેજો કરનાર) પાસેથી પૂર્વ દસ્તાવેજો માંગવાની સત્તા નથી, જે દસ્તાવેજોની ફરજિયાત નોંધણી સાથે સંબંધિત છે.જસ્ટીસ ગોપીનાથ પીએ જણાવ્યું હતું કે દસ્તાવેજનો અમલ કરનાર વ્યક્તિઓ માત્ર તેમની પાસેના અધિકારને જ સ્થાનાંતરિત કરી શકે છે, અને ફક્ત એટલા માટે કે તેઓ અગાઉના દસ્તાવેજો રજૂ કરવામાં સક્ષમ થયા વિના માલિકીના અધિકારો સ્થાનાંતરિત કરી રહ્યા છે, તે સબ-રજિસ્ટ્રાર માટે નોંધણીનો ઇનકાર કરવાનું માન્ય કારણ હોઈ શકે નહીં.

માલિકી અધિકારોને સ્થાનાંતરિત કરવામાં કોઈ કાનૂની અડચણ નથી
આ કેસમાં દસ્તાવેજ કરનાર અગાઉના દસ્તાવેજો રજૂ કરી શક્યા નહોતા તેથી સબ-રજિસ્ટ્રારે દસ્તાવેજો પર સહી કરવાનો ઈન્કાર કરી દીધો હતો. સબ રજિસ્ટ્રારના આ નિર્ણયને અરજદારે હાઈકોર્ટમાં પડકાર્યો હતો, કોર્ટે અરજદારોની દલીલ સાથે સંમતિ દર્શાવી હતી.

માલિકીના અધિકારોને સ્થાનાંતરિત કરવામાં કોઈ કાનૂની અવરોધ નથી

હાઈકોર્ટે ભારપૂર્વક જણાવ્યું હતું કે અગાઉના કેસમાં પી.નારાયણન વિ. સબ-રજિસ્ટ્રાર (2018), તે પહેલેથી જ સ્થાપિત થઈ ચૂક્યું હતું કે માલિકીના અધિકારોને સ્થાનાંતરિત કરવામાં કોઈ કાનૂની અવરોધ નથી. તદુપરાંત, એવો ચુકાદો આપવામાં આવ્યો હતો કે લીઝ અથવા ટાઇટલ પર આધારિત કબજો એ સબ-રજિસ્ટ્રાર દ્વારા તપાસનો વિષય ન હોવો જોઈએ.

 નિર્ધારીત માપદંડો અનુસાર દસ્તાવેજોની નોંધણી કરો
આમ, કોર્ટે અગાઉના દસ્તાવેજો રજૂ કરવાની જરૂર વિના, નિર્ધારીત માપદંડો અનુસાર દસ્તાવેજોની નોંધણી કરવાનો નિર્દેશ આપ્યો હતો.