ગુજરાત / વાલીઓનું ટેન્શન હાઈ માસ પ્રમોશન નડ્યુંઃ ધો. 12ની પહેલી વખત બોર્ડ એક્ઝામ આપી રહેલા વિદ્યાર્થીઓ ભારે માનસિક તાણમાં

• પહેલી વખત બોર્ડ એક્ઝામ આપી રહેલા વિદ્યાર્થીઓ ભારે માનસિક તાણમાં
• વિદ્યાર્થીઓ ચિંતામુક્ત પરીક્ષા આપી શકે તે માટે શિક્ષકો માર્ગદર્શન આપી રહ્યા છે
•  ધોરણ-10માં 8,57,204 વિદ્યાર્થીઓને માસ પ્રમોશન આપીને પાસ કરી દેવાયા 

ગુજરાત શિક્ષણ બોર્ડ દ્વારા આગામી 14 માર્ચથી લેવાનારી બોર્ડની પરીક્ષા આડે હવે ગણતરીના માત્ર 29 દિવસ જ બાકી રહ્યા છે. શિક્ષણ બોર્ડ, શાળાઓ અને વિદ્યાર્થીઓ પણ બોર્ડની પરીક્ષાની તૈયારીઓ કરી રહ્યા છે, પરંતુ પહેલી વાર બોર્ડ પરીક્ષા આપી રહેલા અનેક વિદ્યાર્થીઓ મૂંઝવણ અનુભવી રહ્યા છે. સાથે સાથે વાલીઓનું પણ ટેન્શન વધી ગયું છે. આવા સંજોગોમાં કેટલાક જાગૃત વાલીઓ તેમનાં સંતાનોને બોર્ડ પરીક્ષા પહેલાં જ મનોચિકિત્સક પાસે કાઉન્સેલિંગ કરાવીને પરીક્ષાનો હાઉ દૂર કરાવી રહ્યા છે. અમદાવાદ સહિત રાજ્યભરમાં ધોરણ-12 કોમર્સ અને સાયન્સના અંદાજિત 6.30 લાખ વિદ્યાર્થીઓ પહેલી વાર બોર્ડ પરીક્ષા આપી રહ્યા છે, કારણ કે કોરોનાકાળના સમયમાં ધોરણ-10ની બોર્ડ પરીક્ષા આયોજિત ન થઇ હોઈ તમામ વિદ્યાર્થીઓને માસ પ્રમોશન અપાયું હતું.

ધોરણ-10ના વિદ્યાર્થીઓને બોર્ડની પરીક્ષા આપવાનો અનુભવ મળ્યો નથી
આ વિદ્યાર્થીઓ ધોરણ-10ની બોર્ડની પરીક્ષા આપ્યા વિના સીધી જ ધોરણ-12ની બોર્ડની પરીક્ષા આપી રહ્યા છે. આ તમામ વિદ્યાર્થીઓને પહેલી વખત બોર્ડની પરીક્ષા આપવાનો અનુભવ મળશે, કારણ કે વર્ષ 2021માં કોરોના મહામારીના કારણે શિક્ષણ બોર્ડે ધોરણ-10ના બોર્ડના તમામ વિદ્યાર્થીઓની પરીક્ષા લીધી ન હતી. આથી ધોરણ-10ના વિદ્યાર્થીઓને બોર્ડની પરીક્ષા આપવાનો અનુભવ મળ્યો ન હતો. ત્યાર બાદ 2022માં ધોરણ-11 અને હવે 2023માં ધોરણ-12માં આ વિદ્યાર્થીઓ પહેલી વખત બોર્ડની પરીક્ષા આપશે.

ધોરણ-12ના વિદ્યાર્થીઓ માનસિક રીતે મજબૂત રહો
14 માર્ચથી શરૂ થઇ રહેલી બોર્ડની પરીક્ષામાં પહેલી વખત બોર્ડની પરીક્ષા આપી રહેલા ધોરણ-12ના વિદ્યાર્થીઓ માનસિક રીતે મજબૂત રહે, ચિંતા, હતાશા-નિરાશા જેવી મુશ્કેલીઓનો ભોગ ન બને તે માટે સાઇકોલોજીના નિષ્ણાતો તેમને તમામ પ્રકારની મદદ કરી રહ્યા છે. વિદ્યાર્થીઓ કોઈ પણ પ્રકારના માનસિક દબાણ કે ચિંતા વગર આત્મવિશ્વાસ સાથે પરીક્ષા આપી શકે તે માટે ભૂતપૂર્વ સિનિયર વિદ્યાર્થીઓની ટીમ પણ શાળાઓમાં કાઉન્સેલિંગ કરી રહી છે.

વાલીઓ તેમજ વિદ્યાર્થીઓને શિક્ષકો માર્ગદર્શન આપી રહ્યા છે
શાળા અને વિદ્યાર્થીઓનું ધોરણ-12 બોર્ડનું પરિણામ સારું આવે, વિદ્યાર્થીઓ ચિંતામુક્ત પરીક્ષા આપી શકે તે માટે વાલીઓ તેમજ વિદ્યાર્થીઓને શિક્ષકો માર્ગદર્શન આપી રહ્યા છે. શાળાનું શૈક્ષણિક કાર્ય શરૂ થાય પછી જે શિક્ષકોએ વર્ગખંડમાં તાસ લેવા જવાનું ન હોય તેઓ વિદ્યાર્થીઓના ઘેર પહોંચી જાય છે. તેઓ વાલીઓને વિદ્યાર્થી સાથે પ્રેમાળ વ્યવહાર રાખવા અને તેમને તણાવમુક્ત રાખવા સૂચવે છે. વાલીઓએ ઘરમાં ટીવી જોવાનું ટાળવું, વાલીઓએ અભ્યાસ બાબતમાં તેમનાં સંતાનોની મિત્રો સાથે સરખામણી ન કરવી, તેમના પર વાંચન માટે દબાણ ન કરવું અને પરીક્ષા સ્થળે સમય કરતાં વહેલાં પહોંચાય તેવું આયોજન રાખવું, બાળકો હતાશા, માનસિક તાણ ન અનુભવે તે જોવું, વિદ્યાર્થીઓએ પરીક્ષાના દિવસો નજીક છે ત્યારે કયા વિષયો, કેવી રીતે કેટલો સમય વાંચવા જેવી બાબતો અંગે માર્ગદર્શન આપે છે.

ધો. 10ની તુલનાએ ધો. 12માં બે લાખ જેટલા વિદ્યાર્થીઓ ઓછા નોંધાયા
કોરોના મહામારી દરમિયાન વર્ષ 2021માં ધોરણ-10માં કુલ 8,57,204 વિદ્યાર્થીઓ નોંધાયા હતા. આ તમામ વિદ્યાર્થીઓને ગ્રેડ પ્રમાણે પરિણામ જાહેર કરીને માસ પ્રમોશન અપાયું હતું. ધોરણ-૧૦માં 8,57,204 વિદ્યાર્થીઓને માસ પ્રમોશન આપીને પાસ કરી દેવાયા હતા, પરંતુ આ વિદ્યાર્થીઓ પૈકી 2023માં અંદાજિત 6.30 લાખ વિદ્યાર્થીઓ જ ધોરણ-12 સુધી પહોંચી શક્યા છે, જ્યારે બાકી રહેલા સવા બે લાખ વિદ્યાર્થીઓ અન્ય કારણસર કે પછી આગળ ભણવાનું માંડી વાળીને ધોરણ-12ની બોર્ડ પરીક્ષા માટે ર‌િજસ્ટર થયા નથી.