ધુળેટી પર્વ / સ્ટેચ્યુ ઓફ યુનિટી પર ઉમટ્યાં પ્રવાસીઓ, હોટલ-ટેન્ટ સિટી સહિતનું બધુ બુક, ધુળેટી રમવા પર પ્રતિબંધ

• કેવડિયામાં હોટેલ અને ટેન્ટ સીટી સહિત બધુ બુક
• 25 હજારથી વધુ પ્રવાસીઓ ધુળેટીના દિવસે SOU પહોંચ્યા
• સુરતીઓ સાપુતારા પહોંચ્યા, તમામ હોટેલો ફૂલ

રાજ્યમાં વધી રહેલા કોરોનાં કેસોને ધ્યાનમાં લઈ સરકાર દ્વારા ધુળેટી તહેવાર પર પ્રતિબંધ લગાવવામાં આવ્યો છે. સોશિયલ ડિસ્ટન્સિંગ અને ઓછા સંખ્યામાં હોળી પ્રગટાવવી તેમજ ધુળેટી રમવા ઉપર પ્રતિબંધ લગાવાયો છે.

સ્ટેચ્યુ ઓફ યુનિટી પર પ્રવાસીઓ ઉમટી રહ્યા છે. આજે સોમવારે સ્ટેચ્યુ ઓફ યુનિટી પર રજા હોવા છતા પણ આજે ખુલ્લુ રાખવામાં આવ્યું છે. ત્યારે આજે 25 હજારથી વધુ પ્રવાસીઓ આવ્યા છે. કેવડિયામાં હોટલ, ટેન્ટ સિટી સહિતનું બધુ જ બુક થઇ ગયું છે. 

જોકે આંતરરાજ્ય બોર્ડરો બંધ હોવાના કારણે શહેરોના પ્રવાસીઓ આવી રહ્યા છે. પ્રવાસીઓએ કહ્યું કે, ધુળેટીની ઉજવણી પર પ્રતિબંધ હોવાના કારણે અમે ધુળેટીની રજાના દિવસે અહિંયા આવ્યા છીએ. લોકોએ સરકારના ધુળેટીની ઉજવણી પર પ્રતિબંધના નિર્ણયને પણ આવકાર્યો છે. અહીંયા કલરથી રમવાની મનાઈ છે પણ મોટો વિસ્તાર છે એટલે કોરોનાની ખતરો નથી જોકે સાવચેતી રાખવામાં આવે છે.

સુરતીઓ સાપુતારા પહોંચ્યા, તમામ હોટેલો ફૂલ

હોળી ધુળેટીનાં તહેવારની ઉજવણી પ્રસંગે સરકાર દ્વારા પ્રતિબંધ ફરમાવવામાં આવ્યો છે. ત્યારે સુરતીઓ તહેવાર ઉજવણીના રસિયાઓ હોય તેઓ હોળી ધુળેટીની રજાઓ અને તહેવારની ઉજવણી માટે સાપુતારામાં ઉમટી પડ્યાં છે. સાપુતારાની તમામ હોટેલો ફૂલ જોવા મળી રહી છે તેમજ સુરતીઓની ગાડીઓ ઠેરઠેર જોવા મળી રહી છે.

ધુળેટી પર શહેર ન છોડવા સુરત કલેક્ટરે જાહેરનામું બહાર પાડ્યું હતું

સુરત શહેરમાં ગતરોજ કલેક્ટર દ્વારા જાહેરનામું બહાર પાડીને જણાવામાં આવ્યું હતું કે હોળી-ધુળેટી તહેવારની ઉજવણી પ્રસંગે પોતાનું શહેર છોડવું નહીં પરંતુ મોટી સંખ્યામાં સુરતવાસીઓ શહેર છોડીને સાપુતારામાં તહેવારની ઉજવણી પ્રસંગે જોવા મળ્યાં હતાં.

સાપુતારામાં હાલ તમામ હોટેલો ફૂલ છે. દરેક હોટેલોમાં સોશિયલ ડિસ્ટન્સિંગના નિયમોના પાલન સાથે પ્રવાસીઓને એન્ટ્રી આપવામાં આવે છે. તેમજ હોટેલ સ્ટાફ દ્વારા કોરોનાની તમામ ગાઈડલાઈનનું પાલન કરવામાં આવે છે. સાપુતારામાં પ્રવાસીઓની સંખ્યામાં વધારો થતાં સ્થાનિક લોકોની રોજગારીમાં પણ વધારો થયો હતો.

અત્રે ઉલ્લેખનીય છે કે, હાલ હોળી-ધુળેટીનાં તહેવારની ઉજવણીઓ ચાલી રહી છે. સરકાર દ્વારા તહેવાર ઉજવણી ઉપર પ્રતિબંધ લાધવામાં આવ્યો છે. કોરોનાં કેસોમાં પણ વધારો થઈ રહ્યો છે. પરંતુ સાપુતારામાં સંપૂર્ણ કોરોના ગાઈડલાઈનનું પાલન થતું હોય તેઓ પણ નિયમોના પાલન સાથે રજાઓ માણવા માટે સાપુતારા ખાતે આવી પહોંચ્યા છે. કોરોના ગાઈડલાઈનનું પાલન કરી હોટેલ તેમજ સાપુતારામાં કુદરતી સૌંદર્યનો લુપ્ત ઉઠાવી રહ્યાં છે.