ગર્વની વાત / સ્ટાર મહિલા બેડમિન્ટન ખેલાડી પીવી સિંધુ ફરી બનશે ભારતની ધ્વજવાહક, 28 જુલાઈએ બર્મિઘમમાં કૉમનવેલ્થ ગેમ્સનું ઉદ્ઘાટન

• પીવી સિંધુ ફરી એકવાર ભારતની ફ્લેગબેરર બનશે
• નીરજ ચોપડા ધ્વજવાહક બનવાના હતા 
• ઉદઘાટન સમારોહમાં 164 રમતવીરો ઉપસ્થિત રહેશે

કોમનવેલ્થ ગેમ્સમાં ભારતની સ્ટાર મહિલા બેડમિન્ટન ખેલાડી પીવી સિંધુ ફરી એકવાર ભારતની ફ્લેગબેરર બનશે. બે વખતની ઓલિમ્પિક મેડલ વિજેતા સિંધુ બુધવારે બર્મિંગહામમાં યોજાનારા કોમનવેલ્થ ગેમ્સના ઉદ્ઘાટન સમારંભમાં ભારતીય ટુકડીનું નેતૃત્વ કરશે. અગાઉ ઓલિમ્પિક ગોલ્ડ મેડાલીસ્ટ નીરજ ચોપરાને જવાબદારી સોંપવામાં આવી હતી, પણ તેની ઈજાના કારણે કોમનવેલ્થ ગેમ્સમાંથી બહાર થયા બાદ સિંધુને હવે ફ્લેગ બેરર બનાવવામાં આવી છે.

Two-time Olympic champion PV Sindhu to be India's flagbearer at Commonwealth Games 2022! 😍🇮🇳#B2022 | @Pvsindhu1 | @WeAreTeamIndia pic.twitter.com/DZJ39T6ZSu

— Olympic Khel (@OlympicKhel) July 27, 2022

ઉદઘાટન સમારોહમાં 164 રમતવીરો ઉપસ્થિત રહેશે
જણાવી દઈએ કે ભારત તરફથી આ વખતની રમતોમાં 215 ખેલાડીઓ ભાગ લઈ રહ્યા છે. આ સાથે જ પહેલીવાર મહિલા ક્રિકેટ ટીમ જોડાઈ રહી છે. ગુરુવારે યોજાનારા ઉદ્ઘાટન સમારંભમાં કુલ મળીને 164 ખેલાડીઓ ભાગ લેશે. ભૂતપૂર્વ વર્લ્ડ ચેમ્પિયન સિંધુ બર્મિંગહામમાં વિમેન્સ સિંગલ્સનો ગોલ્ડ મેડલ જીતવાની પ્રબળ દાવેદારોમાંની એક છે. તેણે ગોલ્ડ કોસ્ટ અને ગ્લાસગોમાં છેલ્લા બે તબક્કામાં અનુક્રમે સિલ્વર અને બ્રોન્ઝ મેડલ જીત્યા હતા. વર્ષ 2018માં ગોલ્ડ કોસ્ટમાં યોજાયેલા કોમનવેલ્થ ગેમ્સમાં પણ સિંધુ ફ્લેગબેરર રહી હતી.

pic.twitter.com/natzPr720y

— Neeraj Chopra (@Neeraj_chopra1) July 26, 2022

નીરજ ચોપડા ધ્વજવાહક બનવાના હતા
ટોક્યો ઓલિમ્પિકના ગોલ્ડ મેડાલિસ્ટ નીરજ ચોપડાએ મંગળવારે કોમનવેલ્થ ગેમ્સમાંથી ખસી જવાનો નિર્ણય કર્યો છે. જેવેલિન થ્રોઅર નીરજ ચોપરાએ ગત સપ્તાહે વર્લ્ડ ચેમ્પિયનશિપમાં સિલ્વર મેડલ જીતીને ઈતિહાસ રચી દીધો હતો, પરંતુ તે દરમિયાન તેને કમરમાં ઈજા થઈ હતી, જે પછી તેણે તેની મેડિકલ ટીમ સાથે આ અંગે ચર્ચા કરી હતી અને ત્યાર બાદ બર્મિંગહામ ગેમ્સમાંથી ખસી જવાનો નિર્ણય લીધો. નીરજે પોતાના આ નિર્ણય પર દુ:ખ વ્યક્ત કરતી એક ભાવુક પોસ્ટ પણ લખી હતી અને તેને ભારતના ધ્વજવાહક ન બની શકવા બદલ દુર્ભાગ્યપૂર્ણ ગણાવ્યું હતું.