'ગીવ મી વોટર..' / ચમત્કારને નમસ્કાર: ત્રણ વર્ષની શ્રીશા સંઘાણી અંગ્રેજી સિવાય કશું સમજતી નથી, સુરતમાં આશ્ચર્યજનક કિસ્સો

• સુરતમાં આશ્ચર્ય પમાડે તેવો કિસ્સો સામે આવ્યો
• માત્ર ત્રણ વર્ષની શ્રીશા સંઘાણી બોલે છે સડસડાટ અંગ્રેજી 
• સમગ્ર પરિવારમાં કોઈ વ્યક્તિ અંગ્રેજી જાણતું પણ નથી 

દરેક માતા પિતાનું એક સ્વપ્નું હોય છે કે તેમનું બાળક અંગ્રેજી મીડિયમમાં ભણે અને ખૂબ સારું અંગ્રજી બોલે. ત્યારે જો કે સુરતમાં એક આશ્ચર્ય પમાડે તેવો કિસ્સો સામે આવ્યો છે. જ્યાં માત્ર ત્રણ વર્ષની શ્રીશા સંઘાણી નામની બાળકી કડકડાટ અંગ્રેજી જ બોલે છે.  નવાઇની વાત તો એ છે કે શ્રીશાના સમગ્ર પરિવારમાં કોઈ વ્યક્તિ અંગ્રેજી જાણતું પણ નથી ત્યારે શ્રીશા અંગ્રેજી સિવાય કશું સમજતી ન હોવાથી નવાઈ લગાડે તેવા આ કિસ્સાએ લોકોનું ધ્યાન ખેંચ્યું છે.

લાઈફ સ્ટાઇલ પણ તદ્દન અલગ

શ્રીશા સંઘાણીની સમગ્ર લાઇફ સ્ટાઇલ પણ  અલગ જ છે. તે સવારે 3-4 વાગ્યા સુધી જાગે છે અને બપોરે 11-12 વાગ્યે ઊઠે છે. જમવામાં પણ તેને કાંટો અને ચમચી જોઈએ જ કાંટા ચમચી વગર જમતી નથી. જ્યારે પાણી પીવું હોય ત્યારે પાણીની જગ્યાએ ગીવ મી વોટર એવી રીતે જ વાત કરે છે. બીજી તરફ શ્રીશાના માતા કે પિતા આઠ ધોરણ ભણેલા છે જેવો ક્યારેય વિદેશ ગયા નથી પરંતુ શ્રીશા માત્ર અંગ્રેજી જ સમજતી હોવાથી આ ચમત્કાર હોય તેવું તેમને લાગી રહ્યું છે.

શિયાળાની કાતિલ ઠંડીમાં પણ ઠંડા પાણીએ જ સ્નાન કરતી શ્રીશા

આ ઉપરાંત લાઈફ સ્ટાઈલમાં પણ તે ફ્રિજનું ઠંડુ પાણી જ પીવે છે. ગમે તેવી ઠંડી કે શિયાળામાં પણ તે ગરમ પાણીએ સ્નાન કરતી નથી. ઠંડુ પાણી હોય તો જ સ્નાન કરે છે. ત્યારે શ્રીશામાં આ પરિવર્તન કઇ રીતે આવ્યુ તે મામલે પરિવારજનો મુંજાયા છે.