ઠગાઈ / લૂંટેરી મહિલાઓથી સાવધાન: માતાજી તમારા દુઃખ દૂર કરશે.... કહીને ઘરમાં ઘૂસી ખંખેરી લીધાં આટલાં લાખ

• આણંદના ઉમરેઠમાં દોઢ લાખની ઠગાઈ
• ઉમરેઠના ઓડ ગામમાં બની ઠગાઈની ઘટના
• માતાજીના નામે 3 મહિલાએ કરી ઠગાઈ

વિજ્ઞાન અને ટેક્નોલોજીના જમાના પણ અંધશ્રદ્ધાના બનાવો સામે આવી રહ્યા છે, અંધશ્રદ્ધામાં અંધ બનતા પહેલા ચેતી જજો, નહીંતર નહીં થવાનું થશે. ત્યારે આવી જ એક ઘટના આણંદ જિલ્લાના ઉમરેઠ તાલુકાના ઓડ ગામમાંથી સામે આવી છે. માતાજી તમારા દુઃખ દૂર કરશે તેવું કહીને મહિલાઓએ દોઢ લાખ રૂપિયાની ઠગાઈ કરી છે. આ મામલે ખંભોળજ પોલીસે ગુનો નોંધી વધુ તપાસ હાથ ધરી છે. 

3 મહિલાઓનું કારસ્તાન
આ અંગે વિગતવાર વાત કરીએ તો ઉમરેઠના ઓડ ગામના ચાંદની ચોક ખાતે રહેતા રાજુભાઈ રાજપુરોહિતના ઘરેથી ત્રણ મહિલાઓ લાખો રૂપિયાની ઠગાઈ કરી ફરાર થઈ જતાં ચકચાર મચી જવા પામી છે. ગત સોમવારના રોજ રાજુભાઈ કામ અર્થે બહાર ગયા હતા. જ્યારે તેમના પત્ની કોમલબેન અને દીકરો-દીકરી ઘરે હતા, આ વેળાએ ત્રણ મહિલાઓ તેમના ઘરે પહોંચી હતી. 

માતાજી તમારા દુઃખ દૂર કરશે કહી ઘરમાં મુકેલી રકમ મંગાવી
રાજુભાઈના પત્ની કોમલબેનને આ ત્રણેય મહિલાઓએ ભાવનગરના ખોડીયાર માતાએથી આવ્યા હોવાનું કહીને ઘરમાં પ્રવેશ લીધો હતો અને જમાડાવાનું કહ્યું હતું.  તેઓના વિશ્વાસમાં આવીને કોમલબેને ત્રણેય મહિલાઓને જમાડી હતી. જે બાદ ત્રણેય મહિલાઓએ ઘરમાં ધૂપ ધૂણી કરી હતી અને માતાજી તમારા દુઃખ દૂર કરશે એવું કહીને ઘરમાં મુકેલી રકમ મંગાવી હતી. એ પછી જાણે બંને સંતાન અને મહિલા મૂર્છિત થઈ ગયા હતા.  મૂર્છિત થયેલા રાજુભાઈના પત્નની કોમલબેને ઘરમાં પડેલા દોઢ લાખ રૂપિયા મુક્યા હતા. 

લૂંટેરી મહિલાઓ દોઢ લાખ લઈ ફરાર
જે બાદ લૂંટેરી મહિલાઓ દોઢ લાખ લઈ ફરાર થઈ ગઈ હતી. લૂંટેરી મહિલાઓ સીસીટીવી કેમેરામાં કેદ થઈ હતી. જોકે, ભાનમાં આવતા કોમલબેને સમગ્ર હકીકત પતિને જણાવી હતી. જે બાદ રાજુભાઈએ આ મામલે ખંભોળજ પોલીસ સ્ટેશનમાં ફરિયાદ નોંધાવતા પોલીસે ગુનો નોંધી તપાસ હાથ ધરી છે.

દુઃખ દૂર કરવાના નામે ભૂવાએ ખંખેર્યા 35 લાખ
અત્રે ઉલ્લેખનીય છે કે, થોડા સમય પહેલા ધાનેરાના એક પરિવારે અંધશ્રદ્ધામાં 35 લાખ રૂપિયા ગુમાવ્યા હતા. ધાનેરા તાલુકાના ગોલા ગામના બે ભાઈઓને ધાનેરા અને થરાદના 5 ભૂવાઓએ ભેગા મળીને દુઃખ દૂર કરવાની લાલચ આપી હતી. તેઓએ આ દુઃખ દૂર કરવા માટે એક કરોડ સુધીનો ખર્ચ થશે એમ જણાવી બંને ભાઈઓ પાસેથી 35 લાખ રૂપિયા ખંખેરી લીધા હતા.
 

સળગતા સવાલ
લોકો સાથે ક્યાં સુધી શ્રદ્ધાના નામે ઠગાઈ થશે?
માતાજી અને ભગવાનના નામે લોકો ક્યાં સુધી રૂપિયા ગુમાવશે?
માતાજીના નામે ઠગાઈ કરનારી મહિલાની ધરપકડ ક્યારે થશે?
આ મહિલાઓએ અન્ય કેટલી જગ્યાએ ઠગાઈને અંજામ આપ્યો હશે?
આવા આરોપી વિરુદ્ધ દાખલારૂપ કાર્યવાહી થશે?