- કોંગ્રેસે યોગદિવસ નીમિતે કરી પોસ્ટ
- જવાહરલાલ નહેરુનો શિર્ષાસન કરતો ફોટો પોસ્ટ
- શશી થરૂરે રિટ્વીટ કરી ભાજપ સરકારને આપ્યો શ્રેય
આજે સમગ્ર વિશ્વમાં 9મો આંતરરાષ્ટ્રીય યોગ દિવસ ઊજવવામાં આવી રહ્યો છે. આ અવસર પર કોંગ્રેસે યોગને લોકપ્રિય બનાવવા માટે પૂર્વ પ્રધાનમંત્રી જવાહરલાલ નહેરુનો ધન્યવાદ માન્યો. પરંતુ પાર્ટીનાં જ વરિષ્ઠ નેતા શશિ થરૂરે યોગને લોકપ્રિય બનાવવાનો શ્રેય ભાજપની કેન્દ્ર સરકારને આપ્યો.
શશિ થરૂરે ભાજપને આપ્યો શ્રેય
કોંગ્રેસ પાર્ટીએ સવારે પૂર્વ PM જવાહરલાલ નહેરનો શિર્ષાશન કરતો ફોટો શેર કર્યો હતો. આ સાથે જ તેમણે લખ્યું કે,'પંડિત નહેરુને ધન્યવાદ કે જેમણે યોગને લોકપ્રિય બનાવ્યું છે અને તેને રાષ્ટ્રીય નીતિનો એક ભાગ બનાવ્યું છે.' આ પોસ્ટને રિટ્વીટ કરતાં શશી થરૂરે લખ્યું કે,' હા જરૂર પરંતુ આપણને એ સૌનો આભાર પણ માનવો જોઈએ કે જેમણે યોગને પુનર્જીવિત કર્યું અને લોકપ્રિય બનાવ્યું, તેમાં આપણી સરકાર, પ્રધાનમંત્રી, વિદેશમંત્રાલય શામેલ છે. તેમણે સંયુક્ત રાષ્ટ્રની મદદથી યોગ દિવસનું આંતરરાષ્ટ્રીયકરણ કર્યું. હું દશકાઓથી કહી રહ્યો છું કે યોગ આપણો સોફ્ટ પાવર છે. તેને (યોગને) માન્યા મળતી જોઈ સારું લાગે છે.'
સમયાંતરે પાર્ટીને બોધપાઠ આપતાં રહે છે થરૂર
કોંગ્રેસ માટે ચૂંટણી લડી ચૂકેલા શશિ થરૂર સમયાંતરે પાર્ટીને બોધપાઠ આપતાં નજરે પડે છે. થરૂરે હાલમાં જ કહ્યું હતું કે કર્ણાટક વિધાનસભા ચૂંટણીમાં જીત બાદ તેમની પાર્ટી માટે જરૂરી છે કે તે આત્મસંતુષ્ટ ન થાય કારણ કે મતદાતાઓનું વલણ પ્રાદેશિક અને રાષ્ટ્રીય ચૂંટણીઓની વચ્ચે બદલાઈ શકે છે. તેમણે 2019ની લોકસભા ચૂંટણીનું કોંગ્રેસનું નિરાશાજનક પ્રદર્શનનું ઉદાહરણ આપતાં કહ્યું કે તેના થોડા મહિના પહેલા મધ્યપ્રદેશ, રાજસ્થાન અને છત્તીસગઢની વિધાનસભા ચૂંટણીમાં કોંગ્રેસને મોટી જીત મળી હતી. લોકસભા સદસ્ય થરૂર કહે છે કે કોંગ્રેસ એવું માનીને ન ચાલી શકે કે જે બાબત પ્રદેશ ચૂંટણીઓમાં કામ કરી ગઈ તે રાષ્ટ્રીય ચૂંટણીઓમાં પણ કામ કરશે.'
