સતર્કતા / આ કારણથી બાળકોને પણ આવી શકે છે કાર્ડિયક અરેસ્ટ: જાણો બચવા માટે શું કરવા જોઈએ ઉપાય

• બાળકોમાં પણ મોટા લોકોની માફક કાર્ડિયક અરેસ્ટ થવાની સંભાવના
• ન્યુમોનિયા અને બ્રોન્કાઇટીસ જેવા શ્વાસના રોગ બની શકે છે જવાબદાર
• એવા બાળકોના કાર્ડિયક અરેસ્ટની સંભાવના વધી જતી હોય છે

ખૂબ ઓછા લોકો જાણતા હોય છે કે બાળકોમાં પણ મોટા લોકોની માફક કાર્ડિયક અરેસ્ટ થવાની સંભાવના જોવા મળતી હોય છે. જ્યારે હૃદય અચાનક જ શરીરના અન્ય અવયવોને લોહી પંપ કરવાનું બંધ કરી દે છે ત્યારે કાર્ડિયક અરેસ્ટનું જોખમ વધતું હોય છે. અમુક બાળકો જન્મતાની સાથે જ હૃદયની ખામીથી પીડાતા હોય છે. જેઓના હૃદયમાં લોહીનો પ્રવાસ સામાન્ય નથી હોતો તેવા બાળકોમાં કાર્ડિયક અરેસ્ટનું જોખમ વધી જાય છે. વધુમાં ન્યુમોનિયા અને બ્રોન્કાઇટીસ જેવા શ્વાસના રોગ પણ હદય પર દબાણ લાવતા હોવાથી કાર્ડિયક અરેસ્ટની સંભાવના વધી જતી હોય છે.

હૃદય સંબંધિત કોઈપણ સ્થિતિને કારણે કાર્ડિયક અરેસ્ટનું જોખમ
અમુક કિસ્સાઓમાં શિશુનું ઊંઘ દરમિયાન જ મૃત્યુ થઇ જતું હોય છે. જેને સડન ઇન્ફન્ટ ડેથ સિન્ડ્રોમ તરીકે ઓળખવામાં આવે છે. જેનું હજુસુધી ચોક્કસ કારણ જાણી શકાયું નથી પરંતુ કેટલાક કિસ્સાઓમાં કાર્ડિયક એરિથમિયા કારણ હોવાનું કહેવાય છે. બીજી બાજુ ઘણી વખત અકસ્માત દરમિયાન પણ બાળકને આંચકો અથવા ઓક્સિજનની અછતને કારણે કાર્ડિયક અરેસ્ટનો ભોગ બની શકે છે.અમુક બાળકોમાં, હૃદય સંબંધિત કોઈપણ સ્થિતિને કારણે કાર્ડિયક અરેસ્ટનું જોખમ પણ વધતું હોય છે. તો કેટલીક દવાઓના વધુ ડોઝને કારણે પણ બાળકોને કાર્ડિયક અરેસ્ટની શકયતા રહેલી છે.

CPR પણ આપી શકો

જો બાળકને કાર્ડિયક અરેસ્ટ થાય તો સૌ પ્રથમ, એમ્બ્યુલન્સને મારફતે બાળકને તાત્કાલિક હોસ્પિટલમાં પહોંચાડવો જોઈએ. બૂમો પાડો અને જુઓ કે બાળક જવાબ આપી રહ્યું છે કે નહીં. બાળક શ્વાસ લઈ રહ્યું છે કે નહીં તે બાબતે ધ્યાન રાખી શ્વાસ લેવામાં તકલીફ પડતી હોય તો CPR પણ આપી શકાય. આપણી હથેળીને બાળકની છાતી વચ્ચે રાખી બીજા હાથ આ હાથની ટોચ પર રાખવા જોઈએ. હવે બંને હાથ વડે બાળકની છાતી દબાવો. જ્યારે કાર્ડિયક અરેસ્ટની વાત આવે ત્યારે દરેક સેકન્ડની ગણતરી થાય છે, તેથી સમય બગાડવો જોઈએ નહીં. 

(Disclaimer: આરોગ્ય અને સુખાકારી હેઠળ પ્રકાશિત સામગ્રી સામાન્ય જાણકારી ઉપલબ્ધ કરાવે છે. અહીં પ્રકાશિત લેખ તબીબ, વૈદ્ય, નિષ્ણાત અને રિસર્ચ આધારિત નિષ્કર્ષ પર છે. તમામ નિર્દેશોનું પાલન કરી વાંચકોની જાગૃતિ વધારવાના હેતુથી આ સામગ્રી તૈયાર કરાઈ છે. આ લેખ કોઈ પણ રીતે યોગ્ય ઉપચારનો વિકલ્પ નથી, વધુ જાણકારી માટે હંમેશા નિષ્ણાત કે આપના ચિકિત્સકની સલાહ લેવી. vtvgujarati.com આ જાણકારી માટે જવાબદારીનો દાવો કરતું નથી.)