રાજકારણ / રાજકોટ નગર પ્રાથમિક શિક્ષણ સમિતિના 15 સભ્યોના રાજીનામા, કમલેશ મિરાણીએ કહ્યું- ભાજપમાં ક્યારેય વિવાદ હોતો નથી

• રાજકોટના રાજકારણના મોટા સમાચાર
• શિક્ષણ સમિતિના તમામ સભ્યોના રાજીનામા
• ચેરમેન સહિત તમામ હોદ્દેદારોના રાજીનામા

રાજકોટના રાજકારણના સૌથી મોટા સમાચાર સામે આવ્યા છે. રાજકોટ નગર પ્રાથમિક શિક્ષણ સમિતિના ચેરમેન સહિત તમામ સભ્યોના રાજીનામા લેવાયા છે. જેથી હવે ટુંક સમયમાં નવી સમિતિ બનશે. જોકે, રાજકોટ શહેર પ્રમુખ કમલેશ મીરાણીએ આંતરિક વિખવાદનો ઇનકાર કરી દીધો છે. ગઈકાલે ગાંધીનગર ખાતે યોજાયેલી બેઠક બાદ આજે એકા એક રાજીનામા લઈ લેવામાં આવતા રાજકારણમાં ગરમાવો આવ્યો છે. 

નગર પ્રાથમિક શિક્ષણ સમિતીના તમામ સભ્યના રાજીનામા
આજે રાજકોટ કમલમ કાર્યાલય ખાતે શહેર પ્રમુખ કમલેશ મીરાણી અને મેયર ડો. પ્રદિપ ડવની ઉપસ્થિતિમાં રાજકોટ નગર પ્રાથમિક શિક્ષણ સમિતિના ચેરમેન અતુલભાઈ પંડિત, વાઇસ ચેરમેન સંગીતાબેન છાયા સહિત 15 સભ્યોના રાજીનામા લેવામાં આવ્યા હતા. પ્રદેશ પ્રમુખની સૂચનાથી ચેરમેન સહિત 15 સભ્યોએ રાજીનામાં આપ્યા છે. 

પક્ષનો નિર્ણય સમિતિના તમામ સભ્યોએ માન્ય રાખ્યોઃ કમલેશ મિરાણી
નગર પ્રાથમિક શિક્ષણ સમિતિના તમામ સભ્યોના રાજીનામા બાદ રાજકોટ ભાજપ શહેર પ્રમખ કમલેશ મિરાણીનું નિવેદન સામે આવ્યું છે. તેમણે કહ્યું કે, ભાજપમાં ક્યારેય વિવાદ હોતો નથી. પાર્ટીએ સમજી વિચારીને નિર્ણય લીધો છે અને પક્ષનો નિર્ણય સમિતિના તમામ સભ્યોએ માન્ય રાખ્યો છે. તેમણે જણાવ્યું છે કે, અમારા માટે બધા જ કાર્યકર્તાઓ મહત્વના હોય છે. હવે પાર્ટીના આદેશ બાદ નવી કમિટીની રચના કરવામાં આવશે.

ગઈકાલે ગાંધીનગરમાં યોજાઈ હતી બેઠક
ઉલ્લેખનીય છે કે, 17 એપ્રિલે એટલે કે ગઈકાલે પ્રદેશ કાર્યાલય કમલમમાંથી રાજકોટ શિક્ષણ સમિતિના તમામ સભ્યોને તેડું આવ્યું હતું. ગાંધીનગરના પ્રદેશ ભાજપ કાર્યાલય ખાતે ભાજપ પ્રદેશ પ્રમુખ સી.આર.પાટીલે શિક્ષણ સમિતિના સભ્યો સાથે બેઠક કરી હતી. આ બેઠક બાદ આજે તમામ સભ્યોએ રાજીનામા આપ્યા છે.