રાજકોટ / ક્યારે મળશે ઘરનું ઘર ? RUDAની ઢીલી નીતિ સામે રહીશો ઉતરી આવ્યા રસ્તા પર, 2017માં કરાયો હતો ડ્રો

• RUDAના આવાસની સોંપણી ન થતા સ્થાનિકોનો વિરોધ
• મુંજકામાં 2017માં 784 આવાસનો કરાયો હતો ડ્રો
• 4 વર્ષ બાદ પણ આવાસ ન સોંપાતા સ્થાનિકો રોષે 

ઘરનું ઘર કોણ ન ઇચ્છે. ત્યારે સરકારે પણ લોકોને ઘરનું ઘર અપાવવા માટે આવાસ યોજનાનો પ્રારંભ કર્યો છે.લોકોએ નાણા પણ ભર્યા અને ઘણાએ તો વ્યાજ પણ ચૂકવ્યુ છતાં ઘરનુ ઘર ન મળે તો ?  આવુ જ જોવા મળ્યુ રાજકોટમાં.  રાજકોટમાં RUDAના આવાસનો ડ્રો કરવામાં આવ્યો . 4 વર્ષ બાદ પણ રહીશોને પોતાનું ઘર ન મળતા વિરોધે ચઢ્યા. 

RUDAની ઢીલી નીતિ સામે સ્થાનિકો રોષે 

રાજકોટમાં RUDAના આવાસની સોંપણી ન થતા સ્થાનિકો રસ્તા પર ઉતરી આવ્યા છે. મુંજકા ખાતે છેલ્લા ઘણા સમયથી RUDA દ્વારા આવાસની સોંપણી કરવામાં ન આવતા સ્થાનિકોએ વિરોધ નોંધાયો. તેઓનું કહેવુ છે કે ડ્રો કરવા સમયે 15 મહિનામાં આવાસ સોંપવાની બાંહેધરી આપવામાં આવી હતી જે વાતને પણ 4 વર્ષ થઇ ગયા તેમ છતાં હજી સુધી આવાસની સોંપણી કરવામાં આવી નથી.   રૂડાની ઢીલી કામગીરી સામે સ્થાનિકોમાં ભારોભાર રોષની લાગણી ફરી વળી હતી. 

"12ટકા પેનલ્ટી વસૂલી છતાં આવાસ ફાળવણી માટે ધક્કા ખાવા પડે "

મહત્વનું છે કે મુંજકામાં 2017માં 784 આવાસનો ડ્રો કરાયો હતો. વર્ષ 2017થી અત્યાર સુધી એટલે કે 5 વર્ષ થવા આવ્યા. હવે તો વિધાનસભાની ચૂંટણી પણ આવશે પરંતુ રહીશોને હજી સુધી આવાસની ફાળવણી કરાઇ નથી. જેને લઇને રહીશોએ રૂડા કચેરી ખાતે જઇને વિરોધ નોંધાવ્યો હતો. આ અંગે રહીશોએ વીટીવી ન્યૂઝ સાથે વાત કરતા જણાવ્યું કે 2017માં આવાસ ફાળવવામાં આવ્યા. 2019 સુધીમાં અમે હપ્તા પણ ભરી લીધા. વળી હપ્તા ભરવામાં મોડુ થાય તો 12 ટકા સુધી પેનલ્ટી પણ વસૂલી છે તેમ છતાં આજ દિન સુધી આવાસની સોંપણી કરાઇ નથી. આ અંગે અમે અવારનવાર રજૂઆતો કરી. તેઓએ જે પણ ડોક્યુમેન્ટ્સ માગ્યા તે તમામ આપી દીધા . આવાસના 5.50 લાખ ભરવા છતાં પણ અમારે આવાસ મેળવવા કચેરીઓના ધક્કા ખાવા પડે છે.