- ગુજરાતના શહેરો અને નગરોમાં પાર્કિંગની વિકટ સમસ્યા
- TP સ્કીમમાં 1% જમીન પાર્કિંગ માટે રિઝર્વ રાખવાનો આદેશ
- પાર્કિંગની જગ્યા ઉપરથી ખુલ્લી રાખવી ફરજિયાત
ગુજરાતના શહેરો અને નગરોમાં પાર્કિંગની વિકટ સમસ્યાને દૂર કરવા માટે રાજ્ય સરકારે અહીંની તમામ ટાઉન પ્લાનિંગ સ્કીમમાં 1 ટકા જમીન ફાળવવાનો નિર્ણય કર્યો છે. આ ફરજિયાત રહેશે અને પાર્કિંગની જગ્યા ઉપરથી ખુલ્લી રાખવાની સૂચના આપવામાં આવી છે.
રાજ્ય સરકારે બહાર પાડ્યું જાહેરનામું
સરકારે તમામ બિલ્ડીંગમાં પાર્કિંગની જગ્યા ફાળવવી ફરજીયાત બનાવી છે, પછી ભલે તે રહેણાંક હોય કે કોમર્શિયલ. તેનું પાલન ખૂબ જ ઓછું થઈ રહ્યું છે. જેના પરિણામે તમામ શહેરો અને નગરો પાર્કિંગની સમસ્યાનો સામનો કરી રહ્યા છે. રાજ્ય સરકારે આ અંગે જાહેરનામું બહાર પાડ્યું છે.
રાજ્યમાં મોટાભાગની સ્કીમો છે અમદાવાદમાં
રાજ્યએ 843 ટીપી સ્કીમોની ઓળખ કરી છે અને મોટાભાગની સ્કીમો અમદાવાદમાં છે. અમદાવાદ મ્યુનિસિપલ કોર્પોરેશન અને AUDA બંને સહિત અમદાવાદમાં લગભગ 364 TP સ્કીમ પૂર્ણ થઈ ગઈ છે. રાજ્યના શહેરી વિકાસ વિભાગના વરિષ્ઠ અધિકારીએ જણાવ્યું કે, 'અમે જોઈશું કે આ સ્કીમમાં આવનારી બિલ્ડીંગમાં પર્યાપ્ત પાર્કિંગની સુવિધા છે કે નહીં.'
સુરતમાં વાહનોની ગીચતા સૌથી વધુ
વાહનની ગીચતા અને ઉપલબ્ધ પાર્કિંગની જગ્યાને જોતાં શહેરો મોટી સમસ્યાનો સામનો કરી રહ્યા છે. છેલ્લા બે દાયકામાં રાજ્યમાં વાહનોની ગીચતામાં 73.5 ટકાનો વધારો થયો છે તેના પરથી પરિસ્થિતિની ગંભીરતાનો અંદાજ લગાવી શકાય છે. વાહનોની સંખ્યા પણ ગયા વર્ષે 3.10 કરોડને સ્પર્શી ગઈ હતી, જે 2001માં 0.56 લાખ હતી. સુરતમાં વાહનોની સૌથી વધુ ગીચતા છે.
ફૂટપાથ પર પાર્ક થાય છે હજારોની સંખ્યામાં વાહનો
અમદાવાદમાં સ્માર્ટ સિટી પાર્કિંગ સમસ્યાનો પ્રશ્ન વિકટ બન્યો છે. પાર્કિંગની સારી વ્યવસ્થાના અભાવે જાહેર માર્ગો પર બેફામ વાહનો પાર્કિંગ થઇ રહ્યાં છે. વાહનચાલકો મનફાવે તેમ વાહન પાર્કિંગ કરી રહ્યાં છે. પાર્કિંગ વ્યવસ્થાના અભાવે મનફાવે ત્યાં વાહન પાર્કિંગ કરવા મજબૂર બન્યા છે. શહેરીજનો ફુટપાથ પર હજારોની સંખ્યામાં વાહન પાર્ક કરી રહ્યાં છે. રહેણાંક વિસ્તારમાં બહારથી આવતા પ્રવાસીઓ પણ રોડ પર પાર્કિંગ કરી રહ્યાં છે. સોસાયટીના માર્ગો પર વાહન ચાલકોએ સ્વેચ્છાએ પાર્કિંગ પોઇન્ટ બનાવી દીધા છે. એ હિસાબે પાર્કિંગ એક ખૂબ મોટી સમસ્યા તરીકે જોવા મળી રહી છે.
નો પાર્કિંગના બોર્ડની અવગણના
અમદાવાદના ઘણા બધા વિસ્તારોમાં નો પાર્કિંગ ઝોનના બોર્ડ છતાં બેફામ વાહન પાર્કિંગ થઇ રહ્યાં છે. સામે એ પણ સાચી સમસ્યા છે કે પાર્કિંગની એવી સારી કોઈ વ્યવસ્થા જ નથી તો મજબૂર વાહન ચાલકો બીજું કરે પણ શું? મોટી સમસ્યા એ પણ છે કે લોકો પોતાના મોટાં મોટાં વાહનો રસ્તા પર પાર્ક કરી દે છે જેના કારણે અડધા રસ્તા બ્લોક થઈ જતાં હોય છે.
