કડક કાર્યવાહી / અમદાવાદના કુખ્યાત બુટલેગર વિજુ સિંધી સામે રેડ કોર્નર નોટિસ જાહેર, લીકર કિંગ ચલાવતો હતો દારૂનું નેટવર્ક

• કુખ્યાત લિસ્ટેડ બુટલેગર સામે આકરી કાર્યવાહી
• બુટલેગર વિજુ સિંધી સામે રેડ કોર્નર નોટિસ જાહેર
• સ્ટેટ મોનીટરીંગ સેલે વિજુ સિંધી સામે નોટિસ જાહેર કરી

અમદાવાદના કુખ્યાત બુટલેગર સામે પોલીસે કડક કાર્યવાહી હાથ ધરી છે. બુટલેગર વિજ્જુ સિંધી સામે રેડ કોર્નર નોટિસ જાહેર કરવામાં આવી છે. સ્ટેટ મોનીટરીંગ સેલ દ્વારા વિજુ સિંધી સામે આ નોટિસ જાહેર કરવામાં આવી છે. 

સ્ટેટ મોનીટરીંગ સેલે થોડા મહિના અગાઉ ગુજરાતના લિસ્ટેડ બુટલેગર નાગદાન ગઢવીને ગુરૂગ્રામથી ઝડપી લીધો હતો. જેના પાસેથી અન્ય એક બુટલેગર વિનોદ સિંધી ઉર્ફે વિજુ સિંધીની સાથે મળીને તેણે ગુજરાતમાં ફેલાવેલા દારૂના નેટવર્કને લગતી અનેક ચોંકાવનારી વિગતો મળી હતી. આ ઉપરાંત નાગદાન ગઢવી અને ગુજરાતના સૌથી મોટા બુટલેગર વિનોદ સિંધી ઉર્ફે વિજુ વચ્ચે થયેલા આર્થિક વ્યવહારો મળી આવ્યા હતા. જેથી એક વિશેષ ટીમ બનાવીને તપાસ શરૂ કરવામાં આવી હતી.

બુટલેગર વિજુ સિંધી સામે રેડ કોર્નર નોટિસ જાહેર

સમગ્ર ગુજરાતમાં કરોડોનો દારૂનું નેટવર્ક ચલાવનાર વિનોદ સિંધી ઉર્ફે વિજુ સિંધી સામે ઘણા ગુના નોંધાયેલા છે. ભૂતકાળમાં અન્ય રાજ્યોમાંથી ગુજરાતમાં કરોડોનો દારૂ ઠાલવનાર વિજુ દુબઇ ભાગી ગયો હોવાની ચર્ચા છે. જોકે, આ અંગે મહેસાણા એલસીબીના પી.આઈ અજીતસિંહ વાળાએ જણાવ્યું હતું કે, વિજુને પોલીસ પકડે નહીં તે માટે અને તેની સામે ચાલી રહેલી તપાસ ફોરેનના નામે ડાયવર્ટ કરવા તેના જ માણસોએ આ અફવા ફેલાવી છે. હાલ વિજુ સિંધી સામે રેડ કોર્નર નોટિસ જાહેર કરવામાં આવી છે. સ્ટેટ મોનીટરીંગ સેલ દ્વારા આ કાર્યવાહી કરવામાં આવી છે.

રેડ કોર્નર નોટિસ એટલે શું?

રેડ કોર્નર નોટિસ રીઢા ગુનેગારોને લઈને જાહેર કરવામાં આવે છે. આ નોટિસ ગુનેગાર બાબતે અન્ય દેશોની તપાસ એજન્સીઓ અને પોલીસને સૂચિત કરે છે. આવું એટલા માટે કારણ કે કોઈપણ ગુનેગાર પોલીસ અને તપાસ એજન્સીઓથી બચવાના પ્રયત્નમાં અન્ય દેશમાં જઈને રહી શકે છે. બધા દેશોની એજન્સીઓ એવા ગુનેગાર બાબતે એલર્ટ જાહેર કરી શકે છે અને તેને પકડવામાં મદદ મળી શકે છે.