અમદાવાદ શહેરના 27 વિસ્તારોમાં ગોઠવાયેલા વરસાદ માપક યંત્રના આધારે પશ્ચિમ ઝોનના રાણીપમાં સૌથી વધુ વરસાદ પડ્યો છે
Share
રાણીપ વિસ્તાર મેઘરાજાનો ‘મોસ્ટ ફેવરિટ’
સિઝનનનો સરેરાશ કરતાં પણ વધુ 22 ઈંચ વરસાદ
જોધપુરમાં 21 ઈંચ જેટલો વરસાદ નોંધાયો
આ ચોમાસામાં મેઘરાજાએ સમગ્ર અમદાવાદમાં ભારે હેત વરસાવ્યું છે. છેલ્લા બે રાઉન્ડના વરસાદમાં ક્યાંક તોફાની બેટિંગ કરી છે તો ક્યાંક હળવા મૂડમાં આવીને ખાલી ટપલી મારી છે. શહેરમાં પડેલા વરસાદની સત્તાવાર વિગતો તપાસતાં ચાલુ સિઝનમાં પશ્ચિમ ઝોનમાં રાણીપ વિસ્તાર મેઘરાજાનો ‘મોસ્ટ ફેવરિટ’ હોય તેવું લાગી રહ્યું છે. કેમ કે આ વિસ્તારમાં શહેરની સાડા પંદર ઈંચ વરસાદની સરેરાશ કરતાં પણ વધુ એવો 22 ઈંચ વરસાદ ખાબકી ચૂક્યો છે.
રાણીપમાં સૌથી વધુ વરસાદ
ટાગોર હોલના મ્યુનિસિપલ મધ્યસ્થ કંટ્રોલરૂમનાં સૂત્રોનાં જણાવ્યા મુજબ, શહેરના 27 વિસ્તારોમાં ગોઠવાયેલા વરસાદ માપક યંત્રના આધારે પશ્ચિમ ઝોનના રાણીપમાં સૌથી વધુ વરસાદ પડ્યો છે, જ્યારે ત્યારબાદ દક્ષિણ-પશ્ચિમ ઝોનનો પોશ ગણાતો જોધપુર વિસ્તાર વરસાદના મામલે નસીબદાર નીવડ્યો છે. જોધપુરમાં 21 ઈંચ જેટલો વરસાદ નોંધાયો છે.
જોધપુર બાદ પશ્ચિમ ઝોનના ઉસ્માનપુરામાં વરસાદે ભારે હેત વરસાવતાં આ વિસ્તારમાં 18 ઈંચથી વધુ વરસાદ પડી ચૂક્યો છે. જોધપુર ઝોનલ વિસ્તારમાં 18 ઈંચ જેટલો વરસાદ નોંધાયો છે, જ્યારે ઉત્તર ઝોનના કોતરપુરમાં પણ આટલો જ વરસાદ પડ્યો હોવાનું જાણવા મળ્યું છે. શહેરમાં પડેલા વરસાદની વિગતોને વધુ તપાસતાં પૂર્વ ઝોનના ચકુડિયામાં સૌથી ઓછો એટલે કે માંડ સાડા દસ ઈંચ વરસાદ પડ્યો છે. ચકુડિયા બાદ ગોતામાં સાડા બાર ઈંચ વરસાદ નોંધાયો છે.
નરોડામાં ઓછો વરસાદ
રામોલ અને નરોડામાં પણ ઓછો વરસાદ વરસ્યો છે. આ બંને વિસ્તારમાં 13 ઈંચ જેટલો વરસાદ પડ્યો છે. જ્યારે મણિનગર અને બોપલમાં પણ વરસાદની ટકાવારી 13 ઈંચ જેટલી છે. શહેરમાં ચાલુ ચોમાસાની સિઝન દરમિયાન 391.64 મિમી વરસાદ પડી ચૂક્યો છે, જે 15.42 ઈંચ જેટલો થાય છે. આમાં શહેરના સાત ઝોન પૈકી પશ્ચિમ ઝોનમાં સૌથી વધુ સાડા અઢાર ઈંચ જેટલો વરસાદ વરસ્યો છે. પશ્ચિમ ઝોન બાદ દક્ષિણ-પશ્ચિમ ઝોનમાં 17 ઈંચ વરસાદ, દક્ષિણ ઝોન, ઉત્તર-પશ્ચિમ ઝોન, ઉત્તર ઝોન અને મધ્ય ઝોનમાં લગભગ 16 ઈંચ વરસાદ પડ્યો છે, જ્યારે પૂર્વ ઝોનમાં સૌથી ઓછો એટલે કે પોણા 14 ઈંચ વરસાદ પડ્યો હોવાનું જાણવા મળ્યું છે.
વાસણા બેરેજમાં નદીની સપાટી 132 ફૂટ પર
વાસણા બેરેજમાં સાબરમતી નદીની સપાટી 132 ફૂટે હોવાની વિગતો સામે આવી છે. અત્યારે વરસાદ બંધ હોવાથી આ ડેમના તમામ દરવાજા બંધ છે. જ્યારે કેનાલમાં 600 ક્યુસેક પાણી છોડાઈ રહ્યું છે.
