વરસાદની રાહ / સૌરાષ્ટ્ર અને દક્ષિણ ગુજરાતમાં ધોધમાર પણ આ જિલ્લામાં વાવણી લાયક વરસાદ જ નહીં

• અમદાવાદ અને સુરેન્દ્રનગર પંથકમાં નથી પડયો વાવણી લાયક વરસાદ
• હજારો હેક્ટરના ખેતરો પાક વિના ખાલીખમ
• માંડલ, પાટડી, દસાડા તાલુકાના ખેડૂતો પરેશાન

સૌરાષ્ટ્ર અને દક્ષિણ ગુજરાતમાં એક બાજુ વરસાદ મન મુકીને વરસ્યો છે. ગાંડોતુર થઇને વરસી રહેલા પાણીને પગલે અત્યાર સુધીમાં રાજ્યમાં 51 ટકા જેટલો વરસાદ નોંધાયો છે. જ્યારે સૌરાષ્ટ્ર અને દક્ષિણ ગુજરાતમાં 100 ટકા જેટલો વરસાદ થયો છે. તો સારો વરસાદ પડતા સૌરાષ્ટ્ર અને દક્ષિણ ગુજરાતના નદી-નાળા છલકાતા ખેડૂતો ખુશી અનુભવી રહ્યા છે. તો બીજી તરફ અમદાવાદ અને સુરેન્દ્રનગર જિલ્લાના કેટલાક તાલુકામાં આજે પણ વાવણી લાયક વરસાદ વરસ્યો નથી. નહીવત વરસાદ પડયો હોવાથી આજ સુધી વાવણી થઇ નથી જેને લઈને ખેતરો સુક્કાભઠ્ઠ ભાંસી રહ્યા છે. અને જગતનોતાત કાગ ડોળે ધરતીના ધણીની રાહ જોઇ રહ્યો છે. જો ટૂંક સમયમાં વરસાદ નહી આવે તો મગફળી, કપાસ સહિતના પાકના વાવેતરનો સમય પૂર્ણ થઇ જશે આથી ખેડૂતોના માથે ઉપાધિના વાદળો ઘેરાયા છે.

અમદાવાદ અને સુરેન્દ્રનગર પંથકમાં હજુ સુધી નથી થયો વાવણી લાયક વરસાદ
અમદાવાદ અને સુરેન્દ્રનગર પંથકમાં નહિવત વરસાદ થતાં ખેડૂતો વાવણી પણ કરી શક્યા નથી. અમદાવાદ જિલ્લામાં માંડલ તેમજ સુરેન્દ્રનગર જિલ્લાના પાટડી અને દસાડામાં વાવણી લાયક વરસાદ ન થયો હોવાનું ખેડૂતો જણાવી રહ્યા છે. માંડલ તાલુકાના ખેતરો આજે પણ વરસાદ માટે ઝંખી રહ્યા છે. સમગ્ર પથકમાં હજારો હેક્ટરના ખેતરો પાક વિના ખાલીખમ જોવા મળી રહ્યા છે. ખેડૂતોએ ખેતરમાં ખેડ કરીને તમામ તૈયારીઓ કરી લીધી છે પરંતુ વરસાદ ખેંચાતા ધરતીપૂત્રો ચિંતામાં મૂકાયા છે. 

વરસાદ ખેંચતા કાગ ડોળે રાહ જોતો જગતનોતાત
 માંડલ, પાટડી અને દસાડા વિસ્તારના ખેડૂતો વરસાદ આધારિત ખેતી કરે છે. જેમાં તેઓ કપાસ, જુવાર, એરંડા જેવા પાકોની ખેતી વરસાદ આધારિત છે. જો કે એક તરફ સૌરાષ્ટ્ર અને દક્ષિણ ગુજરાતમાં ખેતરોમાં પાણી તરબોળ છે, જ્યારે માંડલ પાટડી દસાડા પથકમાં ખેતરમાં એક ટીપું પણ પાણી ન હોય તેવા દ્રશ્યો જોવા મળી રહ્યા છે. વરસાદ ખેંચતા ખેડૂતો કાગ ડોળે વરસાદની રાહ જુએ છે. આ વિસ્તારમાં હજારો હેકટર જમીનમાં કપાસ, મગફળી અને જુવારનો પાક થતો હોય છે. ખેડૂતો મોંઘું ડીઝલ અને પેટ્રોલ બાળી પ્રત્યેક વીઘામાં વાવણી પહેલા એક હજારથી પંદરસો રૂપિયા ખર્ચો કરીને વાવેતરની તૈયારી કર્યાનું જણાવી રહ્યા છે. જો એકાદ સપ્તાહમાં વરસાદ ન આવે તો ખેડૂતોનો ખર્ચ એળે જાય અને લાખો રૂપિયાનું નુકસાન થાય તેવી ભીતિ ખેડૂતોને સતાવી રહી છે.