- પીએમ મોદીએ સાંસદોને આપ્યો આ ટાર્ગેટ
- પોતપોતાના વિસ્તારમાં જઈને આ કામ કરવાના રહેશે
- ભાજપના સ્થાપના દિવસે થશે મોટા આયોજનો
પ્રધાનમંત્રી નરેન્દ્ર મોદીએ ભાજપની સંસદીય દળની બેઠકને સંબોધન કર્યું હતું. તેમણે જળ સંરક્ષણ પર ભાર આપતા કહ્યું કે, સાંસદ પોતાના વિસ્તારોમાં જળાશયોની પ્રગતિ પર કામ કરે. તેમણે વધુમાં કહ્યું છે કે, તે આગામી 15 દિવસ સુધી પોતાના વિસ્તારમાં રહે. ત્યાંના તળાવ અને વોટર બોડીઝને સુધારવાનું કામ કરે. પીએમ મોદીએ કહ્યું કે, કાલે છ એપ્રિલે પાર્ટીનો સ્થાપના દિવસ છે. તેથી જે પાર્ટીની નીતિઓ છે, તેને સાંસદ પોતાના વિસ્તારમાં પહોંચાડે. જનતાના હિતમાં ચલાવામાં આવેલા સરકારી કાર્યક્રમોની જાણકારી તેમને આપે.
છેવાડાના માનવી સુધી સુવિધા પહોંચાડવાના આદેશ
સૂત્રોએ જણાવ્યું છે કે, પ્રધાનમંત્રીએ સાંસદોને સ્થાપના દિવસના પખવાડીયા અંતર્ગત પોત-પોતાના સંસદીય વિસ્તારમાં દરરોજ એક મોટુ આયોજન કરીને સમાજના છેવાડાના માનવી સુધી સામાજીક ન્યાય પહોંચાડે. બેઠકમાં કેન્દ્રયી ગૃહમંત્રી અમિત શાહ, ભાજપ અધ્યક્ષ જેપી નડ્ડા સહિત કેટલાય વરિષ્ઠ નેતાઓ અને પાર્ટીના સાંસદો હાજર રહ્યા હતા. આપને જણાવી દઈએ કે, આ દરમિયાન સામાન્યત: દરેક મંગળવારે ભાજપ સંસદીય દળની બેઠક મળે છે. હાલના બજેટ સત્ર દરમિયાન સંસદીય દળની આ અંતિમ બેઠક હતી.
કોંગ્રેસની સંસદીય દળની બેઠક પણ મળી
તો વળી કોંગ્રેસ અધ્યક્ષ સોનિયા ગાંધીએ પણ આજે કોંગ્રેસ સંસદીય દળની બેઠકને સંબોધિત કરી હતી. તેમણે કહ્યું કે, સીડબ્લ્યુડી મીટીંગ ટૂંક સમયમાં બોલાવામાં આવશે. સાથે જ ટૂંક સમયમાં ચિંતન શિબિરનું આયોજન પણ થશે. તેમણે પાર્ટીની હાલની સ્થિતિ પર ભાર આપ્યો અને કહ્યું કે, સમય છે કે, કોંગ્રેસ નેતાઓ અંદરખાને રહેલા ડખ્ખા ભૂલી પાર્ટીને મજબૂત કરે. કારણ કે, દેશ માટે કોંગ્રેસ જરૂરી છે.
