આત્મનિર્ભર / દેવાળિયું થયું ત્યારે પાકિસ્તાનને યાદ આવી PM મોદીની આ સક્સેસ ફોર્મ્યુલા, કહ્યું ભારત જેવો પ્લાન તૈયાર કરો તો બચશો

• દુશ્મન દેશ પાકિસ્તાન ભયંકર ભૂખમરા જેવી સ્થિતિ
• આર્થિક કટોકટી વચ્ચે પીડાતી પ્રજાની મોંઘવારીએ તોડી નાખી કમર
• પાકિસ્તાનને હવે ભારતની ફોર્મ્યુલા યાદ આવી 

દુશ્મન દેશ પાકિસ્તાન ભયંકર ભૂખમરા જેવી સ્થિતિમાંથી પસાર થઈ રહ્યો છે. ગંભીર આર્થિક સંકટ વચ્ચે પાકિસ્તાનમાંથી વિદેશી ભંડારની પણ ભારે અછત જોવા મળી રહી છે આર્થિક કટોકટી વચ્ચે પીડાતી પ્રજાની મોંઘવારીએ કમર તોડી નાખી છે. આ દરમિયાન પાકિસ્તાનના રક્ષા મંત્રી ખ્વાજા આસિફે શહેબાઝ શરીફ સરકારને આર્થિક સંકટ માટે જવાબદાર ઠેરવી હતી. તેમણે એમ પણ કહ્યું કે આપડે એક દેવાળિયા દેશમાં રહી રહ્યા છે. આવી સ્થિતિ વચ્ચે પાકિસ્તાનને હવે ભારતની ફોર્મ્યુલા યાદ આવી છે અને તેના ચિલે ચાલવા રક્ષા મંત્રીએ ટકોર કરી છે.

દેશની હાલત પાછળ રાજકારણીઓ સહિત અનેક જવાબદાર

ગઈકાલે પાકિસ્તાનના રક્ષા મંત્રી ખ્વાજા આસિફે કહ્યું હતું કે દેશ દેવાળીયો થઈ ગયો છે જેની પાછળ પ્રતિષ્ઠિત લોકો, નોકરશાહી અને રાજકારણીઓ સહિત અનેક જવાબદાર છે. વધુમાં તેમણે કહ્યું કે પાકિસ્તાનનું દેવાળું ફૂંકાઈ ગયું છે. દેશની તિજોરી તળિયા ઝાટક થઈ ગઈ છે ખરેખર આ હાલત અગાઉથી જ થઈ ચુકી છે. વાસ્તવમાં એક કાર્યક્રમને સંબોધતા આસિફે દેવાળિયા દેશ અંગે સત્તાવાર નિવેદન આપ્યું હતું.  હવે આવી હાલતથી બચવા માટે આત્મનિર્ભર ભારત જેવી યોજના અપનાવવાની સલાહ આપી હતી.

IMF પાસે પાકિસ્તાનની સમસ્યાઓનો ઉકેલ નથી.
પાકિસ્તાની રક્ષામંત્રી ખ્વાજા આસિફે એવુ પણ કહ્યું વિકસિત અને સ્થિર દેશ બનાવવા માટે પોતાના પગ પર ઉભા રહેવું જરૂરી છે અને આ ઉપાધીનો ઉકેલ દેશમાંથી જ મળી શકે તેમ છે. સમસ્યાઓનો ઉકેલ દેશની અંદર જ છે IMF પાસે પાકિસ્તાનની સમસ્યાઓનો ઉકેલ નથી. તેમણે કહ્યું કે આવી હાલત પાછળ દેશના આગેવાનો જવાબદાર છે કારણકે દેશમાં કાયદો અને વ્યવસ્થાનું પાલન થતું નથી.

દુશ્મન દેશમાં માઝા મુકતી મોંઘવારી 
હાલ પાકિસ્તાનમા મોંઘવારી ચરમસીમાએ છે અનેક વખત આ અંગેના વીડિયો પણ સોશિયલ મીડિયામાં વાયરલ થઈ રહ્યા છે. ત્યારે મોંઘવારી એટલી હદે વકરી છે કે દૂધની કિંમત 250 રૂપિયા પ્રતિ લીટર અને ચિકનની કિંમત 780 રૂપિયા પ્રતિ કિલો જોવા મળી રહી છે. એટલું જ નહિ લોટ સહિત જીવનજરૂરી ચીજવસ્તુઓની ભારે અછત છે. આથી લોકો અસ્તિત્વ ટકાવવા ઝઝુમી રહ્યા છે.