સ્પષ્ટતા / શું કોરોના વેક્સિનના કારણે યુવાનોમાં વધી રહ્યા છે હાર્ટઍટેકથી મૃત્યુના કેસ? કેન્દ્ર સરકારે સંસદમાં આપ્યો જવાબ

• ભારતમાં વધી રહ્યા છે હાર્ટઍટેકથી અચાનક મૃત્યુના કેસ 
• કોરોના વેક્સિનની આડ અસરને લઈને કેન્દ્ર સરકારે કરી સ્પષ્ટતા
• મનસુખ માંડવિયાએ લોકસભામાં આપ્યો જવાબ 

ગુજરાત સહિત ભારતભરમાં છેલ્લા છથી આઠ મહિનાથી હાર્ટઍટેકથી મૃત્યુના કેસમાં વધારો થતો જોવા મળ્યો છે. ઘણા લોકો એવો દાવો કરી રહ્યા છે કે કોરોના વેક્સિનની આડ અસરના કારણે હાર્ટઍટેક આવતા હોય તેવું બની શકે. આ મુદ્દા પર સોશ્યલ મીડિયા પર પણ ઘણી ભ્રમણાઑ ફેલાવવામાં આવી રહી છે. જોકે આ મુદ્દે હવે સંસદમાં જ સ્વાસ્થ્ય મંત્રીએ જવાબ આપ્યો છે. જેમાં કેન્દ્ર સરકારે સ્પષ્ટ કર્યું છે કે વધતાં હાર્ટ ઍટેક અને કોરોના વેક્સિન સાથે કોઈ લેવા દેવા નથી. 

ICMR ની એક સ્ટડીમાં ખુલાસો થયો છે કે કોવિડ-19ની વેક્સિનના કારણે હાર્ટઍટેકનો ખતરો નથી વધતો. કેન્દ્રીય સ્વાસ્થ્ય મંત્રી મનસુખ માંડવિયાએ લોકસભામાં આ જાણકારી આપી છે. સ્વાસ્થ્ય મંત્રીએ સવાલના લેખિત જવાબમાં કહ્યું કે હોસ્પિટલમાં દાખલ થયા બાદ, લાઈફસ્ટાઈલ, પારિવારિક ઈતિહાસ અથવા આકસ્મિક મૃત્યુના કારણે આ રેટ વધ્યો છે. 

આટલું જ નહીં કોરોના અને હાર્ટઍટેક વચ્ચે સંબંધ છે કે નહીં તે અંગે પણ સ્વાસ્થ્ય મંત્રીએ સ્પષ્ટતા કરતાં કહ્યું, કોરોનાથી સંક્રમિત થયા બાદ અચાનક મોતના કેસ સામે આવ્યા છે પરંતુ તેમાં મૃત્યુના કારણની પુષ્ટિ કરવા માટે કોઈ પર્યાપ્ત પૂરાવા ઉપલબ્ધ નથી. 

બારથી 14 વર્ષના બાળકોને આપવામાં આવેલ વેક્સિન પણ એક સુરક્ષિત વેક્સિન છે તેવું સ્વાસ્થ્ય મંત્રીએ જણાવ્યું છે.