વિરોધ / માલધારીઓ નારાજ: કથાકાર રમેશભાઈ ઓઝાના નિવેદન સામે ભારે આક્રોશ, કહ્યું ગરીમાનું ધ્યાન ન રખાયું

 

• કથાકાર રમેશ ઓઝાએ પશુપાલકોને લઈને કરેલી ટિપ્પણી બાદ વિવાદ
• માલધારી મહાપંચાયત દ્વારા રમેશ ઓઝાનો વિરોધ
• વ્યાસપીઠ ઉપરથી માલધારી સમાજને આપ્યો ઠપકોઃ નાગજી દેસાઈ

માલધારી મહાપંચાયત દ્વારા જાણીતા કથાકાર રમેશ ઓઝાનો વિરોધ કરવામાં આવી રહ્યો છે. મોરબી ખાતે ચાલી રહેલી ભાગવત સપ્તાહના વ્યાસપીઠ પરથી ગઈકાલે રમેશ ઓઝાએ સમગ્ર રાજ્યમાં ઢોરને રખડતા મુકી દેનારા માલધારીઓને આડે હાથ લીધા હતા. જે બાદ તેમની વિરુદ્ધ માલધારી સમાજના લોકો આક્રોશ ઠાલવી રહ્યા છે. આ મામલે માલધારી મહાપંચાયતના પ્રવક્તા નાગજી દેસાઈનું નિવેદન સામે આવ્યું છે. 

માલધારી મહાપંચાયતના પ્રવક્તા નાગજી દેસાઈએ જણાવ્યું કે, 'કથાકાર રમેશભાઈ ઓઝાએ માલધારી સમાજ વિરુદ્ધ જે ઉચ્ચારણો અને જે ભાષા-શબ્દનો ઉપયોગ કર્યો છે, તે કથાકાર તરીકે અને ધાર્મિક સંત તરીકે દુર્ભાગ્ય પણ ગણી શકાય. આવા કથાકારો અને સંતોને કારણે 98 ટકા સારા સંતો અને કથાકારોને નીચું જોવું પડે છે.'

રમેશભાઈએ વ્યાસપીઠની ગરીમાનું ન રાખ્યું ધ્યાન: નાગજી દેસાઈ

તેમણે જણાવ્યું કે, 'વ્યાસપીઠ ઉપરથી માલધારી સમાજને ઠપકો આપ્યો, વ્યાસપીઠની ગરીમા જ તેમને ખબર નથી કે તેની કેટલી મોટી ગરીમા છે. વ્યાસપીઠ પરથી પશુપાલકોને તેમણે ઠપકો આપ્યો, એ ઠપકો ક્યારે વ્યાજબી ગણાય તેમણે સાથે-સાથે એ પણ કહેવાની જરૂર હતી કે, ગુજરાતના 2300 ગામમાંથી ગૌચર ગાયબ છે, તેને બે પગવાળા આખલા ગળી ગયા છે. પરંતુ તેમણે બસ માત્ર ગરીબોને જ ઠપકો આપ્યો.' આ ઉપરાંત નાગજી દેસાઈએ કહ્યું કે, તાત્કાલિક રમેશભાઈ ઓઝાએ માલધારી સમાજની માફી માંગવી જોઈએ. 

 

ગૌ સેવા કર્યા વગર તેનું દૂધ પીશો તો તે પચશે નહીની કરી હતી ટિપ્પણી

મોરબી ખાતે કોરોના દિવંગતોના મોક્ષાર્થે ભાગવત સપ્તાહ ચાલી રહી છે. શ્રીમદ્દ ભાગવત કથાકાર રમેશ ઓઝા દ્વારા કથાનું રસપાન કરવામાં આવી રહ્યું છે. ત્યારે ગઈકાલે વ્યાસપીઠ ઉપરથી કથાકાર રમેશ ઓઝાએ ગૌવંશને રસ્તા પર રઝડતા છોડી દેનાર પશુપાલકોને ટકોર કરતા જણાવ્યું હતું કે, 'નગર-નગરના રસ્તા-રસ્તા ગૌશાળા બની ગયા છે. હાઈકોર્ટે પણ સરકારને પગલા ભરવા કહ્યું છે. માલધારીઓ ગામના જોખમે અને ખર્ચે તમે દૂધ પીવાનું બંધ કરો, ગૌ સેવા કર્યા વગર તેનું દૂધ પીશો તો તે પચશે નહીં.'