ક્રાઈમ / બેંગ્લોરની યુનિવર્સિટીમાં ગુજરાતી સ્ટુડન્ટની હત્યા, પાર્ટીમાં થઈ હતી બબાલ; હાજર હતા 1000થી વધુ લોકો

• વડોદરાના યુવકની બેંગ્લોરમાં હત્યા
• રેવા યુનિ.માં અભ્યાસ કરતા ભાસ્કર જેટ્ટીની હત્યા
• વિદ્યાર્થી જૂથ વચ્ચે થઈ હતી અથડામણ

બેંગ્લોરની રેવા યુનિવર્સિટીમાં વડોદરાના યુવકની હત્યા કરાતા ચકચાર મચી જવા પામી છે. હાલ સ્થાનિક પોલીસ દ્વારા હત્યાનો ગુનો નોંધીને તપાસ શરૂ કરવામાં આવી છે. એવું કહેવામાં આવી રહ્યું છે કે હત્યાની ઘટના સમયે 1 હજારથી વધુ વિદ્યાર્થીઓ હાજર હતા.

મિકેનિકલ એન્જિનિયરિંગમાં અભ્યાસ કરતો હતો ભાસ્કર
મળતી માહિતી અનુસાર, વડોદરા શહેરના વારસિયાના ગૌસાઈ મહોલ્લામાં રહેતો ભાસ્કર હરીશભાઈ જેટ્ટી (22) બેંગ્લોરની રેવા યુનિવર્સિટીમાં મિકેનિકલ એન્જિનિયરિંગના છેલ્લા વર્ષમાં અભ્યાસ કરી રહ્યો હતો. ગત શુક્રવારે કોલેજના કેમ્પસમાં ફેરવેલ પાર્ટીનું આયોજન કરવામાં આવ્યું હતું. જેમાં 1 હજારથી વધારે વિદ્યાર્થીઓ સામેલ થયા હતા. 

વિદ્યાર્થી જૂથ વચ્ચે થઈ હતી અથડામણ
ફેરવેલ પાર્ટી દરમિયાન વિદ્યાર્થીઓના બે જૂથ વચ્ચે અથડામણ થઈ હતી. આ દરમિયાન વડોદરાના યુવક પર કેટલાક લોકોએ તીક્ષ્ણ હથિયાર વડે હુમલો કરતા તે જમીન પર જ ઢળી પડ્યો હતો. જે બાદ તેને હોસ્પિટલ ખાતે લઈ જવાતાં સ્થાનિક ડોક્ટરોએ તેને મૃત જાહેર કર્યો હતો. તો આ અંગેની જાણ થતાં પોલીસના ઉચ્ચ અધિકારીઓનો કાફલો કોલેજ કેમ્પસ ખાતે દોડી આવ્યો હતો. તો દીકરાના મૃત્યુના સમાચાર મળતા જ પરિવાર પર શોકનું મોજું ફરી વળ્યું હતું. યુનિ.માં જ હત્યાની ઘટના બનતા અન્ય વિદ્યાર્થીઓમાં ભય ફેલાયો છે.

પોલીસે તપાસ શરૂ કરી
યુવકને તીક્ષ્ણ હથિયારના ઘા કોણે માર્યા તે અંગે હજુ સુધી કંઈ સામે આવ્યું નથી. હાલ પોલીસે આ યુવકની હત્યા કોણે અને ક્યાં કારણોસર કરી તે જાણવા માટે તપાસ શરૂ કરી છે. પોલીસ હાલ અન્ય વિદ્યાર્થીઓની અને પ્રોફેસરોની પૂછપરછ કરી રહી છે.