- રાજકોટ ભાજપમાં જૂથવાદ યથાવત
- બ્રહ્મસમાજના કાર્યક્રમમાં સાવે આવ્યો જૂથવાદ
- રામ મોકરિયા અને કશ્યપ શુક્લાનું નામ ગાયબ
રાજકોટ ભાજપમાં જૂથવાદ ચરમસીમાએ હોવાનું સામે આવી રહ્યું છે. થોડા દિવસો પહેલા ભાજપના પ્રદેશ પ્રમુખ સી આર પાટિલ બ્રહ્મ સમાજના એક કાર્યક્રમમાં ગયા હતા. આ કાર્યક્રમમાં પૂર્વ CM વિજય રૂપાણી અને નિતિન ભારદ્વાજ ગેરહાજર રહ્યા હતા. આજે વિજય રૂપાણીના અધ્યક્ષ સ્થાને બ્રહ્મસમાજના પરશુરામ યુવા સંસ્થાન દ્વારા ભૂદેવોનો એવોર્ડ સમારંભ કાર્યક્રમનું આયોજન કરવામાં આવ્યું છે. આ કાર્યક્મની આમંત્રણ પત્રિકામાંથી રાજ્યસભા સાંસદ રામ મોકરિયા અને કશ્યપ શુક્લાનું નામ જોવા નથી મળી રહ્યું. રાજ્ય સભા સાંસદ અને કશ્યપ શુક્લા બંને બ્રહ્મસમાજના અગ્રણીઓ છે. આમંત્રણ પત્રિકા બાદ રાજકોટ ભાજપના બંને જૂથો વચ્ચે ગજગ્રાહ ચરમસીમાએ હોય એવું લાગી રહ્યું છે.
અગાઉના બ્રહ્મસમાજના કાર્યક્રમમાં રામ મોકરિયાના જ લાગ્યા હતા પોસ્ટર પોસ્ટર
20 નવેમ્બરના રોજ ગુજરાત પ્રદેશ પ્રમુખ સી.આર.પાટીલના રાજકોટ આગમન પહેલા ભાજપ નેતા વચ્ચે આંતરિક હોર્ડિંગ વૉર શરૂ થયું હતું. જેમાં સાંસદ રામ મોકરિયા અને કશ્યપ શુક્લના પોસ્ટરથી વિવાદ વધ્યો હતો. બ્રહ્મ સમાજના કાર્યક્રમમાં રામ મોકરિયાના પોસ્ટર આખા શહેરમાં લાગ્યા હતા પણ રાજકોટ શહેર ભાજપના આગેવાનોની હોર્ડિંગમાંથી બાદબાકી કરવામાં આવી છે. શહેર ભાજપ પ્રમુખ સહિત અનેક નેતાઓની બાદબાકી કરાતા રાજકારણ ગરમાયું હતું. ભાજપ સાંસદ અને પૂર્વ કોર્પોરેટરના જ બેનરો લાગતા અનેક તર્ક-વિતર્ક શરૂ થયા હતા જે બાદ સી આર પાટીલ અને પૂર્વ સીએમ રૂપાણીએ જુથવાદની વાતને નકારી કાઢી હતી પણ આજે બ્રહ્મસમાજના પરશુરામ યુવા સંસ્થાનના કાર્યક્રમમાં સમાજના અગ્રણીઓના જ નામ કપાઈ જતા જુથવાદની વાતને નકારી શકાય નહીં.
શહેર ભાજપ કારોબારીના બેનરમાંથી પાટીલ અને CMનો ફોટો ગાયબ
ગઈ કાલે 30 નવેમ્બરના રોજ રાજકોટ શહેર ભાજપની કારોબારી પૂર્ણ થતાં વિવાદ છેડાયો હતો. મેયરના બંગલામાં મળેલી કારોબારીમાં રાખવામાં આવેલું મંચનું બેનર ચર્ચામાં આવ્યું હતું. આ કારોબારીમાં મુખ્યમંત્રી ભૂપેન્દ્ર પટેલ, પ્રદેશ પ્રમુખ સી.આર. પાટીલની તસ્વીર ગુમ થઈ હતી..ભૂતકાળની કારોબારીમાં CM ભૂપેન્દ્ર પટેલ અને પ્રદેશ અધ્યક્ષની તસ્વીર મંચ પર જોવા મળતી હતી. મહત્વનું છે કે પૂર્વ CM વિજય રૂપાણી શહેર ભાજપ કારોબારીમાં હાજર હતા. શહેર ભાજપ પ્રમુખ વિસરી ગયા કે કંઈક બીજુ તેનો ગણગણાટ શરૂ થયો હતો.
