વાંકાનેરના ભાજપના MLA જીતુ સોમાણી ગેરહાજર જોવા મળ્યા
સાંસદ મોહન કુંડારીયાના નિવેદનની ભારે ચર્ચા
મોરબીના વાંકાનેરમાં ભાજપના રાજ્યસભાના ઉમેદવાર કેસરીદેવસિંહ ઝાલાનો સન્માન સમારોહ ગઈકાલે યોજાયો હતો. વાંકાનેરના કેસરીદેવસિંહ ઝાલાના સન્માન સમારોહમાં સમગ્ર ભાજપ પરિવારની હાજરી વચ્ચે એક વ્યક્તિની ગેરહાજરીની ધીમા સ્વરે ખૂબ જ ચર્ચા થઇ અને તે નામ છે વાંકાનેરના ભાજપના ધારાસભ્ય જીતુ સોમાણી. જીતુ સોમાણી કેસરીદેવસિંહ ઝાલાના સન્માન સમારોહ માટે યોજાયેલા વિશાળ રોડ શૉમાં ગેરહાજર રહ્યા હતા.
MLA જીતુ સોમાણી રહ્યા ગેરહાજર
કેસરીદેવસિંહ ઝાલાના સન્માન સમારોહમાં ધારાસભ્યની ગેરહાજરી વચ્ચે વધુ એક ચોંકાવનારી ઘટના બની. આ ઘટના છે રોડ શૉ બાદ યોજાયેલા કાર્યક્રમમાં ભાજપના સાંસદ મોહન કુંડારીયાનું નિવેદન. મોહન કુંડારીયાના નિવેદન બાદ મોરબી જિલ્લાના રાજકારણમાં ગરમાવો આવ્યો છે. તેમના નિવેદનની ચારેકોર ચર્ચા ચાલી રહી છે.
શ્વાનને એમ કે ગાડાનો ભાર મારા પર છેઃ કુંડારિયા
રોડ શૉ બાદ યોજાયેલા કાર્યક્રમમાં મોહન કુંડારિયાએ જાહેરમંચ પરથી કહ્યું હતું કે, 'એક ખેડૂત ભાદરવા મહિનાના તાપમાં ખેતરથી ગાડુ ભરીને આવતો હોય અને રેતીવાળો રસ્તો હોય, બળદિયા ગાડુ ઢસેડતા હોય પણ નીચે જો એક શ્વાન આવી જાય અને એના મનમાં એવું હોય કે આખું ગાડું હું ઢસડું છું અને બળદગાડાનો ભાર મારા પર જ છે. તો શ્વાને આવું જરાય ન વિચારવું જોઈએ. ગાડાનો ભાર તો નંદી પર હોય છે. આ બળદોએ ક્યારેય ગાડાને પાછું પડવા દીધું નથી. તો શ્વાને પણ એવું ન વિચારાય કે ગાડા નીચે હું છું અને આખું ગાડું હું ઢસેડું છું.'
મોહન કુંડારીયાના નિવેદનથી રાજકીય ગરમાવો
મોહન કુંડારીયાના આ નિવેદન પર હવે રાજકીય ગરમાવો જોવા મળી રહ્યો છે. મોહન કુંડારીયાનું આ નિવેદન કોના માટે હતું તે તો કહેવું મુશ્કેલ છે. સાંસદ મોહન કુંડારિયાએ તો બળદ અને શ્વાનની વાત કરી રાજકીય ચર્ચાઓના ઘોડા દોડાવી દીધા છે. ત્યારે આવનારા સમયમાં કુંડારિયાના નિવેદન પર કઇ બાજુથી વળતું નિવેદન આવશે તેને લઇને રાજકીય વર્તુળોમાં ચર્ચા શરૂ થઇ છે.
