- મણિપુરમાં ફરી હિંસાની હોળી
- બે વિદ્યાર્થીઓની ઘાતકી હત્યા મામલે લોકો ભડક્યાં
- લાશની તસવીર સોશિયલ મીડિયામાં વાયરલ
- ઠેર ઠેર દેખાવ થતાં 5 દિવસ ઈન્ટરનેટ બંધ કરાયું
મણિપુર ફરી પાછું અશાંત બન્યું છે. આ વખતે બે સગીરના હત્યા મામલે આગની ચિનગારી ચંપાઈ ગઈ હતી. એક છોકરો અને એક છોકરીની ઘાતકી હત્યાના સમાચાર વહેતા થયા બાદ તેમની લાશની તસવીર વાયરલ થતાં લોકો રસ્તા પર ઉતરી પડ્યાં હતા અને ઠેર ઠેર દેખાવ કરવા લાગ્યા હતા. પરિસ્થિતિ વધારે ન બગડે એટલે સરકાર દ્વારા એક મોટું એક્શન લેવાયું હતું.
પાંચ દિવસ સુધી ઈન્ટરનેટ બંધ
આ ઘટનાને પગલે સરકારે તાત્કાલિક પાંચ દિવસ સુધી ઈન્ટરનેટ બંધ કરી દીધો છે અને ચાંપતો બંદોબસ્ત ગોઠવી દીધો છે.
શું થયું હિંસામાં
મણિપુરની ઇમ્ફાલ ખીણમાં બે સગીરની હત્યાના વિરોધમાં પ્રદર્શન કરી રહેલા ટોળા પર પોલીસે મંગળવારે ટીયર ગેસના શેલ છોડ્યા હતા અને લાઠીચાર્જ કરતાં 30થી વધુ વિદ્યાર્થીઓ ઘાયલ થયા હતા. ઘાયલોમાં મોટાભાગની છોકરીઓ છે. બે સગીરની લાશની તસવીરો સોશિયલ મીડિયા પર વાયરલ થયાના કલાકો બાદ ઇમ્ફાલની શાળા-કોલેજોના વિદ્યાર્થીઓએ વિરોધ રેલીઓ કાઢી હતી અને હત્યામાં સંડોવાયેલા લોકોની ધરપકડ કરવાની માગણી કરી હતી.
શું બની ઘટના
6 જુલાઈએ ટ્યુશનેથી પાછા આવતી વખતે હિજમ લિન્થોઇંગમ્બી અને ફિજામ હેમજીત નામની બે સગીરાઓનું અપહરણ થયું હતું. સોશિયલ મીડિયા પર વાયરલ થયેલા ફોટોમાં હિજમ લિંથોંગમ્બી અને ફિજમ હેમજીત જંગલમાં જમીન પર બેઠેલી જોવા મળી રહી છે, તેમની પાછળ અજાણ્યા બંધકધારીઓ ઊભા છે અને તેમને ગોળી મારી દેવાઈ હતી. બીજી તસવીરમાં તેમની લાશ પડેલી જોવા મળી રહી છે. આ બન્ને તસવીરો સોશિયલ મીડિયામાં વાયરલ થઈ હતી. પોતાની દીકરીને યાદ કરતા પિતા કુલજીત હિજામે જણાવ્યું હતું કે, "તે કેમેસ્ટ્રી ટ્યુશન સેન્ટરથી ફિઝિક્સના ટ્યુશન સેન્ટર સુધી ચાલતી હતી. 6 જુલાઈના રોજ પણ તે ટ્યુશન માટે ગઈ હતી." તેણે કહ્યું, "તે તેની માતા સાથે ફોન પર વાત કરી રહી હતી અને અચાનક તેનો ફોન સ્વીચ ઓફ થઈ ગયો. એવું લાગતું હતું કે જાણે કોઈએ એનો ફોન છીનવી લીધો હોય. હિજમ લિંથોઇંગમ્બી અને ફિજામ હેમજીત છેલ્લા બે મહિનાથી લાપતા છે. સુરક્ષા એજન્સીઓ તેમની શોધખોળ કરી રહી છે, ત્યારે સ્થાનિક લોકો તેમને શોધવા માટે રસ્તા પર ઉતરી આવ્યા છે.
શું છે મણિપુર વિવાદ ?
મણિપુરમાં અનુસૂચિત જનજાતિ (એસટી)નો દરજ્જો આપવાની મેઈતી સમુદાયની માંગના વિરોધમાં ત્રીજી મેએ પર્વતીય જિલ્લાઓમાં આદિવાસી એકજુટતા માર્ચનું આયોજન કરાયા બાદ હિંસક ઘટનાઓ શરૂ થઈ હતી. ત્યારથી અત્યાર સુધીમાં હિંસામાં ઓછામાં ઓછા 160 લોકોના મોત થયા છે. મણિપુરમાં મેઈતી સમુદાયની 53 ટકા વસ્તી છે અને તેઓ મુખ્યરૂપે ઈમ્ફાલ ખીણમાં રહે છે, જ્યારે નગા અને કુકી જેવા આદિવાસી સમુદાયોની વસ્તી 40 ટકા છે અને તેઓ મુખ્યત્વે પર્વતીય જિલ્લાઓમાં રહે છે.
