દુઃખદ / ધોરાજીમાં તાજિયામાં મોટી દુર્ઘટના: કુલ 24 લોકોને લાગ્યો કરંટ, બેના નિધન, DySP સહિતના અધિકારીઓ થયા દોડતા

• ધોરાજીમાં તાજીયા સરઘસમાં વીજ કરંટ લાગતા નાસભાગ
• વીજ કરંટથી 2 નાં મૃત્યું જ્યારે 24 ઈજાગ્રસ્તોને સારવાર અર્થે ખસેડાયા
• ઘટનાની જાણ થતા પોલીસ તેમજ વીજ કંપનીન ટીમ ઘટના સ્થળે પહોંચી

 આજે મુસ્લિમ બિરાદરોનાં પવિત્ર તહેવાર મોહરમની સમગ્ર રાજ્યમાં શાંતિપૂર્ણ માહોલમાં ઉજવણી કરવામાં આવી રહી છે. ધોરાજીમાં અચાનક તાજીયામાં વીજ કરંટ લાગતા 2 લોકોનાં મૃત્યું થયા હતા. રસુલપુરા વિસ્તારમાં સરઘસ દરમ્યાન 24 લોકોને વીજ કરંટ લાગ્યો હતો. આ ઘટનાં સર્જાતા સમગ્ર વિસ્તારમાં દોડાદોડ મચી જવા પામી હતી. ત્યારે તાત્કાલીક તમામ ઈજાગ્રસ્તોને સારવાર અર્થે હોસ્પિટલ ખસેડાયા હતા. તેમજ ડીવાયએસપી, પોલીસ તેમજ વીજ કંપનીની ટીમ ઘટનાં સ્થળે પહોંચી હતી. ત્યારે અચાનક જ સર્જાયેલ આ અકસ્માતમાં બે લોકોનાં મૃત્યું થતા પરિવારજનોમાં શોક વ્યાપી ગયો હતો. 

ઈજાગ્રસ્તોનો તમામ ખર્ચો ટ્રસ્ટ બોર્ડ દ્વારા ઉઠાવવામાં આવશેઃ અફરોજભાઈ
આ બાબતે મુસ્લિમ સમાજનાં આગેવાન અફરોજભાઈએ જણાવ્યું હતું કે આજે ધોરાજી ખાતે મોહરમ પ્રસંગે એક ગમખ્વાર અકસ્માતનો બનાવ બન્યો છે. જેમાં બે લોકોનાં મૃત્યું થયા છે જ્યારે 24 લોકોને નાની મોટી ઈજાઓ પહોંચી છે. આજે ધોરાજીમાં બઉ મોટો ગમખ્વાર અકસ્માત બન્યો છે. ત્યારે તાજીયા કમિટી તરફથી એવી જાહેરાત કરવામાં આવી છે કે ક્યાં પણ ઢોલ ત્રાસ વાગશે નહી. તેમજ એમ.એમ.એ ટ્રસ્ટ બોર્ડે તેમજ તેલી હોસ્પિટલ ટ્રસ્ટ બોર્ડ તરફથી એવી પણ જાહેરાત કરવામાં આવી છે કે આ ગમખ્વાર બનાવમાં જે લોકો ઈજાગ્રસ્ત છે તેઓને વધુ સારવાર અર્થે જ્યાં પણ ખસેડવામાં આવશે જેનો તમામ ખર્ચો ટ્રસ્ટ બોર્ડ દ્વારા ઉઠાવવામાં આવશે.

અચાનક જ વીજ કરંટ લાગતા બે લોકોનાં મૃત્યું થયા, જ્યારે 24 લોકો સારવાર હેઠળઃ રાજકોટ ગ્રામ્ય એસપી
આ બાબતે રાજકોટ ગ્રામ્ય એસપી જયપાલસિંહ રાઠોડે જણાવ્યું હતું કે, રાજકોટ જીલ્લાનાં ધોરાજી ખાતે તાજીયાનો જે માતમ ચાલતો હતો. જેમાં તેઓ તાજીયા લઈને બહાર નીકળતા હતા. ત્યારે અચાનક જ વીજ કરંટ લાગતા બે લોકોનાં ઘટનાં સ્થળે જ મૃત્યું થયા હતા. જ્યારે 24 લોકો ઈજાગ્રસ્ત થતા તેઓને તાત્કાલીક સારવાર અર્થે ખસેડવામાં આવ્યા હતા.