યાત્રાધામમાં પોલમપોલ! / શું પાણીમાં તો કંઇ ડામર ચોંટતો હશે? ભાદરવી પૂનમના મેળાની તૈયારીઓ વચ્ચે અંબાજીમાં સામે આવી તંત્રની ગંભીર બેદરકારી

• અંબાજીમાં તંત્રની ગંભીર બેદરકારી સામે આવી
• ભાદરવી પૂનમના મેળાની તૈયારીઓ વચ્ચે બેદરકારી
• રોડ પર પાણીમાં ડામર ઠાલવ્યો
• વરસાદમાં થીગડા મારેલો રોડ ટકશે? 

ભાદરવી પૂનમ મહામેળો અંબાજી: યાત્રાધામ અંબાજી ખાતે દર વર્ષે ભાદરવી પૂનમનો મેળો ભરાતો હોય છે. જેમાં ગુજરાત સહિત દેશભરમાંથી લાખોની સંખ્યામાં માઈભક્તો અંબાજી પહોંચતા હોય છે. અંબાજીના ભાદરવી પૂનમના મેળાને હવે ગણતરીના દિવસો જ બાકી રહ્યા છે. જેથી ભાદરવી પૂનમના મેળાને લઈને સ્થાનિક તંત્ર દ્વારા તડામાર તૈયારીઓ કરવામાં આવી છે. ત્યારે અંબાજીમાં ભાદરવી પૂનમના મેળાની તૈયારીઓ વચ્ચે તંત્રની મોટી બેદરકારી સામે આવી છે. અંબાજીમાં મેળાની તૈયારીના ભાગરૂપે તંત્ર નાટક કરતું હોય તેવો ઘાટ જોવા મળ્યો છે.

ખાડા બૂરવાની કામગીરીમાં પણ વેઠ ઉતારાયો
અંબાજીમાં રોડ પર પડી ગયેલા ખાડાને ભરવાની કામગીરી હાથ ધરાઈ છે. એટલે કે ખાડા પર ડામરના થીગડા મારવામાં આવી રહ્યા છે. તંત્રએ રસ્તો બનાવવાને બદલે ડામરના થીગડા મારીને સંતોષ માની લીધો છે. એટલું જ નહીં અંબાજીમાં રોડ પર ખાડા બૂરવાની કામગીરીમાં પણ વેઠ ઉતારવામાં આવ્યો છે. રસ્તા પર પાણી ભરેલા ખાડામાં ડામર ઠાલવતા અનેક સવાલો ઉઠ્યા છે. પાણીમાં ડામર નાખતા ડામર રોડ પર ચોટશે કે નહીં તે પણ એક મોટો સવાલ છે. 

રસ્તા પર પાણી ભરેલું હોવા છતાં પાથરી દીધો ડામર
આપને જણાવી દઈએ કે, આગામી 23થી 29 સપ્ટેમ્બર સુધી આ રસ્તાઓ પરથી લાખો લોકો પસાર થવાના છે. ત્યારે આ થીગડા મારેલો રોડ ભાદરવી પૂનમ સુધી ટકશે કે નહીં તે અંગે પણ સવાલો ઉઠ્યા છે. કારણ કે કામદારો દ્વારા રોડ પર પાણી ભરેલું હોવા છતાં ડામર પાથરી દેવામાં આવ્યો છે. રસ્તા પરના ખાડા ભરવામાં વેઠ વારવામાં આવ્યો છે.  જ્યાં પાણીનો મોટો ખાડો ભરાયેલો હતો, તેમાંથી પાણી કાઢીને પછી તેમાં ડામર નાખવાને બદલે પાણીમાં જ ડાયરેક્ટ ડમ્પરથી ડામર ઠાલવવામાં આવ્યો. ત્યારે પાણીમાં ડામર નાખતા ડામર રોડ પર ચોટશે કે નહીં તે પણ એક મોટો સવાલ છે. 

સળગતા સવાલ
- અંબાજીમાં ભાદરવી પૂનમના મેળામાં કેમ બેદરકારી?
- પ્રજાના ટેક્સના પૈસા કેમ વેડફાય છે?
- બેજવાબદાર લોકો સામે ક્યારે થશે કાર્યવાહી?
- પાણીમાં ડામર કેવી રીતે ચોટશે?
- વરસાદમાં થીગડા મારેલો રોડ કેવી રીતે ટકશે? 
- ભાદરવી પૂનમના મેળાની તૈયારીઓ વચ્ચે બેદરકારી કેમ?