ઘટના / મહિસાગરનો આર્મી જવાન ગુમ છતાં તંત્રના પેટનું પાણી નથી હલતું, અંતે થાકેલા પરિવારે મજબૂરીમાં લીધો આ નિર્ણય

• મહીસાગરના લકડિપોયડા ગામનો આર્મી જવાન ગુમ
• જવાનનો ગોધરા રેલવે સ્ટેશનથી સંપર્ક નથી થઇ શક્યો
• પરિવારજનોએ શોધખોળ માટે સોશિયલ મીડિયાનો સહારો લીધો

મહીસાગરના લકડિપોયડા ગામનો આર્મી જવાન ગુમ થયો હોવાની ઘટના સામે આવી છે. યુપી (ઉત્તરપ્રદેશ) જવા માટે નીકળેલા જવાનનો ગોધરા રેલવે સ્ટેશનથી સંપર્ક નથી થઇ શક્યો.
એકાએક આર્મી જવાન ગુમ થતા પરિવાર પણ ચિંતામાં મુકાયો છે. ગોધરા રેલવે સ્ટેશન અને તંત્ર તરફથી પૂરતો સહકાર ન મળતો હોવાનો પરિવાર આક્ષેપ લગાવી રહ્યાં છે. પરિવારે આર્મી જવાનની શોધખોળ માટે સોશિયલ મીડિયાનો પણ સહારો લીધો છે.

આ મામલે સોશિયલ મીડિયા પર પરિવારે માહિતી આપતા જણાવ્યું છે કે, 'ગામ લકડી પોયડા તા. લુણાવડા. જિલ્લો. મહીસાગર, રાજ્ય ગુજરાત. પીન કોડ 388270 નામ નરેન્દ્ર સિંહ બારીયા આર્મી નોકરી કરે છે તેઓ 7/6/2022ના રોજ ગોધરા રેલવે સ્ટેશનથી ઝાંસી ઉત્તરપ્રદેશ જવા નીકળ્યા હતા. અત્યાર સુધી તેમનો કોઇ જ કોન્ટેક્ટ થયો નથી. ઝાંસી તપાસ કરી ત્યાં પણ પહોંચ્યા નથી. જો કોઇને ક્યાંય જોવા મળે તો પ્લીઝ સંપર્ક કરો ને વધુમાં વધુ આ પોસ્ટ શેર કરવા વિનંતી.

આપણા દેશના જવાન નરેન્દ્રસિંહ માટે થોડી મદદ કરો.
જય હિન્દ જય જવાન જય કિસાન

મહત્વનું છે કે, આર્મીનો જવાન ગુમ થઇ ગયો હોવા છતાં તંત્ર તરફથી કોઇ પણ પ્રકારની મદદ નથી મળી રહી હોવાનું જાણવા મળી રહ્યું છે. ત્યારે અંતે થાકીને જવાનના પરિવારે સોશિયલ મીડિયાનો સહારો લીધો. આર્મીનો જવાન કે જે દેશ માટે પોતાના જીવની પણ પરવાહ નથી કરતો. છતાંય આર્મીના આ જવાનને શોધવામાં ગોધરા રેલવે સ્ટેશન કે તંત્ર તરફથી કોઇ પણ પ્રકારનો સાથ સહકાર નહીં મળતો હોવાનો પરિવાર આક્ષેપ લગાવી રહ્યાં છે.

અંતે કંટાળેલા પરિવારે જાતે જ સોશિયલ મીડિયાના માધ્યમથી જવાનના ફોટા મૂકીને મોબાઇલ નંબર શેર કરીને મદદ કરવા માટેની ગુહાર લગાવી છે. ત્યારે હવે જોવાનું એ રહ્યું કે પરિવારે ખુદ સોશિયલ મીડિયાના માધ્યમથી જવાનની શોધખોળ માટેની ગુહાર લગાવી છે. ત્યારે શું તંત્ર આ પરિવાર માટે મદદરૂપ થશે? શું તંત્ર કે પોલીસ આ જવાનને શોધી કાઢશે? શું થયુ હશે આ જવાન સાથે? આ રીતે એકાએક આર્મી જવાન ગુમ થઇ જતા પરિવાર પણ ચિંતામાં મૂકાઇ ગયો છે. આખરે ક્યારે આ જવાન પોતાના પરિવારને મળી શકશે તે હવે જોવાનું રહ્યું.