- મહારાષ્ટ્રનું રાજકારણ ફરી એકવખત ગરમાયું
- પ્રદેશ ભાજપ અધ્યક્ષે ફડણવીસને મુખ્યમંત્રી બનાવવાની હિમાયત કરી
- નાગપુરમાં ફડણવીસને ભાવિ સીએમ તરીકે વર્ણવતા પોસ્ટર લગાવાયા
મહારાષ્ટ્રમાં રાજકીય હલચલ ચાલુ છે. ત્યારે હવે પ્રદેશ ભાજપ અધ્યક્ષ ચંદ્રશેખર બાવનકુલે એક ખાનગી ન્યૂઝ સાથેની ખાસ વાતચીતમાં દેવેન્દ્ર ફડણવીસને મુખ્યમંત્રી બનાવવાની હિમાયત કરી હતી. તેમણે કહ્યું કે ભાજપના કાર્યકરો ઈચ્છે છે કે દેવેન્દ્ર ફડણવીસ મુખ્યમંત્રી બને પરંતુ આજની વાસ્તવિકતા એ છે કે આજે મુખ્યમંત્રી એકનાથ શિંદે છે. આવી સ્થિતિમાં શિંદે અમારા નેતા છે. નાગપુરમાં ફડણવીસને ભાવિ સીએમ તરીકે વર્ણવતા પોસ્ટર લગાવવામાં આવ્યા છે. તમને જણાવી દઈએ કે હાલમાં દેવેન્દ્ર ફડણવીસ મહારાષ્ટ્રના ડેપ્યુટી સીએમ છે અને બીજેપી અધ્યક્ષનું નિવેદન એવા સમયે આવ્યું છે જ્યારે એનસીપી નેતા અજિત પવારને લઈને ઘણી અટકળો ચાલી રહી છે.
અજિત પવાર પર નિવેદન
મુંબઈમાં આયોજિત એનસીપીની બેઠકમાં તેઓ ન પહોંચ્યા અને અન્ય એક કાર્યક્રમમાં હાજર રહ્યા ત્યારે આ અટકળોને વધુ બળ મળ્યું. અહીં તેમણે પીએમ મોદીના વખાણ કર્યા હતા. અજિત પવાર વિશે એવો દાવો કરવામાં આવી રહ્યો છે કે તેઓ કેટલાક ધારાસભ્યો સાથે ભાજપમાં જઈ શકે છે. જોકે, તેણે આ અટકળોને ફગાવી દીધી છે. બાવનકુળેએ પણ અજિત પવારનો બચાવ કર્યો હતો. તેમણે કહ્યું, MVA નેતાઓ અજિત પવારને બદનામ કરવાનું કામ કરી રહ્યા છે. અજિત પવારના નેતૃત્વને નબળું પાડવાનું કામ તેમના જ લોકો કરી રહ્યા છે. ચંદ્રશેખર બાવનકુળેએ પણ એકનાથ શિંદેના રજા પર જવા અંગે નિવેદન આપ્યું હતું. તેમણે કહ્યું કે શિંદે રજા પર ક્યાંય ગયા નથી. તે પરિવાર સાથે તેના ગામ ગયા છે. ફોન પર સંપૂર્ણપણે ઉપલબ્ધ છે.
ઉદ્ધવ ઠાકરેનો ઉલ્લેખ કર્યો
બાવનકુલેએ કહ્યું કે ઉદ્ધવ ઠાકરેએ પોતે સીએમ હતા ત્યારે વડાપ્રધાન નરેન્દ્ર મોદીને પત્ર લખીને કહ્યું હતું કે બારસુ પ્રોજેક્ટ થવો જોઈતો હતો પરંતુ હવે રાજકારણ કરી રહ્યા છે. જો કેટલાક પ્રશ્નો હશે તો સરકાર તેમને ચોક્કસ સાંભળશે.
સંજય રાઉતે શું કર્યો દાવો?
ઉદ્ધવ ઠાકરે જૂથના નેતા સંજય રાઉતે રવિવારે દાવો કર્યો હતો કે એકનાથ શિંદેના નેતૃત્વવાળી મહારાષ્ટ્ર સરકારનું "ડેથ વોરંટ" જાહેર કરવામાં આવ્યું છે અને તે આગામી 15-20 દિવસમાં પડી જશે. જો કે, શાસક શિવસેના (શિંદેના નેતૃત્વમાં) એ રાઉતને નકલી જ્યોતિષી ગણાવ્યા અને કહ્યું કે ઉદ્ધવ ઠાકરેની આગેવાની હેઠળની શિવસેના (યુબીટી)માં એવા ઘણા નેતાઓ છે જેઓ આવી આગાહીઓ કરે છે.
