- અમદાવાદમાં 146મી રથયાત્રા યોજાશે
- જગન્નાથજી મંદિરે નેત્રોત્સવ વિધિ
- નેત્રોત્સવ વિધિ બાદ કરવામાં આવી મહાઆરતી
- 15 દિવસ બાદ ભગવાન નિજ મંદિરમાં બિરાજમાન
આગામી 20 જૂનને અષાઢી બીજના દિવસે અમદાવાદમાં ભગવાન જગન્નાથજીની 146મી રથયાત્રા યોજવા જઈ રહી છે. જેને લઈને તમામ તૈયારીઓ પૂરી કરી લેવામાં આવી છે. અમદાવાદમાં ભગવાન જગન્નાથજીની 146મી રથયાત્રા પહેલા આજે ભગવાન જગન્નાથજી, ભાઈ બલરામ અને બહેન સુભદ્રા સાથે સરસપુર મામાના ઘરેથી નિજ મંદિરે પરત ફર્યા છે. 15 દિવસ બાદ મામાના ઘરેથી ભગવાન મંદિરે પરત ફરતા જમાલપુર નિજ મંદિરે નેત્રોત્સવ વિધિ કરવામાં આવી.
હજારોની સંખ્યામાં ભક્તો રહ્યા હાજર
નેત્રોત્સવ વિધિ બાદ જગન્નાથજીના મંદિરે ધ્વજારોહણની વિધિ કરવામાં આવી હતી. આ દરમિયાન જમાલપુર નિજ મંદિર ખાતે અમદાવાદ મેયર કિરીટ પરમાર, સ્ટેન્ડિંગ કમિટીના ચેરમેન હિતેશ બારોટ, એલિસબ્રિજના ધારાસભ્ય અમિત શાહ સહિતના નેતાઓ અને હજારોની સંખ્યામાં ભક્તો હાજર રહ્યા હતા. ભગવાનના કપાટ ખૂલતાંની સાથે જ જય રણછોડ, માખણચોરના નાદ સાથે મંદિર ગુંજી ઉઠ્યું હતું. ભગવાન નિજમંદિરે પરત ફર્યા બાદ આજે નેત્રોત્સવ વિધિ બાદ પહેલી મહાઆરતી ઉતારવામાં આવી હતી.
મંદિરે ગોઠવી દેવાયો ચુસ્ત બંદોબસ્ત
પોલીસ વિભાગ દ્વારા જગન્નાથજીની રથયાત્રા માટે તૈયારીઓ હાથ ધરવામાં આવી રહી હતી. હવે અંતિમ દિવસોમાં જમાલપુર સ્થિત મંદિરે વિવિધ સુરક્ષા દળોનો લોખંડી બંદોબસ્ત ગોઠવી દેવામાં આવ્યો છે. અમદાવાદમાં ભગવાન જગન્નાથની રથયાત્રાની સુરક્ષાને લઈ પોલીસ દ્વારા ગઈકાલે ગ્રાન્ડ રિહર્સલ કરવામાં આવ્યું હતું. 146મી રથયાત્રાને લઈ પોલીસ કમિશનરની અધ્યક્ષતામાં રિહર્સલ કરાયું હતું. જેમાં 22 કિમી સુધીના રૂટ પર અમદાવાદ પોલીસના 15 હજાર જવાનો જોડાયા હતા. રિહર્સલ દરમિયાન સુરક્ષા વ્યવસ્થાનું નિરીક્ષણ કરવામાં આવ્યું હતું.
નેત્રોત્સવ વિધિ એટલે શું?
નાથ જ્યારે નગરચર્યાએ નીકળે છે તે અગાઉ 15 દિવસ પહેલા ભગવાન પોતાના મોસાળમાં રહેવા જાય છે. મામાના ઘરે ભગાવાનની ખૂબ જ આગતા સ્વાગતા કરવામાં આવે છે. મોસાળમાં ભાણેજને અનેક મિષ્ઠાન્ન અને જાંબુ ખવડાવવામાં આવે છે આથી તેમને આંખો આવી જાય છે. જેથી ભગવાન જ્યારે નિજ મંદિર ફરે છે ત્યારે નેત્રોત્સવ વિધી કરવામાં આવે છે. આ વિધિ બાદ તેમની આંખો પર પાટા બાંધી દેવામાં આવે છે. આથી ભગવાનને આંખોને ઠંડક મળે તેવા દ્રવ્યોથી નેત્રોત્સવ વિધિ કરવામાં આવે છે. અષાઢી બીજના દિવસે સવારે 4 વાગ્યે ભગવાની આંખેથી આ પાટા ખોલવામાં આવશે. ત્યાર પછી મંગળાઆરતી થશે.
