બિહાર લઠ્ઠાકાંડ / મોતની પોટલીમાં સુખનો સૂરજ આથમ્યો: આઠના મોત, છ લોકોએ રોશની ગુમાવી, બિહારમાં ફરી લઠ્ઠાકાંડ

• બિહારમાં ફરી એકવાર દારૂનો કહેર જોવા મળ્યો
• મોતિહારી જિલ્લામાં દારૂ પીવાથી આઠ લોકોના મોત થયા
• છ લોકોએ આંખોની રોશની ગુમાવી, ઝેરી દારૂ પીને લોકોની હાલત બગડી?

બિહારમાં ફરી એકવાર દારૂનો કહેર જોવા મળ્યો છે. મોતિહારી જિલ્લામાં દારૂ પીવાથી આઠ લોકોના મોત થયા છે, જ્યારે છ લોકોએ આંખોની રોશની ગુમાવી છે. આ તમામની હોસ્પિટલમાં સારવાર ચાલી રહી છે. વાત જાણે એમ છે કે, હોસ્પિટલમાં દાખલ દર્દીઓએ પોતે જ ડોકટરોને કહ્યું કે તેઓએ દારૂ પીધો હતો અને ત્યારબાદ તેમની હાલત વધુ ખરાબ થઈ ગઈ હતી. દર્દીઓના આ નિવેદન બાદ આશંકા વ્યક્ત કરવામાં આવી રહી છે કે ઝેરી દારૂ પીને જ આ લોકોની હાલત બગડી છે.

બિહારની મોતિહારી સદર હોસ્પિટલમાં તૈનાત એક ડોક્ટરે જણાવ્યું કે, દર્દીઓએ દારૂ પીધો હોવાનું સ્વીકાર્યું છે. જોકે પ્રશાસન પોસ્ટ મોર્ટમ રિપોર્ટ અને બિસરા તપાસ રિપોર્ટ આવવાની રાહ જોઈ રહ્યું છે. મોતિહારી અને મુઝફ્ફરપુર સિવિલ સર્જને પહેલા તેને ડાયેરિયા કહીને શંકાસ્પદ મૃત્યુ ગણાવ્યું હતું, પરંતુ જ્યારે દર્દીઓએ દારૂ પીવાની અને આંખમાં કંઈ ન દેખાતું હોવાની વાત કહી ત્યારે ડૉક્ટરોની શંકા વધુ ઘેરી બની. હાલમાં દાખલ દર્દીઓને સારવાર આપવામાં આવી રહી છે.

ઘટના બાદ તંત્ર એલર્ટ
આ ઘટના બાદ જિલ્લા વહીવટીતંત્ર એલર્ટ થઈ ગયું છે. જેને લઈ તાત્કાલિક અસરથી ડૉક્ટરોની ટીમ ગામમાં મોકલવામાં આવી છે. ટીમ ગામમાં દરેક સભ્યોની તપાસ કરી રહી છે. જે પણ શંકાસ્પદ જણાશે તેને હોસ્પિટલમાં મોકલવામાં આવી રહ્યો છે. આ ઘટનામાં ધ્રુવ પાસવાન, વિનોદ પાસવાન, અશોક પાસવાન, રામેશ્વર રામ અને હરસિદ્ધિના પિતા-પુત્ર પરમેન્દ્ર દાસ અને નવલ દાસ, ટુનટુન સિંહ અને પહાડપુર ગામના ભૂતાન માંઝીના મોત થયા છે. બીજી તરફ પહારપુર ગામના ભોલા પ્રસાદની હાલત નાજુક છે. સદર હોસ્પિટલના ડૉ.અમિત અને ગ્રામ્ય હૉસ્પિટલના ડૉ.વિનોદનું મોત નકલી દારૂના કારણે થયાની શક્યતા વ્યક્ત કરવામાં આવી છે.